រាជធានីភ្នំពេញ៖ ឧស្សាហកម្មយានយន្តនៅកម្ពុជា ពីមួយឆ្នាំទៅមួយឆ្នាំ បាននឹងកំពុងស្រូបទាញក្រុមហ៊ុនធំៗមកបោះទុនវិនិយោគក្នុងទឹកប្រាក់ខ្ទង់លានដុល្លារសាងសង់រោងចក្រផ្គុំ និងដំឡើងរថយន្តជាបន្តបន្ទាប់។ ថ្ងៃនេះ SBM News សូមបង្ហាញជូនទីតាំងរោងចក្រធំៗចំនួន៦ របស់ក្រុមហ៊ុនផលិតរថយន្តម៉ាកល្បីៗលើពិភពលោកដែលមានវត្តមាន និងកំពុងដំណើរការនៅកម្ពុជា។
ក្រុមហ៊ុនទាំង៦នោះរួមមាន៖ ទី១. ក្រុមហ៊ុន Camko Motor Company Ltd ដំឡើងរថយន្តម៉ាក Hyundai បើករោងចក្រដំឡើងរថយន្តនៅតំបន់សេដ្ឋកិច្ចពិសេស ក្នុងខេត្តកោះកុង ក្នុងឆ្នាំ២០១១។ រោងចក្ររបស់ក្រុមហ៊ុនកូរ៉េមួយនេះ វិនិយោគរួមគ្នារវាងក្រុមហ៊ុន KH Motors និងក្រុមហ៊ុនលីយ៉ុងផាត់ (ខេមបូឌា) អាចផ្គុំដំឡើងរថយន្តបានចំនួន ៣០០០គ្រឿងក្នុងមួយឆ្នាំ ជាប្រភេទ SUV រថយន្តតួខ្ពស់ៗ រថយន្តច្រើនបាំង(ឡានទួរីស៍) និងប្រភេទកូនឡានតូចៗ។ ទី២. ក្រុមហ៊ុន Daehan Auto ក្រុមហ៊ុន DAEHAN Auto (Cambodia) Co., Ltd ជាក្រុមហ៊ុនដំឡើងរថយន្តម៉ាក Ssangyong, Daehan និង Sino។ ក្រុមហ៊ុននេះបានចាប់ផ្ដើមបើករោងចក្រ ដំឡើងរថយន្តរបស់ខ្លួននៅកម្ពុជា ក្នុងឆ្នាំ២០១៨ ស្ថិតនៅក្រុងបាវិត ខេត្តស្វាយរៀង។ ទី៣. ក្រុមហ៊ុន RMA Cambodia បានបើករោងចក្រដំឡើងរថយន្ត Ford នៅឃុំស្នាអន្សា ស្រុកក្រគរ ខេត្តពោធិ៍សាត់នៅឆ្នាំ២០២២។ គម្រោងនេះចាយទុនវិនិយោគប្រមាណ ២១លានដុល្លារអាម៉េរិក។ រោងចក្រដំឡើងរថយន្តពីរម៉ូឌែលមុនគេគឺរថយន្ត Ford Ranger និងរថយន្ត Ford Everest។
ទី៤.ក្រុមហ៊ុន K (CAMBODIA) CO., LTD.បង្កើតរោងចក្រ រថយន្ត ISUZU ស្ថិតនៅភូមិ សង្គ្រោះជាតិ ឃុំត្រពាំងគង ស្រុកសំរោងទង ខេត្តកំពង់ស្ពឺ។ រោងចក្រផ្គុំដំឡើងរថយន្ត នេះមានទុនវិនិយោគ ៧,៣លានដុល្លារអាម៉េរិក អាចបង្កើតការងារបានចំនួន ១៦៦កន្លែង បើកដំណើរការនៅដើមខែមេសា ឆ្នាំ២០២៣។ ទី៥. ក្រុមហ៊ុន International VCV Industry CO,.ltd ទទួលវិញ្ញាបនបត្រ័ចុះបញ្ជីជាស្ថាពរ លើគម្រោងបង្កើតរោងចក្រផ្គុំ និងដំឡើងរថយន្តកាលពីថ្ងៃទី២៨ មិនាឆ្នាំ២០១៨។ គម្រោងបង្កើតរោងចក្រផ្គុំ និងដំឡើងរថយន្ត បោះទុនក្នុងទំហំទឹកប្រាក់ប្រមាណ ៤,០៧លានដុល្លារអាម៉េរិក ស្ថិតនៅភូមិទ្រុងមាន់ សង្កាត់អូរបែកក្អម (អតីតភូមទឹកថ្លា សង្កាត់ទឹកថ្លា) ខណ្ឌសែនសុខ ភ្នំពេញ។ ទី៦. រោងចក្រដំឡើងរថយន្តតូយ៉ូតា ជាក្រុមហ៊ុនឯកជនបង្កើតឡើងដោយក្រុមហ៊ុនមេ TOYOTA TSUSHO CORPORATION នៃប្រទេសជប៉ុន មានភាគហ៊ុនចំនួន ៩០ភាគរយ និងក្រុមហ៊ុន គង់នួន គ្រុប ចំនួន១០ភាគរយ និងមានទុនជិត៣៧លានដុល្លារ។ ក្រុមហ៊ុននេះបានទទួលវិញ្ញាបនបត្រចុះបញ្ជីគម្រោងវិនិយោគពី ក្រុមប្រឹក្សាអភិវឌ្ឍន៍កម្ពុជា បង្កើតរោងចក្រផ្តុំ និងដំឡើងរថយន្តតូយ៉ូតា ដែលមានទីតាំងក្នុងតំបន់សេដ្ឋកិច្ច ពិសេស រ៉ូយ៉ាល់គ្រុបភ្នំពេញ ត្រូវបានដាក់ឱ្យដំណើរការនៅព្រឹកថ្ងៃទី២ ខែឧសភា ឆ្នាំ២០២៤។
គួរជម្រាបថា ក្នុងអំឡុងពេលដ៏ខ្លី កម្ពុជាទទួលបានក្រុមហ៊ុនម៉ាករថយន្តល្បីៗធំៗមួយចំនួន ចាប់ផ្តើមសម្រេចចិត្តបើករោងចក្រផ្គុំដំឡើងរថយន្តនៅក្នុងប្រទេសជាបន្តបន្ទាប់ ខណៈដែលសក្តានុពលទីផ្សារតម្រូវការប្រើប្រាស់រថយន្តថ្មីនៅកម្ពុជា កំពុងមាននិន្មានការកើនឡើង ជាមួយគោលនយោបាយលើកទឹកចិត្តរបស់រាជរដ្ឋាភិបាល និងការរីកលូតលាស់នៃសេដ្ឋកិច្ចជាតិ៕
