រាជធានីភ្នំពេញ៖ កុមារងាយរងគ្រោះខ្លាំងជាងគេពីការបំពុលខ្យល់ ដោយសារសួតរបស់ពួកគេស្ថិតក្នុងដំណាក់កាលលូតលាស់ និងប្រព័ន្ធភាពស៊ាំនៅខ្សោយ។ តាមរបាយការណ៍របស់អង្គការ​មូលនិធិ​កុមារ​របស់​អង្គការសហប្រជាជាតិ​ (UNICEF)​ នាពេលថ្មីនេះ បានបង្ហាញថា ២០ភាគរយនៃការស្លាប់របស់ទារកទើបនឹងកើតនៅទូទាំងពិភពលោក គឺជាប់ពាក់ព័ន្ធនឹងការបំពុលខ្យល់ ជាពិសេសទារកកើតមិនគ្រប់ទម្ងន់ និងមិនគ្រប់ខែ។ 

នៅពេលដែលកុមារកំពុងលូតលាស់ សួតនិងខួរក្បាលរបស់ពួកគេងាយរងគ្រោះនឹងការបំពុលបរិយាកាស។ ប្រព័ន្ធភាពស៊ាំរបស់កុមារខ្សោយជាងមនុស្សពេញវ័យ ដែលធ្វើឱ្យពួកគេងាយរងគ្រោះនឹងមេរោគ បាក់តេរី និងការឆ្លងមេរោគផ្សេងៗ ដែលបានបង្កើនហានិភ័យនៃការឆ្លងមេរោគផ្លូវដង្ហើម និងកាត់បន្ថយសមត្ថភាពរបស់ពួកគេក្នុងការប្រយុទ្ធប្រឆាំង។ កុមារតូចដកដង្ហើមលឿនជាងមនុស្សពេញវ័យ ហើយស្រូបយកខ្យល់ច្រើនទៅតាមទម្ងន់ខ្លួនរបស់ពួក ដែលជារឿយៗការបំពុលទាំងនោះច្រើនចូលតាមមាត់។ តើការបំពុលបរិយាកាសប៉ះពាល់ដល់កុមារយ៉ាងដូចម្តេច? ការបំពុលខ្យល់បណ្តាលឱ្យមានផលប៉ះពាល់ដល់សុខភាពភ្លាមៗ និងរយៈពេលវែងចំពោះកុមារ។ ការបំពុលខ្យល់ត្រូវបានផ្សារភ្ជាប់ទៅនឹងលក្ខខណ្ឌផ្លូវដង្ហើមដូចជា រលាកសួត រលាកទងសួត និងជំងឺហឺត។ វាអាចធ្វើឱ្យស្ថានភាពសុខភាពមូលដ្ឋានកាន់តែធ្ងន់ធ្ងរ និងប៉ះពាល់ដល់ការអភិវឌ្ឍរាងកាយ និងការយល់ដឹងរបស់កុមារ។ ជាឧទាហរណ៍នៅពេលដែលកុមារឈឺ ពួកគេអាចនឹងខកខានការសិក្សា ដែលធ្វើឱ្យមានកម្រិតបន្ថែមទៀតលើសក្តានុពលនៃការសិក្សា និងការអភិវឌ្ឍរបស់ពួកគេ។

ម្យ៉ាងវិញទៀត អំឡុងពេលមានផ្ទៃពោះ រាងកាយរបស់ស្ត្រីអាចផ្ទុកសារធាតុគីមីដែលបង្កគ្រោះថ្នាក់ពីខ្យល់ បញ្ជូនទៅកាន់កូនរបស់នាង អំឡុងពេលមានផ្ទៃពោះ និងបំបៅដោះ។ ការបំពុលបរិយាកាសអាចប៉ះពាល់យ៉ាងធ្ងន់ធ្ងរដល់សុខភាពរបស់ទារក។ វាអាចនាំឱ្យមានលទ្ធផលអវិជ្ជមាននៃការមានផ្ទៃពោះ ដូចជាការរលូតកូន ការសម្រាលកូនមិនគ្រប់ទម្ងន់ និងមិនគ្រប់ខែ ហើយអាចប៉ះពាល់ដល់ការអភិវឌ្ឍខួរក្បាលរបស់កុមារ ដែលមានសុខភាពល្អផងដែរ។UNICEF បានណែនាំគន្លឹះខ្លះៗ ដើម្បីការពារកុមារពីការបំពុលខ្យល់នៅក្នុងផ្ទះ និងនៅខាងក្រៅ។ ចំពោះការការពារកុមារ ពីការបំពុលខ្យល់នៅក្នុងផ្ទះ រួមមាន៖ ១-ពេលចម្អិនអាហារ សូមប្រើចង្ក្រានអគ្គិសនី ឬសូឡា ឬហ្គាសធម្មជាតិ បើសិនជាអាច។ ២-ពេលចម្អិនអាហារ សូមបើកបង្អួច ប្រើកង្ហារបឺតផ្សែង ឬចម្អិននៅខាងក្រៅផ្ទះ បើសិនជាអាច។ ៣-ឱ្យស្ត្រីមានផ្ទៃពោះ និងកុមារនៅឆ្ងាយពីផ្សែង។ ៤-កុំជក់បារីក្នុងផ្ទះក្បែរកុមារ ឬស្ត្រីមានផ្ទៃពោះ។ និង៥-កុំដុតទៀន ឬធូបដែលបន្ថែមសារធាតុពុលដល់ខ្យល់។

រីឯគន្លឹះក្នុងការ[ការពារ]កុមារពីការបំពុលខ្យល់នៅខាងក្រៅ មានដូចជា៖ ១-តាមដានគុណភាពខ្យល់ជាប្រចាំ ហើយផ្លាស់ប្ដូរសកម្មភាព និងបង្កើនការប្រុងប្រយ័ត្នតាមជាក់ស្តែង។ ២-កាត់បន្ថយពេលវេលានៅក្នុងតំបន់ដែលមានការបំពុលខ្លាំង ដូចជាចរាចរណ៍កកស្ទះ ឬតំបន់ឧស្សាហកម្មជាដើម។ សូមធ្វើដំណើរនៅពេលដែលមានការបំពុលទាបដើម្បីកាត់បន្ថយផលប៉ះពាល់។ ៣-ក្នុងអំឡុងពេលដែលមានការបំពុលខ្យល់ខ្ពស់ គួរឱ្យកុមារជៀសវាងការធ្វើសកម្មភាពដែលហត់នឿយខ្លាំង និងកាត់បន្ថយការលេង ឬលំហាត់ប្រាណ និង៤នៅពេលដែលការបំពុលខ្យល់នៅខាងក្រៅខ្លាំង សូមព្យាយាមឱ្យកូនរបស់អ្នកនៅក្នុងផ្ទះ៕