រាជធានីភ្នំពេញ៖ ក្នុងជំនួបជាមួយ លោក អង់តូនីញ៉ូ ហ្គូតឺរ៉េស António Guterres អគ្គលេខាធិការអង្គការសហប្រជាជាតិ (UNSG) ក្នុងឱកាសសម័យប្រជុំលើកទី៨០ នៃមហាសន្និបាតអង្គការសហប្រជាជាតិ នៅទីក្រុងញូវយ៉ក លោកឧបនាយករដ្ឋមន្រ្តី ប្រាក់ សុខុន រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ បានស្នើដល់ UN បន្តគាំទ្រដោយការកាត់បន្ថយភាពតានតឹងក្នុងជម្លោះព្រំដែនកម្ពុជា-ថៃ ដែលមកទល់ពេលនេះ នៅមិនទាន់មានសញ្ញាធូរស្រាល…។

លោកឧបនាយករដ្ឋមន្រ្តី ប្រាក់ សុខុន បានគូសបញ្ជាក់ថា កម្ពុជានឹងបន្តខិតខំប្រឹងប្រែងបន្ថែមទៀត ដើម្បីកាត់បន្ថយភាពតានតឹង កសាងទំនុកចិត្តឡើងវិញ និងស្តារប្រក្រតីភាព ក្នុងទំនាក់ទំនងជាមួយប្រទេសថៃ។ ក្នុងនាមរាជរដ្ឋាភិបាលកម្ពុជា លោកបានអរគុណដល់អគ្គលេខាធិការអង្គការសហប្រជាជាតិ ដែលបានបន្តចូលរួមគាំទ្រដល់ការបន្ថយភាពតានតឹងក្នុងជម្លោះព្រំដែនកម្ពុជា-ថៃ ជាពិសេសតាមរយៈសេចក្តីថ្លែងការណ៍ជាវិជ្ជមាន ដែលអំពាវនាវឱ្យភាគីទាំងសងខាងឈប់ប្រើប្រាស់កម្លាំង។ យ៉ាងណាក៏ដោយ កម្ពុជាសូមស្នើឱ្យអង្គការសហប្រជាជាតិ បន្តប្រឹងប្រែងជួយលើបញ្ហាជម្លោះព្រំដែនកម្ពុជា-ថៃ បន្តទៀត។ លោក អង់តូនីញ៉ូ ហ្គូតឺរ៉េស បានសម្ដែងការកោតសរសើរចំពោះភាពជាដៃគូដ៏ល្អរវាងអង្គការសហប្រជាជាតិ និងកម្ពុជា។

ពាក់ព័ន្ធនឹងជម្លោះព្រំដែនកម្ពុជា-ថៃ លោក អង់តូនីញ៉ូ ហ្គូតឺរ៉េស អះអាងថា លោកបានប្រាប់ពីកង្វល់របស់កម្ពុជាទៅសមភាគីថៃហើយ ដោយលោកចង់បានដំណោះស្រាយចំពោះជម្លោះនេះ ព្រោះទីបញ្ចប់ប្រជាជនជាអ្នករងទុក្ខ។ លោកសង្ឃឹមថា ប្រទេសជិតខាងទាំងពីរ កម្ពុជា-ថៃ អាចដោះស្រាយបញ្ហាប្រឈមដោយសន្តិវិធី តាមរយៈការសន្ទនា និងការប្តេជ្ញាចិត្តទៅវិញទៅមក។ ជាការឆ្លើយតប លោកឧបនាយករដ្ឋមន្រ្តី ប្រាក់ សុខុន បញ្ជាក់ថា កម្ពុជាផ្តល់ទំនុកចិត្តយ៉ាងខ្លាំងចំពោះអង្គការសហប្រជាជាតិ ក្នុងការលើកកម្ពស់ពហុភាគីនិយម សណ្តាប់ធ្នាប់អន្តរជាតិ ដែលផ្អែកលើច្បាប់ ការគ្រប់គ្រង និងដោះស្រាយវិវាទដោយសន្តិវិធី ព្រមទាំងការគោរពគោលការណ៍នៃធម្មនុញ្ញអង្គការសហប្រជាជាតិ និងច្បាប់អន្តរជាតិ។ លោកសង្កត់ធ្ងន់ថា កម្ពុជាបានឆ្លងកាត់ និងយល់ច្បាស់ពីសង្គ្រាម ដូច្នេះ កម្ពុជាមិនប្រើអំណាចទៅបំពានប្រទេសណាមួយទេ ទោះប្រទេសនោះតូចជាងកម្ពុជាក៏ដោយ ព្រោះអ្វីដែលកម្ពុជាចង់បានគឺ «សន្តិភាព»៕