Lisa គឺជាតារាចម្រៀង K-Pop ល្បីមួយរូបមានដើមកំណើតជាជនជាតិថៃ ដែលជាសមាជិកក្រុមចម្រៀង BLACKPINK ។ ទម្រាំមានអ្នកគាំទ្រ សាងភាពល្បីល្បាញឈានដល់ដំណាក់នេះ មិនមែនជារឿងងាយស្រួលឡើយសម្រាប់រូបនាង។

ខាងក្រោមនេះ គឺជាដំណើរជីវិតខ្លះៗរបស់ Lisa ព្រមទាំងព្យុះភ្លៀងមួយចំនួនដែលនាងជួបប្រទះកន្លងមក៖

១. Lalisa Manoban ជាសមាជិកកូនពៅប្រចាំក្រុម BLACKPINK មានឈ្មោះដើម Pranpriya Manoban កើតនៅថ្ងៃទី២៧ ខែមីនា ឆ្នាំ១៩៩៧ កម្ពស់១៦៧​ សង់ទីម៉ែត្រ។ 

២. ទាំង​រូបរាង​ស្រស់​ស្អាត រាំ​ឡូយ និង​ច្រៀង​ពីរោះ​ Lisa ​អាច​និយាយ​បានរហូតដល់៥ ភាសាមានដូចជា ​​ភាសា​​ថៃ ជាភាសាកំណើតរបស់នាង ភាសា​អង់គ្លេស កូរ៉េ ​ជប៉ុន​ និងចិន។

៣. ថ្វីដ្បិតតែមានឈាមជ័រជនជាតិថៃ១០០ភាគរយមែនពិតតែ Lisa មានឪពុកចិញ្ចឹមសញ្ជាតិ​ស្វីស ​មួយ​រូប​​ឈ្មោះ​ថា Marco Brueschweiler ដែលជាមេ​ចុងភៅ​ដ៏​ល្បី។

៤. ហេតុតែចង់បំពេញក្ដីស្រមៃជាតារាល្បីមួយរូប Lisa បាន​ចុះ​ឈ្មោះ​ចូលរួម​​កម្មវិធី​ប្រកួត​រាំ និង​ច្រៀង​ជា​ច្រើនថែមទាំងទទួលបានចំណាត់ថ្នាក់លេខ១ច្រើនគួរសម ហើយក្លាយជាមុខមាត់តំណាងសាលារបស់ខ្លួនទៀត។ 

៥. សមិទ្ធផល ភាពជោគជ័យនៃការខំប្រឹងកន្លងមក Lisa បានបោះជំហានមួយកម្រិតទៀតដោយ បាន​ចុះ​ឈ្មោះ​ចូលរួម​ប្រកួត​ចូល​ផលិតកម្ម​យក្ស YG របស់កូរ៉េ ដែលប្រព្រឹត្តិទៅនៅ​ប្រទេស​ថៃ ​កាល​ពី​ឆ្នាំ២០១០។ ហើយ​នាង​គឺ​ជា​បេក្ខជន​មួយ​រូប​គត់​ដែល​ត្រូវ​បាន​ជ្រើសរើសក្នុងចំណោម បេក្ខជនជាច្រើនពាន់នាក់។ 

៦. តារា​ចម្រៀង​ស្រី​រូប​នេះបាន​ហ្វឹកហាត់​ក្រោម​ផលិតកម្ម​YGអស់​រយៈ ពេល ៥​ឆ្នាំ និង ៣ខែ រហូត​បាន​ក្លាយ​ជា​សមាជិក​ BLACKPINK ក្នុង​ឆ្នាំ២០១៦។

៧. អ្វីដែលកាន់តែធ្វើឱ្យមហាជនបើកភ្នែកធំៗនោះគឺក្រោយ​សម្រេច​ចិត្ត​ចុះ​កុងត្រា​ជាមួយ​ផលិតកម្ម YG ក្នុង​ឆ្នាំ ២០១៣ តារា​ចម្រៀង​រូប​នេះ បាន​ទទួល​យក​ចំណុច​មួយ ដោយ​មិន​ទទួល​យក​ការ​វះ កាត់​កែ​សម្ផស្ស​ជា​ដាច់​ខាត។ 

៨. មុនបង្ហាញខ្លួនក្នុងក្រុម BLACKPINK ជាផ្លូវការ Lisa បាន​បង្ហាញ​វត្តមាន​ក្នុង​វីដេអូ​បទ "Ringa Linga” របស់​តារា​ចម្រៀង Taeyang ​អម​ជាមួយ​តារា​ចម្រៀង Bobby. BI និង Minho។

