ជាការបាត់បង់ដ៏ធំធេងមួយសម្រាប់ក្រុមគ្រួសារ អង្គការ ហ្វាពន្លឺសិល្បៈ ក៏ព្រោះតែលោក ស្រី បណ្ដូលសហស្ថាបនិកអង្គការ ហ្វាពន្លឺសិល្បៈ ជាអង្គការមួយជួយដល់កុមារកំព្រា និងផ្ដល់ចំណេះជំនាញដល់មនុស្សជាច្រើនពាន់នាក់នោះ បានទទួលមរណៈ.ភាព នៅល្ងាចថ្ងៃទី០៤ ខែសីហា ឆ្នាំ២០២១ ដោយសារជំងឺ កូវីដ-១៩។ មរណភាពរបស់លោកបានធ្វើឱ្យរំជើបរំជួលដល់ដួងចិត្តមហាជនក្នុងនិងក្រៅប្រទេស រហូតដល់មានការដាក់តាំងរូបបង្ហាញពីការកាន់ទុក្ខដល់រូបលោកយ៉ាងផុរផុលពេញបណ្ដាញទំនាក់ទំនងសង្គម។ តើលោកមានប្រវត្តិកំណើតបែបណា? ហើយតើ ហ្វាពន្លឺសិល្បៈ មានចំណែកជួយដល់សង្គមបែបណាខ្លះ ទើបលោកទទួលបានការអាណិតស្រឡាញ់ពីមហាជនខ្លាំងបែបនេះ?
ប្រវត្តិសង្ខេបរបស់លោក ស្រី បណ្ដូល និងការកកើត ហ្វាពន្លឺសិល្បៈ
លោក ស្រី បណ្ដូល កើតនៅឆ្នាំ ១៩៧៣ នៅខេត្តបាត់ដំបងភាគពាយ័ព្យនៃប្រទេសកម្ពុជាក្នុងគ្រួសារមួយដែលមានសមាជិក ១០ នាក់។ លោក បណ្ដូល បានចំណាយពេលភាគច្រើនក្នុងវ័យជំទង់នៅក្នុងជំរុំជនភៀសខ្លួនសាយធូ នៅព្រំដែនកម្ពុជា-ថៃ។
នៅទីនោះលោកទទួលបានការបណ្តុះបណ្តាលសិល្បៈជាមូលដ្ឋានក្នុងទម្រង់ជាថ្នាក់គំនូរដែលដឹកនាំដោយអ្នកស្ម័គ្រចិត្តមនុស្សធម៌ជនជាតិបារាំង ឈ្មោះ Véronique Decrop ពីឆ្នាំ១៩៨៧ ដល់ឆ្នាំ១៩៩២។
ដោយចេញពីការស្រឡាញ់និងចូលចិត្តសិល្បៈ និងការលើកទឹកចិត្តពីអ្នកគ្រូរបស់លោក លោកនិងមិត្តភក្តិរបស់លោកបានសម្រេចចិត្តថា នឹងបើកកន្លែងមួយដើម្បីឲ្យកុមារមានឱកាសបានរៀនគូរគំនូរដូចពួកគាត់។ ក្រុមរបស់លោកបង្កើតអង្គការហ្វារពន្លឺសិល្បៈនៅក្នុងខេត្តបាត់ដំបងនៅចុងឆ្នាំ១៩៩៤។ អង្គការនេះបានចាប់ផ្តើមដំណើរការនៅឆ្នាំ១៩៩៥។ អង្គការនេះបានជួយកុមារដែលមានការលំបាកនៅក្នុងជីវិតឲ្យបានរៀនសូត្រ មានការងារធ្វើ និងបានផ្តល់ឱកាសឲ្យកុមារក្រីក្រ កុមារដែលរងគ្រោះពីការរំលោភបំពាន អំពើកេងប្រវ័ញ្ច អំពើហិង្សាក្នុងគ្រួសារនិងតាមផ្លូវ និងកុមារដែលមានការប្រឡូកនឹងគ្រឿងញៀនឲ្យបានចូលរៀនផងដែរ។
ចាប់តាំងពីឆ្នាំ១៩៩៤ មក អង្គការហ្វារបានរៀបរៀងកម្មវិធីសិក្សារបស់ខ្លួននានា និងថែមទាំងបានពង្រីកខ្លួនទៅខេត្តសៀមរាបនៅឆ្នាំ២០១៣។ សិស្សក្នុងសាលានេះអាចជ្រើសរើសជំនាញសិល្បៈដូចជា គូរគំនូរ គំនូរជីវចល សូនរូប តន្ត្រី របាំ សៀក និងសិល្បៈផ្នែកកាយសម្ព័ន្ធផ្សេងៗទៀត។ ហើយទន្ទឹមនឹងនេះដែរ ពួកគេអាចបន្តការសិក្សាចំណេះដឹងទូទៅរបស់ពួកគេបានទៀតផង។
ក្នុងស្មារតីជួយជាតិមាតុភូមិប្រកបដោយគុណធម៌មិនគិតពិការហត់នឿយនេះហើយ ទើបលោក ស្រី បណ្ដូល ទទួលបានការឱ្យតម្លៃនិងគោរពស្រឡាញ់ពីមហាជនទាំងជាតិនិងអន្តរជាតិ ហើយការបាត់បង់រូបលោកយ៉ាងឆាប់រហ័សបែបនេះ គឺជាការបាត់បង់ធនធានមនុស្សដ៏កម្រគួរឱ្យសោកសង្រេងជាទីបំផុត។
គួរបញ្ជាក់ថា យោងតាមការប្រកាសពី អនុគណៈកម្មការស្រាវជ្រាវជំងឺកូវីដ១៩ បានឱ្យដឹងថា “លោក សាស្ត្រាចារ្យ ស្រី បណ្ដូល សហស្ថាបនិក របស់អង្គការ #ហ្វាពន្លឺសិល្បៈ (Phare Ponleu Selpak) បានទទួលមរ.ណៈភាពនៅល្ងាចថ្ងៃទី ៤ ខែសីហា ឆ្នាំ២០២១ ដោយសារជំងឺ #កូវីដ-១៩។ យើងខ្ញុំពិតជាមានសេចក្ដីសោកស្ដាយយ៉ាងខ្លាំង ចំពោះការបាត់បង់លោកសាស្ត្រាចារ្យ និងសូមចូលរួមរំលែកទុក្ខយ៉ាងក្រៀមក្រំ ជាមួយគ្រួសាររបស់លោកសាស្រ្តាចារ្យ។ សូមវិញ្ញាណក្ខន្ធរបស់លោកបានទៅកាន់សុគតិភព - រូបំ អនិច្ចំ ទុក្ខំ អនត្តា”៕
ប្រភព៖ mutualart
