(រាជធានីភ្នំពេញ)៖ ថ្ងៃសៅរ៍ទី២៥ ខែធ្នូ ឆ្នាំ២០២១ ក្រុមការងារអាជ្ញាធរទន្លេសាប និងមន្ទីរធនធានទឹក និងឧតុនិយមខេត្តទាំង៦ ជុំវិញបឹងទន្លេសាប បានសហការជាមួយអាជ្ញាធរមូលដ្ឋាន ចុះធ្វើការស្រាវជ្រាវចំនួនបង្គោលនៅទីតាំង ដែលបានបាត់ និងលិចក្នុងទឹក ក៏ដូចជាការបោះផ្ទាំងប៉ាណូផ្សព្វផ្សាយពីតំបន់គ្រប់គ្រងដោយរដ្ឋ [ក្នុងតំបន់៣] ដែលគិតមកដល់ថ្ងៃទី២៣ ខែធ្នូ ឆ្នាំ២០២១ សម្រេចបានការបោះបង្គោលព្រំតំបន់៣ ជិត៤០០បង្គោល និងលើកផ្ទាំងប៉ាណូ បានចំនួន២៨ទីតាំង…។
ក្រុមការងារអន្តរក្រសួង បានចុះពិនិត្យទីតាំងបង្គោលចំនួន ៦៧៤ លើ ៨០២បង្គោល ស្មើនឹង៨៤%នៃផែនការមេ(យោងអនុក្រឹត្យលេខ១៩៧) ដែលដាក់ឱ្យចុះតាមដានពិនិត្យស្រាវជ្រាវលើទីតាំងជាក់ស្តែងនៃបណ្តាខេត្តទាំង៦ជុំវិញបឹងទន្លេសាប។ ទន្ទឹមនោះ ក្រុមការងារ បានលាបថ្នាំលើក្បាលបង្គោល បាញ់ថ្នាំបញ្ជាក់ទីតាំង[តំបន់៣]នៅតាមបង្គោលនិមួយៗ លើកតម្រង់បង្គោល និងដាំបង្គោលថ្មី បានចំនួន ៣៧៣ ស្មើនឹង ៤៦,៥%នៃបង្គោលសរុបផងដែរ។ ចំនួនបង្គោលដែលបានចុះពិនិត្យដល់ទីតាំងផ្ទាល់ បានបាត់ និងលិចក្នុងទឹកមានចំនួន៣០១បង្គោល ស្មើនឹង ៣៧,៥% នៃបង្គោលសរុប។ ចំពោះបង្គោលទាំងនេះ ក្រុមការងារអន្តរក្រសួង និងអាជ្ញាធរមូលដ្ឋានកំពុងដាំជាបណ្តេីរៗហើយ រីឯបង្គោលមួយចំនួនទៀតនឹងបន្តដាំនៅពេលទឹកស្រក។
សូមបញ្ជាក់ផងដែរថា យោងតាមរបាយការណ៍ ចេញផ្សាយដោយក្រសួងធនធានទឹក និងឧតុនិយម ដែលជាផ្នែកមួយនៃក្រុមការងារអន្តរក្រសួង បានឱ្យដឹងថា បង្គោលព្រំដែលក្រុមការងារកំពុងបន្តចុះត្រួតពិនិត្យបន្ថែមមានចំនួន១២៨បង្គោល ស្មើនឹង១៦,០% នៃបង្គោលសរុប។ ជាមួយគ្នានោះ ក្រុមការងារ បានលើកផ្ទាំងប៉ាណូសម្រេចបានចំនួន២៨ទីតាំង លើផែនការសរុបមានចំនួន៥២ទីតាំងផងដែរ៕
