ភ្នំពេញ៖ ថ្លែងនៅក្នុងជំនួបជាមួយគណៈប្រតិភូសមាគមរោងចក្រកាត់ដេរនៅកម្ពុជា ហៅកាត់ GMAC កាលពីរសៀលថ្ងៃទី២១ ខែមេសា ឆ្នាំ២០២២កន្លងទៅឯកឧត្តម ប៉ាន សូរស័ក្ត រដ្ឋមន្ត្រីក្រសួងពាណិជ្ជកម្ម ចាត់ទុក GMAC ជាដៃគូដ៏សំខាន់របស់ក្រសួងពាណិជ្ជកម្ម ក៏ដូចជារដ្ឋាភិបាលកម្ពុជាក្នុងការជួយជំរុញកំណើនសេដ្ឋកិច្ច និងភាពប្រកួតប្រជែងរបស់កម្ពុជា​ក្នុង​វិស័យវាយនភណ្ឌកាត់ដេរ​សម្លៀកបំពាក់​ ផលិតស្បែកជើង ​ផលិតផលធ្វើដំណើរ និងកាបូប។

ឯកឧត្តម ប៉ាន សូរស័ក្តិ បានឱ្យដឹងថា ក្រសួងពាណិជ្ជកម្មបានជួយសម្រួលយ៉ាងច្រើនដល់ បរិយាកាសធុរកិច្ចនៅកម្ពុជា ​តាមរយៈការធ្វើកំណែទម្រង់ការផ្ដល់សេវាសាធារណៈ និង​ការដាក់​ឱ្យប្រើប្រាស់ប្រព័ន្ធស្វ័យប្រវត្តិកម្ម​ក្នុងការ​ផ្តល់​វិញ្ញាបនបត្រ​បញ្ជាក់​ដើមកំណើតទំនិញ ការ​ចុះបញ្ជីក្រុមហ៊ុន ព្រមទាំងការចុះបញ្ជីម៉ាក​ ឱ្យកាន់តែមានភាពងាយស្រួល មានតម្លាភាព និងប្រសិទ្ធភាពខ្ពស់។

ព្រមជាមួយគ្នានេះ ក្រសួងបានដឹកនាំចរចាបើកទីផ្សារបន្ថែមទៀត រួមមាន៖ កិច្ចព្រមព្រៀង​ពាណិជ្ជកម្ម​សេរីតំបន់ និងដៃគូសេដ្ឋកិច្ច​ និងកិច្ចព្រមព្រៀងពាណិជ្ជកម្មសេរីទ្វេភាគី ​កម្ពុជា-ចិន និងកម្ពុជា-កូរ៉េ ជាដើម។ បន្ថែមពីលើនេះ ក្រសួងបាននិងកំពុងសិក្សាលទ្ធភាពក្នុងការ​ចរចា​បង្កើត​កិច្ច​ព្រមព្រៀង​ពាណិជ្ជកម្មសេរីថ្មីៗបន្ថែមទៀត ជាមួយដៃគូពាណិជ្ជកម្មសំខាន់ៗផងដែរ។

លោកឧកញ៉ា គង់ សាង ប្រធាន GMAC បានឱ្យដឹងថា​គិត​ត្រឹមត្រី​មាសទី១ ឆ្នាំ២០២២នេះ ​វិស័យកាត់ដេរ​នៅរក្សាបានកំណើននៃការនាំចេញក្នុងអត្រា ២៥% ជាមួយ​ទឹក​ប្រាក់ចំនួនជាង ​៣ពាន់លានដុល្លារ ក្នុងនោះ​សម្លៀកបំពាក់​មាន​ចំនួនជាង ​២ពាន់លានដុល្លារ ស្បែក​ជើងជាង ​៤២០លានដុល្លារ​ និងផលិតផលធ្វើដំណើរ​ និងកាបូបមានចំនួនជាង ៤៦០​លានដុល្លារ ​ហើយផលិតផលវាយនភណ្ឌផ្សេងៗទៀត មានចំនួន ១២៨លានដុល្លារ។

តាមរយៈជំនួបខាងលើនេះ ឯកឧត្តមរដ្ឋមន្រ្តី និងលោកប្រធានសមាគម បានសម្តែងនូវការប្តេជ្ញាចិត្ត បន្តកិច្ចសហការល្អប្រសើរនេះ​ ដើម្បីចូលរួមអភិវឌ្ឍ និងប្រែក្លាយវិស័យវាយនភណ្ឌ ​កាត់ដេរ សម្លៀកបំពាក់ ផលិតស្បែកជើង​ ផលិតផលធ្វើដំណើរនិងកាបូបនៅកម្ពុជា ឱ្យក្លាយ​ទៅ​ជា​មជ្ឈមណ្ឌល​ឧត្តមភាព​ នៃ​ឧស្សាហកម្មកាត់ដេរ ​នៅអាស៊ីអាគ្នេយ៍៕