សុខភាព៖ ជំងឺសួតឡើងរឹង (Lung Consolidation) កើតឡើងនៅពេលដែលខ្យល់បំពេញសួត ត្រូវជំនួសដោយសារធាតុផ្សេង។ កត្តាដែលបង្កឱ្យកើតជំងឺនេះមាន៥យ៉ាង ដូចខាងក្រោមនេះ...។
ជំងឺសួតឡើងរឹង កើតទ្បើងដោយសារ ទី១.ឈាមហូរក្នុងសួត៖ កើតមានពេលសួតមានឈាមហូរ។ បើយោងតាមឯកសារស្ដីពីជំងឺរបេង និងជំងឺផ្លូវដង្ហើម ការហូរឈាមនេះ ភាគច្រើនបង្កឡើងពីការរលាកសរសៃឈាម អាចធ្វើឱ្យសរសៃឈាមអ្នកជំងឺ ងាយជ្រាប។ ២.ឈ្លក់សួត៖ កើតឡើងពេលដកដង្ហើមចូលហើយមានកម្ទេចអាហារធ្លាក់ចូលទៅក្នុងសួត និងពេលច្រាលចូលទៅអាចបង្កជាជំងឺរលាកសួត។ ៣.ជំងឺរលាកសួត៖ ជាជំងឺដែលច្រើនបង្កទៅជាសួតឡើងរឹងជាងគេ។ នៅពេលមានការបង្ករោគក្នុងសួតរាងកាយរបស់យើងនឹងបញ្ជូនកោសិកាឈាម-ស ទៅសម្លាប់ពួកមេរោគ។ កោសិកាដែលស្លាប់ទាំងនោះ នឹងបង្កើតបានជាខ្ទុះហើយអាចកកស្ទះក្នុងសួត។
លើសពីនេះ ជំងឺរលាកសួតអាចបង្កឡើងពីវីរុស និងបាក់តេរី ហើយក៏អាចបង្កមកពីផ្សិត និងមីក្រូសរីរាង្គផ្សេងទៀតដែរ។ ៤.មហារីកសួត៖ ជំងឺកាចសាហាវនេះ ឧស្សាហ៍ជួបប្រទះណាស់ ហើយបើតាមសមាគមមហារីកសហរដ្ឋអាម៉េរិក មហារីកសួត ឆក់យកជីវិតមនុស្សច្រើនជាង ជំងឺមហារីកក្រពេញប្រូស្តាត មហារីកពោះវៀនធំ និងមហារីកសុដន់ បូកចូលគ្នាទៅទៀត។ ៥.ជំងឺហើមសួត៖ ជំងឺខ្សោយបេះដូង គឺជាមូលហេតុ បង្កឱ្យមានអាការហើមសួតច្រើនជាងគេ។ នៅពេលបេះដូង មិនអាចច្របាច់ឈាមចេញអស់ទេ ឈាមនឹងចាល់ត្រឡប់ទៅសរសៃឈាមក្នុងសួត ជាហេតុនាំឱ្យមានសម្ពាធកាន់តែធំ ទៅកាន់បំពង់ខ្យល់។ មួយវិញទៀត នៅពេលយើងឈ្លក់ទឹក ក៏អាចហើមសួតដែរ ដោយសារតែទឹកចូលក្នុងសួត។
ចំណែករោគសញ្ញាវិញ មានដូចជា៖ ក្ដៅខ្លួន បែកញើសពេលយប់ កណ្ដាស់ និងចង់ផុតដង្ហើមម្ដងៗ ព្រមទាំងពិបាកដកដង្ហើមកាន់តែខ្លាំងឡើង អាស្រ័យលើភាពធ្ងន់ធ្ងររបស់ជំងឺ។ អស់កម្លាំងល្ហិតល្ហៃ និងធ្ងន់ទ្រូង ហើយមានការឈឺចាប់។ ដង្ហើមញាប់កើតឡើងពេលចង្វាក់ដង្ហើមកើនឡើង បែកញើសច្រើន និងពិបាកក្នុងការនិយាយ។ ក្អកខ្លាំង និងចេញស្លេស្មច្រើន ឮសំឡេងពេលដកដង្ហើម និងមុខស្លេកស្លាំង ឬស្វាយមុខ ។ល៕ដកស្រង់ពី៖ ហេទ្បូគ្រូពេទ្យ
