រាជធានីភ្នំពេញ៖ ក្នុងឱកាសកិច្ចប្រជុំរដ្ឋមន្ត្រីការបរទេសអាស៊ាន-សហភាពអឺរ៉ុប លើកទី២៥ នៅប្រទេសព្រុយណេ កាលពីថ្ងៃទី២៧ ខែមេសា ឆ្នាំ២០២៦ លោកឧបនាយករដ្ឋមន្ត្រីប្រាក់ សុខុន រដ្ឋមន្ត្រីការបរទេសកម្ពុជា មានជំនួបទ្វេភាគីជាមួយលោកឧបនាយករដ្ឋមន្ត្រី ផេថឺ ម៉ាស៊ីនកា (Petr Macinka) រដ្ឋមន្ត្រីការបរទេសនៃសាធារណរដ្ឋឆែក។

សេចក្តីប្រកាសព័ត៌មានរបស់ក្រសួងការបរទេសកម្ពុជា​ បានឱ្យដឹងថា ភាគីទាំងពីរបានប្តេជ្ញាចិត្តពង្រឹងកិច្ចសហប្រតិបត្តិការលើវិស័យសំខាន់ៗ ដូចជា៖ ពាណិជ្ជកម្ម វិនិយោគ អប់រំ សុខាភិបាល ទេសចរណ៍ ការផ្លាស់ប្តូរប្រជាជននិងប្រជាជន ក៏ដូចជាការបណ្តុះបណ្តាលមន្ត្រីការទូតវ័យក្មេង។ ជាមួយគ្នា លោករដ្ឋមន្ត្រីទាំងពីរ បានពិភាក្សាគ្នាពីការរៀបចំប្រារព្ធខួបលើកទី៧០ នៃការបង្កើតទំនាក់ទំនងការទូតរវាងប្រទេសទាំងពីរ។ បន្ថែមពីនេះ រដ្ឋមន្ត្រីការបរទេសទាំងពីរ បានឯកភាពគ្នាត្រៀមរៀបចំកិច្ចពិគ្រោះយោបល់ ដើម្បីជំរុញកិច្ចសហប្រតិបត្តិការលើការលើកលែងទិដ្ឋាការ វិស័យទេសចរណ៍ និងកសិកម្ម នៅរដ្ឋធានីប្រាក ប្រទេសឆែក នាពេលឆាប់ៗនេះ។

មិនមែនតែរដ្ឋមន្ត្រីការបរទេសឆែក លោកឧបនាយករដ្ឋមន្ត្រី ប្រាក់ សុខុន ក៏បានជួបពិភាក្សាជាមួយលោក វីវៀន បាឡាគ្រីស្នាន់ (Vivian Balakrishnan) រដ្ឋមន្ត្រីការបរទេសសិង្ហបុរី, លោក ហ្វ្ល័ររៀន ហាន (Florian Hahn) អនុរដ្ឋមន្ត្រីការបរទេសអាល្លឺម៉ង់ និងលោកឧបនាយករដ្ឋមន្ត្រី សីហស័ក្តិ ភួងកេតកែវ (Sihasak Phuangketkeow) រដ្ឋមន្ត្រីការបរទេសថៃ ជាដើម៕