ជារឿងអៀនខ្មាសមួយ ចំពោះមនុស្សមួយចំនួនធំ នៅពេលដែលខ្លួនមានជំងឺឫសដូងបាត។ តើអ្នកដឹងទេ អ្វីទៅជាជំងឺឫសដូងបាត? ក្នុងអត្ថបទនេះពួកយើងនឹងពន្យល់លោកអ្នកពីព័ត៌មានមួយចំនួនពីជំងឺនេះដែលអ្នកគួរតែដឹង។
១- តើអ្វីទៅជាជំងឺឫសដូងបាត?
ឫសដូងបាត គឺជាជំងឺដែលកើតឡើងដោយសារការរីកប៉ោងនៃសរសៃឈាមវ៉ែន ដែលមាននៅជុំវិញក្រសាល់គូទ ។ ប៉ុន្តែជំងឺឫសដូងបាតនេះមិនអាចវិវត្តន៍ទៅជាជំងឺមហារីកបានទេ ។ គេបែងចែកជំងឺឫសដូងបាតជា២ប្រភេទគឺ៖
-ឫសដូងបាតក្នុង ៖ ជាជំងឺដែលកើតឡើងលើសរសៃឈាមខាងក្នុងរន្ធគូទ
-ឫសដូងបាតក្រៅ ៖ ជាជំងឺដែលកើតឡើងលើសរសៃឈាមនៅខាងក្រៅរន្ធគូទ
២- តើជំងឺនេះមានរោគសញ្ញាដូចម្ដេច?
ថ្វីបើរោគសញ្ញាជំងឺឫសដូងបាតអាចខុសគ្នាបន្តិចបន្តួចតាមប្រភេទរបស់វាក៏ពិតមែនប៉ុន្តែវាមានរោគសញ្ញាចម្បងដូចគ្នាមួយចំនួនដូចជា៖
- រមាស់ខ្លាំងនៅជុំវិញរន្ធក្រសាល់គូទ
- ឈឺចាប់និងក្រហាយនៅម្ដុំក្រសាល់គូទ
- រមាស់ឬមានចេញជាដុំពកឬហើមនៅម្ដុំក្រសាល់រន្ធគូទ
- ឈឺចាប់នៅពេលបន្ទោរបង់លាមក
- អាចមានចេញឈាមក្រោយបន្ទោរបង់លាមក
- លេចលាមកចេញមកក្រៅដោយមិនដឹងខ្លួន
ថ្វីបើជំងឺនេះ អាចបង្កឲ្យឈឺចាប់ខ្លាំងក៏ពិតមែនប៉ុន្តែវាមិនអាចបង្កឲ្យមានគ្រោះថ្នាក់ដល់ជីវិតនោះទេ។
ប្រសិនបើអ្នកសង្កេតឃើញមានឈាម ឬលាមកអ្នកប្រែជាពណ៌ខ្មៅ អ្នកគួរតែទៅជួបពិគ្រោះជាមួយគ្រូពេទ្យ។
៣- តើមូលហេតុអ្វីនាំឲ្យមានជំងឺឫសដូងបាត?
ជំងឺឫសដូងបាត គឺបង្កឡើងដោយបញ្ហានឹងស្ថានភាពសុខភាពរបស់មនុស្សដូចជា៖
- ការមានផ្ទៃពោះ (ជំងឺឫសដូងបាតចំពោះស្ត្រីមានផ្ទៃពោះ គឺជារឿងសាមញ្ញចំពោះស្ត្រីទាំងឡាយ ដោយសារតែអំឡុងពេលពពោះនោះ ស្បូនរបស់ស្ត្រីរីកធំ ហើយសង្កត់ទៅលើសរសៃវ៉ែនរបស់ពោះវៀនធំ)
- បញ្ហាទល់លាមករ៉ាំរ៉ៃ
- មនុស្សវ័យចំណាស់
- បញ្ហារាករ៉ាំរ៉ៃ
- ការអង្គុយយូរពេក ជាពិសេសគឺអង្គុយលើចានបង្គន់យូរ។
- លើករបស់ធ្ងន់
- ធាត់លើសទំងន់
- ប្រវត្តិគ្រួសារធ្លាប់មានជំងឺនេះ។
៤- តើអ្នកអាចការពារខ្លួនពីជំងឺនេះដោយរបៀបណា?
អ្នកអាចការពារខ្លួនពីជំងឺនេះបានដោយគ្រាន់តែអ្នកត្រូវញ៉ាំអាហារណាដែលអាចជួយឲ្យលាមកអ្នកទន់ និងងាយបន្ទោរបង់ចេញមក។ ដើម្បីការពារពីជំងឺនិងរោគសញ្ញាជំងឺឫសដូងបាត អ្នកគួរធ្វើតាមការណែនាំដូចខាងក្រោម៖
- ញ៉ាំអាហារដែលមានជាតិសរសៃច្រើន
- ញ៉ាំទឹកឲ្យបានគ្រប់គ្រាន់
- សូមទៅបន្ទោរបង់ឲ្យលឿននៅពេលដែលអ្នកឈឺបន្ទោរបង់ សូមកុំទប់ឲ្យសោះ
- ហាត់ប្រាណឲ្យបានច្រើន និងចៀសវាងការអង្គុយនៅមួយកន្លែងយូរ។
៥- តើជំងឺនេះព្យាបាលបានយ៉ាងដូចម្ដេច?
ការព្យាបាលជំងឺនេះ គ្រូពេទ្យអាចនឹងណែនាំឲ្យអ្នកព្យាបាលដោយខ្លួនឯងបានដោយធ្វើតាមវីធីសាស្ត្រការពារខ្លួនខាងលើ ប្រើប្រាស់ថ្នាំលាបដែលយើងអាចរកទិញបានដោយមិនចាំបាច់វេជ្ជបញ្ជា (OTC) ញ៉ាំថ្នាំបំបាត់ការឈឺចាប់ និងងូតទឹកដោយត្រាំខ្លួននៅក្នុងទឹកក្ដៅឧណ្ឌៗរយៈពេលពី១០ទៅ១៥នាទីបាន (sitz bath)។ ប្រសិនបើការព្យាបាលនៅផ្ទះដោយខ្លួនឯងនេះ មិនបានធូរស្បើយទេ គ្រូពេទ្យអាចនឹងប្រើប្រាស់វិធីសាស្ត្រព្យបាលមួយចំនួនទៀត ឬអាចឈានដល់ការវះកាត់ទៀតផង៕
អត្ថបទដោយ៖ គឹម កាណែល ចុះផ្សាយដោយ៖ ភូមិន្ទ
Reference
https://www.mayoclinic.org/diseases-conditions/hemorrhoids/diagnosis-treatment/drc-20360280
https://www.healthline.com/health/hemorrhoids#prevention
https://www.medicalnewstoday.com/articles/73938#symptoms
https://www.webmd.com/digestive-disorders/understanding-hemorrhoids-basics#1
