បុរសនារីមួយចំនួនមានការមិនពេញចិត្តជាខ្លាំងជាមួយនឹងគីឡូរបស់ខ្លួនដែលស្គមពេក មិនសមាមាត្រជាមួយនឹងកម្ពស់ ព្រោះពេលស្លៀកពាក់អ្វីទៅគឺមិនសមចិត្តខ្លួន ហើយក៏ទើសភ្នែកអ្នកដទៃទៀតផង។ ពេលដែលចេញដើរទៅណាមកណា ឮតែពាក្យបង្អាប់ថា ស្គមដូចកុក ឬប្រយ័ត្តខ្យល់បក់រលំជាដើម។ ប៉ុន្តែ បញ្ហាធំស្ថិតនៅត្រង់ថា បើទោះបីជាពួកគេខិតខំញ៉ាំអាហារ ឬប៉ូវបំប៉នខ្លួនយ៉ាងណាក៏មិនទទួលបានលទ្ធផលល្អគាប់ តាមចិត្តចង់បានសោះ។ ឈប់បារម្ភទៀតទៅ សូមធ្វើការទទួលទាននូវប្រភេទអាហារទាំងនេះដើម្បីទទួលបានដំណោះស្រាយដ៏ល្អមួយ៖
ផ្លែប៊័រ៖ តាមការស្រាវជ្រាវបានឱ្យដឹងថា ផ្លែប៊័រត្រឹមតែមួយចំហៀងផ្លែមានកាឡូរីដល់ទៅ ១៤០កាឡូរី ហើយវាក៏ជាប្រភពនៃជាតិរ៉ែ ហ្វូលិកអាស៊ីត វីតាមីន និងប៉ូតាស្យូមផងដែរ។
សាច់ក្រហម៖ សាច់ក្រហមគឺស្ថិតនៅក្នុងក្រុមអាហារសាងសង់ ដែលសម្បូរទៅដោយប្រូតេអ៊ីន ជាតិដែក និងកូឡេស្តូរ៉ូលខ្ពស់ដែលអាចធ្វើឱ្យទម្ងន់របស់អ្នកកើនឡើងយ៉ាងងាយ។
ទឹកដោះគោស្រស់៖ ទឹកដោះគោស្រស់ក្នុងន័យនេះ គឺជាទឹកដោះគោសុទ្ធ មិនមែនជាទឹកដោះគោដែលគេចម្រាញ់យកជាតិក្រែមចេញរួចនោះទេ។ វាមានផ្ទុក វីតាមីន និងសារធាតុចិញ្ចឹមជាច្រើនមុខ ហើយក៏ជាគ្រឿងជួយឱ្យឡើងគីឡូបានយ៉ាងមានប្រិសិទ្ធភាពផងដែរ។
ធញ្ញជាតិ ៖ គ្រាន់ធញ្ញជាតិផ្សេងៗដូចជា សណ្តែកដី កៅឡាក់ ស្វាយចន្ទី និងគ្រាប់ធញ្ញជាតិចម្រុះផ្សេងៗទៀតគឺមានផ្ទុកទៅដោយ ជាតិខ្លាញ់ សារធាតុចិញ្ចឹម និងជាតិសរសៃ ដែលធ្វើឱ្យប្រព័ន្ធរំលាយអាហារដំណើរការល្អ ជួយសម្រួលដល់សរីរាង្គផ្សេងៗឱ្យឆាប់ចាប់យកសារធាតុចិញ្ចឹមបានរហ័សជាងមុនផងដែរ។
ក្រៅពីនោះ លោកអ្នកក៏អាចទទួលទានបាននូវប្រភេទផ្លែឈើស្រស់ រួមជាមួយនឹងអាហារដែលសម្បូរទៅដោយជាតិកាឡូរីខ្ពស់ ដូចជាសាច់ជាប់ខ្លាញ់ជាដើម។ ប៉ុន្តែ ចូរចាំថាលោកពុំគួរបរិភោគតាមចិត្តតែអារម្មណ៍ពុះកញ្ជ្រោលនោះឡើយ ព្រោះថាការបរិភោគច្រើនពេក ឬអាហារច្រើនមុខពេកក្នុងពេលតែមួយក៏អាចធ្វើឱ្យប្រព័ន្ធរំលាយអាហារមានបញ្ហាផងដែរ៕
ប្រភព៖ https://www.healthline.com/nutrition/18-foods-to-gain-weight
ដោយ៖ ភូមិន្ទ
