ក្រុងសៀមរាប៖ ការលបលួចបរបាញ់ និងដាក់អន្ទាក់សត្វព្រៃក្នុងតំបន់រមណីយដ្ឋានអង្គរ បន្តកើតមាន គ្រាន់តែសកម្មភាពនេះតិចតួចជាងមុន តែទោះជាយ៉ាងណា មន្រ្តីអាជ្ញាធរជាតិអប្សរា នៅថ្ងៃ២៩ឧសភានេះ បានចេញមកបង្ហាញពីក្តីបារម្ភ ចំពោះសកម្មភាពលួចដាក់អន្ទាក់ និងបរបាញ់ដែលបាននិងកំពុងកើតមាននាពេលនេះ...។
លោក ជូរ៉ា ឌីណា អនុប្រធាននាយកដ្ឋានគ្រប់គ្រងទឹក-ព្រៃឈើ និងហេដ្ឋារចនាសម្ព័ន្ធ នៃអាជ្ញាធរជាតិអប្សរា គូសបញ្ជាក់ថា ការថែរក្សាសត្វព្រៃ គឺមានសារសំខាន់ខ្លាំងណាស់ សម្រាប់លើកតម្លៃសម្បត្តិបេតិកភណ្ឌធម្មជាតិ និងជីវចម្រុះក្នុងតំបន់អង្គរ ពោល គឺនៅពេលដែលអ្នកទេសចរមកទស្សនាកម្សាន្តប្រាង្គប្រាសាទអង្គរ ពួកគេអាចមើលឃើញប្រាសាទបុរាណផង និងបានឃើញសត្វព្រៃផង ដែលនេះបង្ហាញពីភាពសម្បូរបែបនៃធម្មជាតិនៅប្រទេសកម្ពុជា។ លោកបង្ហាញពីការព្រួយបារម្ភជាខ្លាំង ចំពោះសត្វព្រៃនៅតំបន់រមណីយដ្ឋានអង្គរនាពេលបច្ចុប្បន្ន ព្រោះបើទោះបីអាជ្ញាធរជាតិអប្សរា ខិតខំសហការជាមួយអង្គការគាំពារសត្វព្រៃកម្ពុជា ស្ថាប័នរដ្ឋបាលព្រៃឈើ និងនគរបាលការពារបេតិកភណ្ឌ ឱ្យធ្វើការតាមដាន និងថែរក្សាការពារជាប្រចាំយ៉ាងណាក៏ដោយ ក៏សកម្មភាពនៃការលួចដាក់អន្ទាក់របស់ព្រានព្រៃក្នុងតំបន់ នៅតែមាន។
ជាមួយគ្នា លោក នីក ម៉ាក (Nick Marx) អ្នកជំនាញរបស់អង្គការគាំពារសត្វព្រៃកម្ពុជា (CWC) និងជាទីប្រឹក្សាផ្នែកជីវចម្រុះរបស់អាជ្ញាធរជាតិអប្សរា បានឱ្យដឹងថា សត្វព្រៃ មានតួនាទីយ៉ាងសំខាន់ ក្នុងការនាំគ្រាប់ពូជនៃឈើនានា ឱ្យដុះក្លាយជាធម្មជាតិបៃតងដ៏សម្បូរបែបនៅក្នុងតំបន់រមណីដ្ឋានអង្គរ និងអាចទាក់ទាញអ្នកទេសចរជាច្រើន ឱ្យងាកមកចាប់អារម្មណ៍ចំពោះធម្មជាតិ។ លោកសូមអំពាវនាវដល់ពលរដ្ឋកម្ពុជាគ្រប់រូប សូមរួមគ្នាការពារសត្វព្រៃ និងព្រៃឈើ នៅក្នុងតំបន់អង្គរ ឱ្យបានគង់វង្ស។ មួយវិញទៀត កុំឱ្យចំណីដល់សត្វព្រៃ និងកុំទៅរំខានពួកវា ទុកឱ្យសត្វព្រៃទាំងនោះ បានរស់នៅក្នុងព្រៃតាមបែបធម្មជាតិ និងតាមទម្លាប់។ សូមជម្រាបថា បច្ចុប្បន្ននៅក្នុងព្រៃតំបន់អង្គរ មានសត្វរស់នៅជាច្រើនប្រភេទដូចជា៖ សត្វកេងកងតូច, សត្វកេងកងធំ, សត្វស្វាព្រាហ្មណ៍, សត្វភូវាំង, សត្វពង្រូល, សត្វទោចមកុដ, សត្វឈ្លូស, សំពោចក្រអូប, សត្វឆ្មាដាវ, សត្វក្ងោក, សត្វអន្សង, សត្វភេខ្លួនរលោង, និងសត្វកាំប្រមា ដែលទើបនឹងដោះលែងចូលព្រៃធម្មជាតិ កាលពីថ្មីៗ៕
