ខេត្តបាត់ដំបង៖ ពលករខ្មែរ ២២៥នាក់ ត្រូវបានភាគីថៃបានបញ្ជូនមកស្រុកខ្មែរវិញ នៅថ្ងៃអាទិត្យ ទី២៣ ខែមករា ឆ្នាំ២០២២នេះ។ ពលករខ្មែរទាំងនេះ មកតាមច្រកតំបន់អូរអន្លក់ ស្ថិតក្នុងភូមិអូរអន្លក់ ឃុំតាសែន ស្រុកកំរៀង ខេត្តបាត់ដំបង។
បើតាមរបាយការណ៍របស់អាជ្ញាធរ បានឱ្យដឹងថា ក្នុងចំណោមពលករ ២២៥នាក់នោះ មានស្រី ៨០នាក់ ក្មេង ៤១នាក់ (ក្មេងស្រី ២០នាក់)។ អាជ្ញាធរបានអប់រំណែនាំពួកគេអំពីវិធានការការពារការឆ្លងជំងឺកូវីដ -១៩ កត់ឈ្មោះ និងចុះកំណត់ហេតុ ព្រមទាំងធ្វើតេស្តកូវីដ-១៩។ ជាលទ្ធផល អវិជ្ជមានកូវីដ-១៩ ទាំងអស់។ របាយការណ៍ដដែល បញ្ជាក់ថា ពលករចំនួន ៤៥នាក់(ស្រី១៧នាក់) ក្មេង៤នាក់(ស្រី១នាក់) ត្រូវបានបញ្ជូនទៅធ្វើចត្តាឡីស័កនៅមណ្ឌលគីឡូ៩ ស្រុកសំពៅលូន។ ចំពោះពលករដែលមានកាតចាក់វ៉ាក់សាំង ចំនួន ១៨០នាក់ (ស្រី៦៣នាក់) ក្មេង ៣៧នាក់(ក្មេងស្រី១៩នាក់) ត្រូវបានក្រុមគ្រូពេទ្យអនុញ្ញាតឱ្យត្រឡប់ទៅស្រុកកំណើតរៀងៗខ្លួនវិញ៕
