(ខេត្តកំពង់ចាម)៖ អ្នកភូមិស្វាយពោធិ៍ ឃុំស្វាយពោធិ៍ ស្រុកស្រីសន្ធរ បានរាយការណ៍ថា ក្នុងមូលដ្ឋានដែលពួកគាត់រស់នៅ មានអ្នកចូលរួមលេងល្បែងស៊ីសងយ៉ាងពពាក់ពពូនមិនខ្លាចឆ្លងជំងឺកូវីដ-១៩ ដែលកំពុងរាលដាលយ៉ាងពេញបន្ទុក។

ប្រភពពីប្រជាពលរដ្ឋបន្តថា មានការបើកសង្វៀនបញ្ជល់មាន់ និងវង់អាប៉ោង ក្នុងមូលដ្ឋានពួកគាត់ យ៉ាងរលូន ដោយមិនទាន់ឃើញ មន្រ្តីអាជ្ញាធរ និងសមត្ថកិច្ចមូលដ្ឋានចាត់វិធានការទប់ស្កាត់នៅឡើយទេ។ 

ជាមួយគ្នានេះ ប្រជាពលរដ្ឋចោទថា ករណីប្រមូលផ្តុំគ្នាប្រព្រឹត្តល្បែងស៊ីសងខុសច្បាប់ ប្រព្រឹត្តទៅយ៉ាងរលូន គឺដោយសារតែមានការបើកដៃពីនាយប៉ុស្តិ៍នគរបាលរដ្ឋបាលឃុំស្វាយពោធិ៍​ និងលោក សុខ យ៉េន អធិការនគរបាលស្រុកស្រីសន្ធរ។ ពលរដ្ឋខាងលើបន្តថា បើគ្មានការបើកដៃពីសំណាក់មន្រ្តីអាជ្ញាធរ និងសមត្ថកិច្ចមូលដ្ឋានទេនោះ ល្បែងស៊ីសងខុសច្បាប់ក្នុងឃុំស្វាយពោធិ៍ និងបណ្តាឃុំដទៃទៀត ក៏មិនអាចកើតឡើងទេ។

អង្គភាពសារព័ត៌មាន SBM News មិនទាន់ទាក់ទងសុំការបំភ្លឺពី លោក សុខ យ៉េន អធិការនគរបាលស្រុកស្រីសន្ធរ បាននៅឡើយទេ ដោយ​ទូរសព្ទខលមិនចូល។

ទាក់ទិនករណីប្រមូលផ្តុំប្រព្រឹត្តល្បែងសុីសងនេះ លោក ជា ធារិទ្ធ ស្នងការរងដឹកនាំអធិការដ្ឋាននគរបាលស្រុកស្រីសន្ធរ ប្រាប់មកកាន់អង្គភាពសារព័ត៌មាន SBM News តាមទូរសព្ទថា លោកពុំទាន់បានទទួលព័ត៌មាននេះនៅឡើយទេ ប៉ុន្តែលោកថា នឹងជំនាញ(មន្ត្រីជំនាញ)ធ្វើការស្រាវជ្រាវ ហើយបើសិនជារកឃើញករណីបែបនេះមែន លោកថានឹងចាត់ការតាមផ្លូវច្បាប់៕