រាជធានីភ្នំពេញ៖ បញ្ញាសិប្បនិម្មិត ឬ AI នៅពេលបច្ចុប្បន្ននេះ កំពុងទទួលបានការចាប់អារម្មណ៍ខ្លាំងពីសំណាក់អ្នកផលិតមាតិកាមួយចំនួន ដើម្បីផលិតរូបភាព និងវីដេអូ ក៏ប៉ុន្តែ ទន្ទឹមគ្នានេះ AI ក៏កំពុងជះឥទ្ធិពលអវិជ្ជមានផងដែរ ដូចជា ជនទុច្ចរិតអាចប្រើប្រាស់ដើម្បីឆបោកអ្នកដទៃ ជាដើម។​ អគ្គនាយកដ្ឋានសេដ្ឋកិច្ចឌីជីថល នៃក្រសួងសេដ្ឋកិច្ច និងហិរញ្ញវត្ថុ បានអំពាវនាវឱ្យពលរដ្ឋប្រុងប្រយ័ត្ន រួមទាំងបង្ហាញពីវិធីសាស្រ្តមួយចំនួនក្នុងការបែងចែករវាងរូបភាពពិត ឬរូបប្រឌិតដោយ AI។

AI សំដៅទៅលើជ្រុងមួយនៃវិទ្យាសាស្រ្តកំព្យូទ័រ ដែលមានសមត្ថភាពអាចធ្វើសកម្មភាពជំនួសមនុស្ស ដែលមើលទៅអាចដូចសកម្មភាពពិត។ អគ្គនាយកដ្ឋានសេដ្ឋកិច្ចឌីជីថល កាលពីពេលថ្មីៗនេះ បានចុះផ្សាយព័ត៌មានមួយនិយាយអំពីកម្មវិធី AI ឈ្មោះ Gemini របស់ក្រុមហ៊ុនបច្ចេកវិទ្យា Google ដែលមានសមត្ថភាពបង្កើតវីដេអូដោយប្រើសំឡេងបានគ្រប់ភាសា។ វីដេអូទាំងនោះ មានភាពរស់រវើក ដូចវីដេអូពិត សឹងមិនអាចបែងចែកបាន។ ក្នុងន័យនេះ អគ្គនាយកដ្ឋានបង្ហាញការព្រួយបារម្ភ ខណៈជនទុច្ចរិតមួយចំនួនក៏អាចនឹងយកកម្មវិធី AI ទាំងនេះទៅបង្កើតរូបភាព ក្នុងគោលបំណងអាក្រក់ ដូចជាការឆបោកជាដើម។

ដើម្បីចៀសវាងការឆបោក ឬយល់ច្រឡំណាមួយ អគ្គនាយកដ្ឋានសេដ្ឋកិច្ចឌីជីថល បានផ្តល់វិធីសាស្ដ្រមួយចំនួន ដើម្បីពិនត្យដឹងថាជា AI រួមមាន៖ ទី១. ទាញចំណាប់អារម្មណ៍ទៅលើកាយវិការ ជាទូទៅវីដេអូដែលបានបង្កើតដោយ AI តែងតែមានភាពមិនប្រក្រតី លើចលនា ឬកាយវិការដៃ ឬមាត់របស់តួអង្គនៅក្នុងវីដេអូ។ ទី២. សង្កេតមើលផ្ទៃខាងក្រោយនៃវីដេអូ ភាគច្រើនផ្ទៃខាងក្រោយនៃវីដេអូដែលបង្កើតដោយ AI តែងតែមានសភាពមិនប្រក្រតី មិនច្បាស់ ឬមានសភាពព្រិលៗជាដើម។ ទី៣. ផ្ទៃមុខរបស់តួអង្គ តែងតែមានសភាពដូចជាក្រមួន ជ័រ ឬរលោង។ 

ទី៤.ផ្តោតទៅលើការនិយាយ ទោះបីជាបច្ចេកវិទ្យាចុងក្រោយខ្លាំង ដែលសឹងតែមិនអាចបែងចែកបានក៏ដោយ ក៏ប៉ុន្តែសំឡេង ឬការនិយាយស្ដីរបស់តួអង្គគឺនៅមិនទាន់អាចដូចទាំងស្រុង ទៅនឹងការសន្ទនារបស់មនុស្សពិតបានទេ។ វិធីសាស្ដ្រខាងលើនេះ គឺជាការក្រើន​រំឭកមួយរបស់អគ្គនាយកដ្ឋានសេដ្ឋកិច្ចឌីជីថល ទៅលើពលរដ្ឋទាំងអស់ឱ្យបង្កើនការប្រុងប្រយ័ត្នចំពោះរូបភាព ឬវីដេអូដែលចុះផ្សាយលើបណ្តាញសង្គម។ ជាពិសេស ត្រូវទាមទារឱ្យមានការចាប់អារម្មណ៍ ឬអាចចំណាយពេលត្រួតពិនិត្យបន្តិច ទើបអាចដឹងបានថាមួយណាជារូបភាពពិត ឬប្រឌិត៕