កីឡា៖ លទ្ធផលចាប់ឆ្នោតផ្លូវការនៅរសៀលថ្ងៃអង្គារនេះ សម្រាប់វគ្គចែកពូលពានរង្វាន់ AFC Champions League Two រដូវកាល ២០២៦-២០២៧ ចេញជាផ្លូវការហើយ ដោយក្រុមបាល់ទាត់ព្រះខ័នរាជ្យស្វាយរៀង ស្ថិតនៅពូល G ជាមួយក្រុម Machida Zelvia (ជប៉ុន), Shanghai Shenhua (ចិន) និង Tampines Rovers (សិង្ហបុរី) ខណ:ក្រុមបាល់ទាត់ភ្នំពេញក្រោន ស្ថិតនៅពូល H ជាមួយក្រុម Gangwon FC (កូរ៉េ​ខាង​ត្បូង), Kitchee (ហុងកុង) និង Kuching City (ម៉ាឡេស៊ី)។

ការប្រកួតវគ្គសន្សំពិន្ទុក្នុងពូល នឹងចាប់ផ្ដើមពីថ្ងៃទី១៦ ខែកញ្ញា ដល់ថ្ងៃទី៣ ខែធ្នូ ឆ្នាំ២០២៦ ដោយធ្វើប្រកួតវិលជុំទាំងក្នុងដី និងក្រៅដីនៃក្រុមនីមួយៗ។ បន្ទាប់ពីចាត់ថ្នាក់រួច ក្រុមមានពិន្ទុលេខ១ និងលេខ២នៃពូលនីមួយៗ នឹងទទួលបានកៅអីឡើងទៅវគ្គ៨ក្រុមចុងក្រោយ។ គួរបញ្ជាក់ថា ចាប់ពីវគ្គ១៦ក្រុមនៃវគ្គសន្សំពិន្ទ រហូតដល់វគ្គពាក់កណ្ដាលផ្ដាច់ព្រ័ត្រ សុទ្ធតែត្រូវប្រកួត២ជើងទាំងអស់ លើកលែងតែវគ្គផ្ដាច់ព្រ័ត្រមួយគត់ ដែលត្រូវប្រកួតតែ១ជើងប៉ុណ្ណោះ។ ដោយឡែក សម្រាប់រដូវកាល ២០២៦-២០២៧ នេះ ការប្រកួតវគ្គផ្ដាច់ព្រ័ត្រ នឹងត្រូវធ្វើឡើងនៅតំបន់អាស៊ីខាងកើត។

គួររម្លឹកផងដែរថា ក្លិបតំណាងកម្ពុជាទាំងពីរ សុទ្ធតែមានបទពិសោធលើឆាកអន្តរជាតិយ៉ាងក្រាសក្រែល។ ភ្នំពេញក្រោន ធ្លាប់ចូលរួមប្រកួតពានរង្វាន់ AFC (កម្រិតចាស់) វគ្គចែកពូលបាន៣ដង (ឆ្នាំ២០១៧, ២០២២ និង២០២៣-២៤) ដោយធ្លាប់បង្កើតប្រវត្តិសាស្ត្រឡើងដល់វគ្គពាក់កណ្ដាលផ្ដាច់ព្រ័ត្រប្រចាំតំបន់អាស៊ីអាគ្នេយ៍ នារដូវកាល ២០២៣-២៤។ រីឯក្រុមព្រះខ័នរាជ្យស្វាយរៀង ធ្លាប់លេងវគ្គចែកពូល AFC Cup ក្នុងឆ្នាំ២០២០ ហើយកាលពីរដូវកាល ២០២៤-២០២៥ និង ២០២៥-២០២៦ ពួកគេបានបង្កើតស្នាដៃដ៏គួរឱ្យភ្ញាក់មួយគឺទម្លុះរនាំងដល់វគ្គផ្ដាច់ព្រ័ត្រ ពានរង្វាន់កម្រិតទី៣ អាស៊ី (AFC Challenge League) ប៉ុន្តែទទួលបានត្រឹមជើងឯករងទាំងពីររដូវកាល៕