«រយៈពេលមួយឆ្នាំដែលដំរី ខាវ៉ាន់ រស់នៅក្នុងជម្រកថ្មីដែលកម្ពុជាបានផ្តល់ឱ្យ។ ខាវ៉ាន់មានភាពប្លែកខុសពីមកដំបូង។ដំរីខាវ៉ាន់បានប្រែប្រួលពណ៌សម្បុរ ដូចជាដំរីរស់ក្នុងធម្មជាតិវិញ មានឃើញដុះរោមថ្មីនៅលើខ្នង ក្រចកលែងសូវរិចរិល និងមានឃើញលូតលាស់គល់ក្រចក មានដុះភ្លុករាងវែងបន្តិច រាងកាយមានភាពមាំមួនជាងមុន និងរូបរាងមានការប្រែប្រួល។ ចរិតរបស់ដំរីខាវ៉ាន់មានការប្រែប្រួលខ្លាំង គឺមានភាពស្ងៀមស្ងាត់ និងស៊ាំនឹងមនុស្ស មិនតប់ប្រមល់ និងគួរឱ្យស្រឡាញ់។ ពេលវាស៊ីចំណី ស៊ីដោយរីករាយ និង យកចំណីពីដៃមនុស្សដោយមនោសញ្ចេតនា»។ នេះជាការថ្លែងរៀបរាប់របស់ឯកឧត្តម នេត្រ ភក្ត្រា អ្នកនាំពាក្យក្រសួងបរិស្ថាន។
អ្នកនាំពាក្យរូបនេះ សម្តែងក្តីសប្បាយរីករាយយ៉ាងខ្លាំងចំពោះការ វិវឌ្ឍសុខភាព អត្តចរិតដ៏ល្អរបស់ដំរីខាវ៉ាន់នេះ។
សត្វដំរីខាវ៉ាន់បានដឹកមកដល់កម្ពុជា កាលពីថ្ងៃទី៣០ ខែវិច្ឆិកា ឆ្នាំ២០២០ កន្លងទៅ ក្រោយដំរីនេះរស់នៅក្នុងសួនសត្វនៃប្រទេសប៉ាគីស្ថានរាប់ឆ្នាំ។ ដំរីខាវ៉ាន់កំពុងរស់នៅក្នុងតំបន់អភិរក្សសត្វដំរី ក្នុងដែនជម្រកសត្វព្រៃគូលែនព្រហ្មទេព ស្ថិតក្នុងភូមិសាស្ត្រខេត្ត ឧត្តរមានជ័យ ដែលក្រសួងបរិស្ថានបានអនុញ្ញាតដល់អង្គការដែនជម្រកសត្វព្រៃកម្ពុជាចូលរួមការពារនិងអភិរក្សព្រៃឈើនិងសត្វព្រៃតំបន់នោះ។ បច្ចុប្បន្ននេះ ដំរីខាវ៉ាន់មានអាយុ ៣៦ ឆ្នាំហើយ។ វាត្រូវបានបន្តបន្ស៊ាំនឹងការរស់នៅក្នុងព្រៃធម្មជាតិក្នុងទំហំ ១២ ហិកតា ហើយនៅក្នុងតំបន់នោះ មានសត្វដំរីស្រុកញីចំនួន ៣ ក្បាល ដែលដំរីខាវ៉ាន់ បានធ្វើការទាក់ទងក្នុងពេលនេះ។ ទាំងនេះបានធ្វើឱ្យខាវ៉ាន់ដំរីដ៏ឯកោលែងឯកោទៀតហើយ។ អង្គការដែនជម្រកសត្វព្រៃកម្ពុជាបានយកចិត្ត ទុកដាក់ខ្ពស់ក្នុងការថែរក្សាសត្វដំរីខាវ៉ាន់ និងសត្វដំរីផ្សេងទៀត រួមនឹងសត្វព្រៃនានាក្នុងតំបន់អភិរក្សនោះ៕
ពី Neth Pheaktra សម្រួលផ្សាយដោយ៖ Sao San
ខាងក្រោមជារូបភាពពេលដែល ដំរីខាវ៉ាន់ បានមកដល់កម្ពុជាដំបូង កាលពីថ្ងៃទី៣០ ខែវិច្ឆិកា ឆ្នាំ២០២០ កន្លងទៅ
