ក្រុងប៉ោយប៉ែត៖ អាជ្ញាធរកម្ពុជា បានធ្វើការបណ្ដេញទណ្ឌិតជនជាតិថៃចំនួន ១៩៧នាក់ ចេញពីប្រទេសកម្ពុជា និងបញ្ជូនត្រឡប់ទៅប្រទេសកំណើតវិញ តាមច្រកទ្វារព្រំដែនអន្តរជាតិប៉ោយប៉ែត បន្ទាប់ពីពួកគេអនុវត្តទោសជាប់ពន្ធនាគាររួចរាល់ ពាក់ព័ន្ធនឹងបទល្មើសឆបោកតាមប្រព័ន្ធអ៊ីនធឺណិត (Online Scam)...។

ប្រតិបត្តិការបណ្ដេញចេញនេះ ត្រូវបានធ្វើឡើងនារសៀលថ្ងៃទី០៨ ខែតុលា ឆ្នាំ២០២៦  ក្រោមកិច្ចសហការរវាងអគ្គនាយកដ្ឋានអន្តោប្រវេសន៍នៃក្រសួងមហាផ្ទៃកម្ពុជា ជាមួយអាជ្ញាធរពាក់ព័ន្ធនៃព្រះរាជាណាចក្រថៃ។ ទណ្ឌិតប្រុសស្រីទាំង១៩៧នាក់នេះ ត្រូវបានប្រគល់ជូនសមត្ថកិច្ចថៃ ដើម្បីចាត់វិធានការបន្តតាមនីតិវិធីច្បាប់ ក្រោយពួកគេបានអនុវត្តសទោសរួច(ជាប់ពន្ធនាគារ) ដែលប្រព្រឹត្តិបទល្មើសនៅក្នុងខេត្តសៀមរាប កាលពីពេលកន្លងទៅ។ បន្ថែមលើនេះ ទណ្ឌិតជនជាតិថៃ១៩៧នាក់ ត្រូវបានបិតទិដ្ឋាការមិនឱ្យចូលមកកម្ពុជាវិញ មានរយៈពេល៣ទៅ៥ឆ្នាំ។ 

ជាមួយគ្នាផងដែរ នៅរសៀលថ្ងៃដដែលនោះ អាជ្ញាធរថៃ ក៏បានប្រគល់ និងបញ្ជូនពលករខ្មែរចំនួន៩៦នាក់ ដែលបានចូលទៅធ្វើការដោយខុសច្បាប់នៅក្នុងប្រទេសថៃ ត្រឡប់មកឱ្យអាជ្ញាធរកម្ពុជាវិញ តាមច្រកទ្វារព្រំដែនអន្តរជាតិប៉ោយប៉ែត-ខ្លងលឹក។ពលករខ្មែរទាំងនោះ ត្រូវបានសមត្ថកិច្ចថៃឃាត់ខ្លួនជាបន្តបន្ទាប់ នៅតាមបណ្តាខេត្តនានាក្នុងប្រទេសថៃ ដោយសារគ្មានលិខិតឆ្លងដែន គ្មានទិដ្ឋាការការងារ ឬលើសទិដ្ឋាការកំណត់។ បន្ទាប់ពីបានអនុវត្តនីតិវិធីរដ្ឋបាល និងធ្វើកំណត់ហេតុរួចរាល់ ភាគីថៃក៏បានបញ្ជូនពួកគេត្រឡប់ប្រទេសកំណើតខ្លួនវិញ ដូចគ្នា៕ រាយការណ៍ដោយ៖ ឈុន មករា