រាជធានីភ្នំពេញ៖ លោក ថោ ជេដ្ឋា រដ្ឋមន្រ្តីក្រសួងធនធានទឹក និងឧតុនិយម រួមទាំងលោក អ៊ុន ចាន់ដា អភិបាលខេត្តកំពង់ចាម រងការរិះគន់ព្រមៗគ្នា បន្ទាប់ពីលោកទាំង២ ប្រើភាសាដែលគេស្តាប់ទៅហាក់ដូចជាមិនសូវសមរម្យទៅលើអ្នកកាសែត។ រដ្ឋមន្រ្តីធនធាន បា​នហៅអ្នកកាសែតថា «ពួកអ្នកកាសែតខូចណាស់...» ហើយភ្លាមៗ អភិបាលខេត្តកំពង់ចាមដែលឈរអមក្បែរនោះ ក៏បន្ទរតាមក្រោយថា «ទាល់តែដាក់វ៉ៃខ្នោះមួយពីរទៅ បានដឹងខ្លួន»។ នៅថ្ងៃទី៣០ ខែមិថុនា ឆ្នាំ២០២៦ ទាំងក្រសួងធនធានទឹក ទាំងរដ្ឋបាលខេត្តកំពងចាម សុទ្ធតែចេញមកបកស្រាយ ដើម្បីការពារប្រសាសន៍ថ្នាក់ដឹកនាំខ្លួន។ 

តាមរយៈសេចក្ដីប្រកាសព័ត៌មាន ក្រសួងធនធានទឹក បកស្រាយថា ពាក្យរបស់លោករដ្ឋមន្ត្រី គឺលោកចង់សំដៅលើបុគ្គលអ្នកកសែតមួយចំនួនតូចប៉ុណ្ណោះ ដែលបានចុះផ្សាយដោយពុំបានធ្វើការវិនិច្ឆ័យឱ្យបានគ្រប់ជ្រុងជ្រោយ និងតម្លាភាព។ ក្រសួងបន្តថា លោករដ្ឋមន្រ្តី មិនបានដាក់បន្ទុកទៅលើអ្នកសារព័ត៌មានដែលអនុវត្តការងារស្របតាមក្រមសីលធម៌វិជ្ជាជីវៈឡើយ។

សូមជម្រាបត្រង់កន្លែងនេះបន្តិចថា លោក ថោ ជេដ្ឋា និងលោក អ៊ុន ចាន់ដា រួមគ្នាចុះទៅពិនិត្យ និងសិក្សាជួសជុលច្រាំងទន្លេបាក់ស្រុត ក្នុងក្រុងកំពង់ចាម កាលពីថ្ងៃទី២៩ ខែមិថុនា (ទំនងជាអ្នកកាសែត ធ្លាប់ថត និងផ្សាយពីអ្វីមួយពាក់ព័ន្ធនឹងកន្លែងបាក់ច្រាំងទន្លេនេះ)។ ពេលនោះ លោក ថោ ជេដ្ឋា និយាយថា «ពួកអ្នកកាសែតហ្នឹងខូចណាស់...កន្លែងណាឱ្យច្បាប់ហើយ ក៏ថតបង្ហោះដែរ»។ បន្ទាប់មក លោក អ៊ុន ចាន់ដា ក៏បន្ថែមតាមក្រោយថា «ទាល់តែដាក់ខ្នោះមួយពីរទៅ បានដឹងខ្លួន»។

វីដេអូខ្លីអំពីការឆ្លើយឆ្លងរវាងលោក ថោ ជេដ្ឋា និងលោក អ៊ុន ចាន់ដា ត្រូវបានគេយកទៅបង្ហោះលើបណ្តាញសង្គម ហើយក៏ផ្ទុះការរិះគន់តែម្តង។ ចំណែករដ្ឋបាលខេត្តកំពង់ចាម តាមរយៈសេចក្តីប្រកាសព័ត៌មានរបស់ខ្លួន បានបង្ហាញការសោកស្តាយចំពោះសំឡេងសន្ទនាខាងលើ ហើយអះអាងថា ជាសារសំឡេងដែលមិនមានប្រភពច្បាស់លាស់ ធ្វើឱ្យមានការយល់ច្រឡំ និងប៉ះពាល់ដល់អ្នកប្រកបវិជ្ជាជីវៈសារព័ត៌មានទូទៅ៕