៩. ​Lisa បាន​ក្លាយ​ជា​មិត្ត​ល្អ​ជាមួយ​តារា​ចម្រៀង Bambam សមាជិក​ GOT7 និង Ten សមាជិក​ក្រុម NCT ដែល​កាល​នោះ ពួកគេ​បាន​ចូលរួម​កម្មវិធី​ប្រកួត "We Zaa Cool” ជាមួយ​គ្នា។ ក្រៅ​ពី​តារា​ប៉ុន្មាន​រូប​​នេះ Lisa ក៏​ជិត​ស្និទ្ធ​ជាមួយ​តារា​ចម្រៀង Sorn (សមាជិក​ CLC) និង Minnie សមាជិក          (G) I-DLE) ជាដើម។

១០. ក្រោយទន្ទឹងរង់ចាំអស់រយៈពេលយ៉ាងយូរពីអ្នកគាំទ្រ ទីបំផុត Lisa បានចេញអាល់ប៊ុមទោល លើកដំបូងរបស់ខ្លួនមានចំណងជើងថា “Lalisa” ចេញផ្សាយថ្ងៃទី១០ ខែកញ្ញា ឆ្នាំ២០២១ ហើយការចេញបទចម្រៀងទោលនេះ Lisa បានបំបែកកំណត់ត្រាជាច្រើននៅក្នុងដៃ។

ទន្ទឹងនឹងភាពជោគជ័យ បានផ្លែផ្កាដល់បច្ចុប្បន្ននេះ Lisa ក៏ជួបប្រទះភាពជូរចត់ច្រើនគួរសមដែរ។

- ត្រឹមវ័យ១៤ឆ្នាំ នាងបានចាកចេញពីគ្រួសារមានជីវភាពធូរធាក្នុងប្រទេសថៃទៅកាន់ ប្រទេសកូរ៉េ ខាងត្បូងដើម្បីធ្វើជាអ្នកហ្វឹកហាត់នៅក្នុងផលិតកម្ម YG ដែលមិនមែនជាភាពងាយស្រួល សម្រាប់ក្មេងស្រីក្នុងវ័យនេះទេ ខណៈនៅក្នុងក្រុមហ៊ុនក៏មានច្បាប់តឹងរឹងដែរ។

- ពេលហ្វឹកហាត់ Lisa ជួបប្រទះមួយទៀតនោះគឹការប្រើប្រាស់់ ភាសា។ ដោយសារតែផលិតកម្មចង់ ឱ្យ Lisa ឆាប់ចេះនិយាយភាសាកូរ៉េតម្រូវឱ្យអ្នកនៅទីនោះនិយាយកូរ៉េ ជាមួយ Lisa ទាំងអស់គ្នាមិន ព្រមឱ្យប្រើប្រាស់ភាសាអង់គ្លេសឡើយ។ តែក៏សំណាងដែរព្រោះ នៅពេលនោះសមាជិករួមក្រុមគឺ Jisoo បានជួយបង្ហាត់បង្រៀនទើបនាងអាចនិយាយភាសាកូរ៉េបានឆាប់។

- Lisa ក្លាយជាបុគ្គលមួយរូបត្រូវគេរើសអើងជាតិសាសន៍កើត​ចេញពី​កំហឹង​របស់​អ្នក​ប្រើអ៊ីនធើណិត ​អន្តរជាតិ ដោយសារតែនាងជាតារា K-Pop មានដើមកំណើតថៃ ហើយមនុស្សមួយក្រុមក្នុងប្រទេស ចិនបានប្តូររូប Profile និង​ឈ្មោះ​ ហើយ​និយាយចំអកមើលងាយ​យ៉ាង​ចាស់ដៃពីរូបរាង​របស់ Lisa ថាជា “Ladyboy” ឬ “ប្រុសតែងខ្លួនដូចស្រី” រហូតអ្នក​គាំទ្រ​ BLACKPINK ជាច្រើន​បាន​បង្ហោះ​ Hashtag #RespectLisa ពាសពេញពិភពលោកឈាន​ដល់​ Trending លេខ ៣​ទូទាំងពិភពលោក និងលេខ១ នៅក្នុងប្រទេសថៃផងដែរ។ 

- ចំណុចមួយទៀតនោះគឺផលិតកម្ម​ YG បាន​ចេញ​សេចក្ដី​ប្រកាស​ថា​ អតីត​អ្នក​គ្រប់​គ្រងរបស់​ Lisa ដែល​បាន​បំផ្លាញសេចក្ដី​ទុក​ចិត្ត​ បោក​យកលុយ​អស់​ជាង​ ១ពាន់លានវ៉ុន (ប្រមាណ ៨១៧ ៦៦១ ដុល្លារ)៕

សូមទស្សនាវីដេអូខាងក្រោម៖

ប្រភព៖ Kprofiles