រាជធានីភ្នំពេញ៖ ស្ពានលេខ២៨ នៃគម្រោងសាងសង់ផ្លូវជាតិលេខ១០ ​ ដែលត្រូវបានគេស្គាល់ថា ស្ពានខ្ពស់ជាងគេនៅក្នុងប្រទេសកម្ពុជា ត្រូវបានសម្ដេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ប្រសិទ្ធនាមថា «ស្ពានតេជោសន្តិភាពឫស្សីជ្រុំ»…។

ការប្រសិទ្ធនាមស្ពានខ្ពស់ជាងគេ ជា «ស្ពានតេជោសន្តិភាពឫស្សីជ្រុំ» របស់ប្រមុខរាជរដ្ឋាភិបាល ធ្វើឡើងតបតាមសំណើសុំគោលការណ៍របស់ លោក ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន។ ស្ពានខ្ពស់ជាងគេនៅកម្ពុជានេះ ជាគម្រោងខ្សែផ្លូវជាតិលេខ១០ មានកម្ពស់៩០ម៉ែត្រ ប្រវែងសរុប៥៣៧ម៉ែត្រ ទទឹង១០ម៉ែត្រ ស្ថិតក្នុងភូមិសាស្រ្ត ភូមិឆាយលូក ឃុំអូរសោម ស្រុកវាលវែង ខេត្តពោធិ៍សាត់ សាងសង់ដោយប្រើប្រាស់ថវិកាជាតិសរុបប្រមាណ២៥លានដុល្លារអាម៉េរិក។ ស្ពាននេះ ត្រូវបានបើកឱ្យប្រជាពលរដ្ឋឆ្លងកាត់ជាផ្លូវជាអចិន្រ្តៃយ៍ កាលពីថ្ងៃទី១៥ឧសភា ឆ្នាំ២០២៥។

ដោយសារស្ពាននេះ ស្ថិតក្នុងភូមិសាស្រ្តដែលមានទេសភាពធម្មជាតិអំណោយផលដ៏ស្រស់ត្រកាល ក្រសួងសាធារណការ ក្នុងនាមម្ចាស់គម្រោង បានរៀបចំឱ្យមាននូវទីលានសម្រាប់សំចតថតរូបអនុស្សាវរីយ៍ នៅចំណុចកណ្តាលស្ពាន ដែលមានទទឹងសរុប១៥ម៉ែត្រ។ ជាមួយគ្នានេះ ក្រសួងក៏បានរៀបចំទីធ្លាសម្រាប់ចតយានយន្តនៅទាំងសងខាងក្បាលស្ពាន ដែលម្ខាងៗអាចចតរថយន្តប្រភេទទេសចរណ៍/គ្រួសារ បានប្រមាណពី៦០-៧០គ្រឿងផងដែរ។ ប្រជាពលរដ្ឋដែលធ្វើដំណើរឆ្លងកាត់ អាចឈប់ថតរូប និងទស្សនាកម្សាន្តជាមួយទិដ្ឋភាពស្ពានខ្ពស់ត្រដែត អមដោយអ័ព្វ និង ព្រៃពឹក្សាខៀវស្រងាត់ត្រជាក់ភ្នែក៕