រាជធានីភ្នំពេញ ៖ ថ្លែងក្នុងឱកាសចុះពិនិត្យវឌ្ឍនភាពគម្រោងអភិវឌ្ឍន៍ចំណតផែរណបពហុបំណង TS១១ របស់កំពង់ផែស្វយ័តភ្នំពេញ នៅថ្ងៃទី២៥ ខែមេសា ឆ្នាំ២០២២ នេះ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូន បានអះអាងថា គម្រោងអភិវឌ្ឍន៍ចំណតផែរណបពហុបំណង សម្រេចបានប្រមាណ ៨៥% ហើយគ្រោងបញ្ចប់ការសាងសង់អំឡុងខែមិថុនា ឆ្នាំ២០២២ នឹងដាក់ឱ្យបើកដំណើរការប្រើប្រាស់នៅដើមខែកក្កដាខាងមុខ។
ឯកឧត្តមទេសរដ្ឋមន្ត្រី ស៊ុន ចាន់ថុល បានបញ្ជាក់ថា ក្រោយបញ្ចប់ការអភិវឌ្ឍផែរណបនៅកំពង់ផែស្វយ័តភ្នំពេញ នឹងបន្តគម្រោងអភិវឌ្ឍកំពង់ផែរណប ៧ ទីតាំងទៀត មានដូចជានៅទន្លេបិទ នៅកោះរកា ព្រែកតាម៉ាក់ ឆ្លូង កំពង់ឆ្នាំង។
ចំណែកគម្រោងសាងសង់ស្តារព្រែកអូរអំបិលទៅដល់ខេត្តកែប តាមការសិក្សាជំហានដំបូងបញ្ជាក់ថា មានប្រវែង ១៦៨ គីឡូម៉ែត្រ។ ក្នុងប្រវែង ១៦៨ គីឡូម៉ែត្រ ប្រហែល ១១៥ គីឡូម៉ែត្រជាផ្លូវទឹកដែលអាចធ្វើដំណើរបានទាំងខែប្រាំងនិងវស្សា។
ក្រោយមានការឯកភាពពីប្រមុខរដ្ឋាភិបាល ក្រសួងសាធារណការនឹងសិក្សាបន្តទៀតលើផលប៉ះពាល់ដូចជាបរិស្ថាន ហេដ្ឋារចនាសម្ព័ន្ធ ផ្លូវ ស្ពាន ដើម្បីឱ្យគម្រោងនេះឈានទៅសម្រេចបាន។ នេះជាការបញ្ជាក់បន្ថែមរបស់ឯកឧត្តមស៊ុន ចាន់ថុល ។
ក្រៅពីអភិវឌ្ឍកំពង់ផែរណបទាំង ៧ កន្លែង ឯកឧត្តមទេសរដ្ឋមន្ត្រី ស៊ុន ចាន់ថុល បានបញ្ជាក់ថា រដ្ឋាភិបាលក៏មានគម្រោងអភិវឌ្ឍផែយុទ្ធសាស្ត្រនៅស្អាង នៅតាកែវ និងនៅកែប ដើម្បីជំរុញការអភិវឌ្ឍផ្លូវដឹកជញ្ជូនតាមផ្លូវគោក កាត់បន្ថយការប្រើប្រាស់ផ្លូវថ្នល់ដែលបង្កគ្រោះថ្នាក់ និងចំណេញពេលវេលា៕
