តាមមន្ត្រីប៉ូលិសបានបង្ហើបប្រាប់អ្នកសារព័ត៌មានក្នុងស្រុកនៅថ្ងៃសៅរ៍នេះថា ហៃសូ Por និង Robert រងការចោទប្រកាន់ចំនួន២ករណីទៀតក្នុងសំណុំរឿងការស្លាប់តារាស្រី Tang Mo នោះគឺ ការផ្ដល់ចម្លើយមិនពិត និង ការបំផ្លាញភស្តុតាង។ ហេតុការណ៍នេះបានកើតឡើងបន្ទាប់ពីប៉ូលិសបានសាកសួរអ្នកទាំង២តាមការកោះហៅឱ្យមកផ្តល់ចម្លើយ ខណៈការកោះហៅផ្តល់ចម្លើយម្ដងទៀតនឹងប្រព្រឹត្តទៅនៅសប្តាហ៍ក្រោយ។
ក្នុងករណីសំណុំរឿងនេះ តាមប្រភពដដែលបានឱ្យដឹងទៀតថា ចំណែកជនសង្ស័យម្នាក់ទៀតគឺ Sand ត្រូវបានបើកការស៊ើបអង្កេត ខណៈតុលាការកំពុងបន្តនីតិវិធីដំណើរការក្ដី ដើម្បីចេញដីកាចាប់ខ្លួន Sand មួយរូបទៀត ដែលជាអ្នកនៅខាងក្រោយទូកជាមួយនឹង Tang mo មុនពេលនាងធ្លាក់ពីលើទូក ដោយចោទពីបទធ្វេសប្រហែសបណ្តាលឱ្យមនុស្សស្លាប់ ។
គួរបញ្ជាក់ផងដែរ តាមរយៈមេធាវី បានបង្ហើបថា ករណីរាយការណ៍ព័ត៌មានមិនពិតទៅមន្ត្រីណាម្នាក់ បើគ្មានចេតនា អាចបណ្តាលឱ្យខូចខាតដល់អ្នកដទៃ គឺជាបទល្មើសតាមមាត្រា ១៣៧ នៃក្រមព្រហ្មទណ្ឌ ដែលត្រូវផ្ដន្ទាទោសដាក់ពន្ធនាគារមិនលើសពី៦ខែ ឬពិន័យជាប្រាក់មិនលើសពី ១ម៉ឺនបាត ។ ប៉ុន្តែប្រសិនបើការរាយការណ៍ព័ត៌មានមិនពិតអំពីបទល្មើសដល់មន្ត្រីស៊ើបអង្កេត ដែលអាចបង្កការខូចខាតដល់អ្នកដ៏ទៃ ឬសាធារណជន នឹងជាបទល្មើសតាមមាត្រា ១៧២ នៃក្រមព្រហ្មទណ្ឌ ដែលនឹងត្រូវផ្តន្ទាទោសដាក់ពន្ធនាគារលើសពី ២ឆ្នាំ ឬពិន័យជាប្រាក់មិនលើសពី៤ម៉ឺនបាត។
ជាងនេះទៅទៀត បើជនណាដឹងថាមិនមានការប្រព្រឹត្តខុស ក្នុងករណីដែលផ្តល់ព័ត៌មានមិនពិតដល់មន្ត្រីស៊ើបសួរ ឬមន្ត្រីដែលមានសមត្ថកិច្ចស៊ើបអង្កេត ឬសំណុំរឿងព្រហ្មទណ្ឌ ដែលបទល្មើសបានកើតឡើងនោះ ទោសកាន់តែខ្ពស់ ដាក់ពន្ធនាគារ លើសពី ៣ឆ្នាំ និងពិន័យជាប្រាក់មិនលើសពី ៦ម៉ឺនបាត៕
ប្រភព៖ daradaily
