រាជធានីភ្នំពេញ៖​​ ក្រសួងបរិស្ថាន នៅថ្ងៃទី១១កុម្ភៈ​​ ឆ្នាំ២០២៥​ ​​ព្យាករថា​​ គិតត្រឹមម៉ោង៦ព្រឹកនេះ ខេត្តពោធិ៍សាត់ និងខេត្តកោះកុង​​ រងការបំពុលខ្យល់កម្រិតមធ្យម …។

ក្រសួងបរិស្ថាន អះអាងយ៉ាងដូច្នេះថា​​ ព្រឹកថ្ងៃនេះ មានកំហាប់ភាគល្អិតនិចលគិតជាមធ្យមស្មើនឹង៤៦.៦១ µg/m3 ធៀបនិងស្តង់ដា ៥០ ug/m3 និងគិតជាសន្ទស្សន៍គុណភាពខ្យល់ល្អ។​ តែយ៉ាងណា​ បើតាមទិន្នន័យ​សង្កេតឃើញថា​​ ខេត្តពោធិ៍សាត់ និងខេត្តកោះកុង ស្ថិតក្នុងពណ៌ទឹកក្រូច​​​ បានន័យថា​​​ បង្គួរ​ មានការបំពុលកម្រិតមធ្យម។​ ដូច្នេះ អ្នកដែលមានសុខភាពទន់ខ្សោយ គួរកាត់បន្ថយការចេញទៅខាងក្រៅ ឬពេលចេញទៅក្រៅគួរប្រើប្រាស់ឧបករណ៍ការពារផ្លូវដង្ហើមប្រសិនបើចាំបាច់។ បើមានស្ថានភាពសុខភាព ដូចជា​ អស់កម្លាំង​​ ក្អក ពិបាកដកដង្ហើម ឈឺទ្រូង ឈឺក្បាល ចង្វាក់បេះដូងលោតខុសប្រក្រតី ក្អួតចង្អោរ នោះគួរតែទៅមន្ទីរពេទ្យពិគ្រោះជាមួយវេជ្ជបណ្ឌិត។

ក្រសួងបរិស្ថានបន្តថា​​ ចំពោះខេត្តបន្ទាយមានជ័យ ខេត្តកណ្តាល​ ខេត្តព្រះវិហារ ខេត្តសៀមរាប ខេត្តព្រះសីហនុ ខេត្តស្ទឹងត្រែង និងខេត្តប៉ៃលិន​​​​ ​ស្ថិតក្នុងពណ៌លឿង​ មានន័យថា​ មធ្យម ការបំពុលកម្រិតស្រាល។​​ មនុស្សទូទៅអាចធ្វើសកម្មភាពចេញក្រៅផ្ទះជាធម្មតា​​ ​តែអ្នកដែលមានសុខភាពទន់ខ្សោយ​បើមានរោគសញ្ញាដូចជាក្អក ពិបាកដកដង្ហើម រលាកភ្នែក​ នោះត្រូវកាត់បន្ថយរយៈពេលនៃសកម្មភាពចេញក្រៅ។

ដោយទ្បែក រាជធានីភ្នំពេញ​​​​ ខេត្តបាត់ដំបង ខេត្តកំពង់ចាម ខេត្តកំពង់ស្ពឺ ខេត្តកំពង់ធំ ខេត្តតាកែវ និងខេត្តកែប​​​ ស្ថិតក្នុងពណ៌បៃតង បញ្ជាក់ថា​​ គុណភាពខ្យល់ល្អ អាចចេញទៅខាងក្រៅជាធម្មតា តែបុគ្គលដែលមានប្រតិកម្មអាលែហ្ស៊ីតិចតួចគួរតែកាត់បន្ថយពេលវេលាដែលចេញទៅខាងក្រៅ។ រីឯ ខេត្តកំពង់ឆ្នាំង ខេត្តកំពត ខេត្តស្វាយរៀង​ ខេត្តក្រចេះ ខេត្តព្រៃវែង ខេត្តរតនគិរី​ ខេត្តឧត្តរមានជ័យ ខេត្តមណ្ឌលគីរី និងខេត្តត្បូងឃ្មុំ ស្ថិតក្នុងពណ៌ខៀវ  បញ្ជាក់ថា គុណភាពខ្យល់ល្អណាស់​​ អាចចេញក្រៅផ្ទះបានដោយគ្មានការព្រួយបារម្ភនោះទ្បើយ៕