រាជធានីភ្នំពេញ៖ ក្រសួងសុខាភិបាល នៅថ្ងៃទី២៦ ខែមិថុនា ឆ្នាំ២០២៦ បានប្រកាសពីការរកឃើញផលិតផលគ្រឿងសម្អាងចំនួន៥មុខ ដែលមានផ្ទុកសារធាតុគីមី បារត មើខ្យួរី (Mercury) និង អាស៊ីតសាលីស៊ីលិច (Salicylic Acid) លើសកម្រិតបទដ្ឋានស្ដង់ដារ បន្ទាប់ពីនាយកដ្ឋានឱសថ ចំណីអាហារ បរិក្ខារពេទ្យ និងគ្រឿងសម្អាង បានទិញសំណាកពីទីផ្សារ និងបញ្ជូនទៅវិភាគគុណភាពនៅមជ្ឈមណ្ឌលជាតិពិសោធន៍សុខាភិបាល។

តាមលទ្ធផលវិភាគ ផលិតផលចំនួន៤មុខ មានផ្ទុកសារធាតុបារតលើសកម្រិតស្ដង់ដារ ខណៈផលិតផល១មុខទៀត មានផ្ទុកទាំងសារធាតុបារត និងអាស៊ីតសាលីស៊ីលិចលើសកម្រិតស្ដង់ដារ។ ផលិតផលទាំងនោះរួមមាន៖ N-QUEEN Glow White Lotion, OG Cosmetics Anti Acne & Whitening Night Cream, KissMe Vitamin Plus Premium Night Cream, Bliss Night Cream, និង Na Sar Clarity Advance Night Cream។ ក្រសួងសុខាភិបាលបានបញ្ជាក់ថា សារធាតុបារតអាចបង្កផលប៉ះពាល់ធ្ងន់ធ្ងរដល់សុខភាពដូចជា៖ ខូចតម្រងនោម ប៉ះពាល់ប្រព័ន្ធប្រសាទ និងបង្កហានិភ័យមហារីកស្បែក។ ចំណែកសារធាតុ អាស៊ីតសាលីស៊ីលិច បើមានលើសកម្រិតស្ដង់ដារ អាចបណ្ដាលឱ្យខូចរបាំងការពារស្បែក ស្បែកស្ងួតខ្លាំង របកស្បែក និងរលាកស្បែក។

ជាមួយគ្នានេះ ក្រសួងបានអះអាងថា ផលិតផលគ្រឿងសម្អាងទាំង៥មុខខាងលើ ពុំបានចុះបញ្ជីកាពីក្រសួងសុខាភិបាលឡើយ។ ក្រសួងបានអំពាវនាវដល់ប្រជាពលរដ្ឋ និងអាជីវករ ឱ្យបញ្ឈប់ការចែកចាយ និងប្រើប្រាស់ផលិតផលទាំងនេះ ហើយមុននឹងទិញគ្រឿងសម្អាងគ្រប់ប្រភេទ ត្រូវពិនិត្យឱ្យបានច្បាស់ថា ផលិតផលមានលេខបញ្ជីកាទទួលស្គាល់ពីក្រសួងសុខាភិបាល ដើម្បីធានាសុវត្ថិភាព គុណភាព និងប្រសិទ្ធភាពក្នុងការប្រើប្រាស់៕