សុខភាព៖ ការទល់លាមក រំខានដល់សុខភាពទាំងផ្លូវកាយ និងផ្លូវអារម្មណ៍។ ការទល់លាមកនេះ អាចមានអ្នកជំងឺខ្លះគិតថា គ្រាន់តែជារឿងធម្មតាប៉ុណ្ណោះ ការគិតបែបនេះខុសហើយ ពេលខ្លះត្រូវទាមទារការពិគ្រោះ និងពិនិត្យរុករកឫសគល់ ដែលបង្កឱ្យមានជាជំងឺនេះកើតឡើង។ នេះបើយោងតាមការចុះផ្សាយក្នុងផេកផ្លូវការរបស់មន្ទីរពេទ្យកាល់ម៉ែត…។
មូលហេតុអាចបង្កឱ្យមានបញ្ហាទល់លាមក រួមមាន៖ ការបាត់បង់តុល្យភាពនៃមេរោគល្អ ការពិបាកចិត្ត ការគិតច្រើន និងខ្វះលំហាត់ប្រាណ។ បរិភោគអាហារគ្មានជាតិសរសៃហ្វៃប័រ ទទួលទានទឹកដោះគោច្រើនពេក ទទួលទានស្ករច្រើន និងពិសាទឹកមិនបានគ្រប់គ្រាន់។ លើសពីនេះ ដោយសារការប្រើថ្នាំមានផ្ទុកជាតិកាល់ស្យូម ជាតិដែក និងថ្នាំពេទ្យមួយចំនួនទៀត។ ផលវិបាកនៃជំងឺទល់លាមក អាចបណ្ដាលឱ្យទៅជាបញ្ហាខ្សោយពោះវៀនធំ និងប្រឈមមុខទៅនឹងជំងឺមហារីកពោះវៀនធំ។ មួយវិញទៀត អាចឱ្យមានការដាច់រហែកភ្នាសរបស់បាត និងបង្កជាការធ្លាក់ឈាម និងមានការឈឺចាប់ពេលបន្ទោរបង់ និងបង្កទៅជាជំងឺឫសដូងបាត។ បើសិនជាមានបញ្ហាដូចបានរៀបរាប់ខាងលើ ត្រូវមកពិគ្រោះ និងពិនិត្យព្យាបាលជាមួយវេជ្ជបណ្ឌិតឯកទេសជំនាញ ដើម្បីបង្កាភាពធ្ងន់ធ្ងរ និងគ្រោះថ្នាក់ដល់អាយុជីវិត។
គួរដឹងថា អាហារដោះស្រាយបញ្ហាទល់លាមក មានដូចជា៖ ១.ពោតលីង (Popcorn)៖ ពោតលីង ជាអាហារដែលផ្ដល់សុខភាព និងងាយស្រួលទទួលបានសារធាតុសរសៃ បើសិនជាអត់ដាក់អំបិល ឬប័រចូល។ គ្រាប់ពោត ជាគ្រាប់ធញ្ញជាតិអាចការពារ ឬកាត់បន្ថយបញ្ហាទល់លាមក បើព្យាយាមបរិភោគឱ្យបានច្រើន។ ២.ផ្លែសារី ផ្លែផ្លាំ និងផ្លែប៉ោម៖ ផ្លែឈើ៣មុខនេះ មានជាតិសរសៃផ្តល់ទៅរាងកាយស្រដៀងគ្នាចន្លោះពី៥-៦ក្រាម ក្នុងមួយផ្លែ។ ក្រៅពីនេះ ពពួកផ្លែប៊្លែកបឺរី ឬផ្លែស្ត្រប់បឺរី ក៏សម្បូរដោយជាតិសរសៃដែរ។ ៣.ផ្លែគីវី៖ ផ្លែគីវី មានជាតិស្ករទាបណាស់ ធ្វើឱ្យកាត់បន្ថយការហើមពោះ។ លើសពីនេះ មានជាតិសរសៃ និងមានជីវជាតិល្អៗសម្រាប់សុខភាពផ្សេងទៀត ដូចជាវីតាមីន C ជាដើម។
៤.ដំឡូងជ្វា៖ ដំឡូងមានសារធាតុសរសៃខ្ពស់ ប៉ុន្តែភាគច្រើនស្ថិតនៅលើសម្បក។ ដំឡូងជ្វាស្ងោរជាមួយសម្បកទំហំល្មមមួយ អាចផ្ដល់ឱ្យសារធាតុសរសៃដល់ទៅ៣,៨ក្រាម។ ដំឡូងផ្សេងទៀតក៏ល្អដែរ សម្រាប់បញ្ហាទល់លាមក ដោយដំឡូងតូចល្មម អាចមានជាតិសរសៃដល់ទៅ៣ក្រាម។ ៥.គ្រាប់សណ្ដែក៖ សណ្ដែកស្ថិតនៅក្នុងក្រុមអាហារដែលមានជាតិសរសៃខ្ពស់បំផុត។ នៅពេលទទួលទាន សណ្ដែកមួយពែង នឹងអាចទទួលបានជាតិសរសៃរហូតដល់ទៅ១០ក្រាម។ ប្រភេទសណ្ដែកទាំងនោះ មានដូចជា សណ្ដែកសៀង សណ្ដែកក្រហម សណ្ដែកហ្គាបានហ្ស៊ូ (Garbanzo beans) សណ្ដែកលីម៉ា ឬសណ្ដែកពីនតូ៕
