(ស្ទឹងត្រែង)៖ ក្នុងរយៈពេលពីរថ្ងៃ ពោលចាប់ពីថ្ងៃទី១៨ និងទី១៩ ខែសីហា ឆ្នាំ២០២២ កម្លាំងមន្ត្រីឧទ្យានុរក្សនៃមន្ទីរបរិស្ថានខេត្តស្ទឹងត្រែងបានចុះបង្ក្រាបបទល្មើសជួញដូរលក់សាច់សត្វព្រៃ នៅផ្សារសាមគ្គីក្រុងស្ទឹងត្រែង ដោយរឹបអូសបានសាច់ជ្រូកព្រៃចំនួន៥គីឡូក្រាម សាច់ឈ្លូសចំនួន១គីឡូក្រាម និងសត្វត្រកួតរស់ចំនួន០៣ក្បាល។
សាច់ជ្រូកព្រៃ និងសាច់ឈ្លូសសរុបចំនួន៦គីឡូក្រាម ក្រោយពីបង្រ្កាបបាន មន្ត្រីជំនាញបានយកទៅដុតកម្ទេចចោល។ ដោយឡែកសត្វត្រកួតរស់ចំនួន៣ក្បាល ត្រូវបានយកទៅលែងនៅស្រុកសេសាន ខេត្តស្ទឹងត្រែងដោយមានការចូលរួមពីឯកឧត្តម ជា សុភ័ក្ត្រ ព្រះរាជអាជ្ញារងអមសាលាដំបូងខេត្តស្ទឹងត្រែង លោក ស្រេង ជាហេង ប្រធានមន្ទីរបរិស្ថានខេត្តស្ទឹងត្រែង លោក សាយ កុសល អភិបាលក្រុងស្ទឹងត្រែង នុងដោយមានការចូលរួមពីមន្រ្តីឧទ្យានុរក្សផងដែរ។
ក្រសួងបរិស្ថានសូមអំពាវនាវដល់បងប្អូនប្រជាពលរដ្ឋមួយចំនួនបញ្ឈប់ការដាក់អន្ទាក់ និងការបរបាញ់សត្វព្រៃ និងសូមនិយាយថាទេចំពោះសាច់សត្វព្រៃ។ អ្នកដែលប្រព្រឹត្តល្មើស នឹងត្រូវប្រឈមមុខច្បាប់។ ជាពិសេសអំពាវនាវឲ្យពលរដ្ឋបញ្ឈប់ការបរិភោគសាច់សត្វព្រៃ និងបញ្ឈប់ការប្រើប្រាស់ផលិតផលសត្វព្រៃគ្រប់ប្រភេទ ដោយត្រូវនិយាយថា«ទេ»ចំពោះសាច់សត្វព្រៃ ហើយសូមចូលរួមក្នុងការការពារនិងអភិរក្សធនធានធម្មជាតិរបស់កម្ពុជាឱ្យស្ថិតនៅគង់វង្សដើម្បីជាប្រយោជន៍ដល់មនុស្សជំនាន់ក្រោយៗទៀត។
តាមមាត្រា៤៩ នៃច្បាប់ស្តីព្រៃឈើ បានឱ្យដឹងថាការយាយី ឬបំផ្លិចបំផ្លាញដល់ប្រភេទសត្វ និងជម្រករបស់សត្វ , ការបរបាញ់ ទាក់ចាប់ ដាក់អង្គុប បំពុល, ការយកធ្វើជាកម្មសិទ្ធិ សន្និធិ ឬថែរក្សាជាលក្ខណៈសួនសត្វ ឬគ្រួសារ,ការដឹកជញ្ជូន,ការធ្វើពាណិជ្ជកម្ម និងការនាំចេញ នាំចូល គឺជាទង្វើដែលក្រសួងកសិកម្ម រុក្ខាប្រមាញ់ និងនេសាទ និងក្រសួងបរិស្ថានបានហាមឃាត់។
ដោយឡែក ច្បាប់ស្ដីពីតំបន់ការពារធម្មជាតិមាត្រា ៥៩ ត្រង់ចំណុចកថាខណ្ឌទី៥ បានបញ្ជាក់ថា ការជួញដូរសត្វព្រៃ ធ្វើសំណាកសត្វព្រៃ និងការចិញ្ចឹមសត្វព្រៃគ្រប់ប្រភេទ ត្រូវទទួលការពិន័យលុយចាប់ពី ១លាន ដល់ ១០លានរៀល។ ក្នុងករណីមិនរាងចាល ត្រូវទទួលពិន័យអន្តរការណ៍មានតម្លៃទ្វេដង៕
