(បាល់ទាត់)៖ ខ្សែការពាររបស់ក្លឹបភ្នំពេញក្រោន Soe Moe Kyaw ត្រូវបានកោះហៅចូលក្រុមជម្រើសជាតិមីយ៉ាន់ម៉ា ដើម្បីត្រៀមខ្លួនចូលរួមប្រកួតមិត្តភាពអន្តរជាតិនៅថ្ងៃ FIFA Day ទល់នឹងក្រុមជម្រើសជាតិនេប៉ាល់ចំនួន២ប្រកួតនៅឯកីទ្បដ្ឋាន Thuwunna ថ្ងៃទី០៨ និង១១ ខែកញ្ញា ឆ្នាំ២០២៣ ខាងមុខនេះ។

កីទ្បាករមីយ៉ាន់ម៉ាវ័យ២៥ឆ្នាំខាងលើនេះ បានចាកចេញពីក្លឹប Kasetsart F.C សមាជិកលីគទី២របស់ប្រទេសថៃ​ មកកាន់ក្រុមភ្នំពេញក្រោន កាលពីដើមខែកក្កដា ឆ្នាំ២០២៣ កន្លងទៅ។ ​Soe Moe Kyaw គឺជាកីទ្បាករសញ្ជាតិមីយ៉ាន់ម៉ាទី២ ដែលផ្លាស់មកលេងនៅលីគកំពូលកម្ពុជា នារដូវកាលថ្មីនេះ បន្ទាប់ខ្សែប្រយុទ្ធ Thiha Saw របស់ក្លឹបបាល់ទាត់ព្រៃវែង។ យ៉ាងណា មិនត្រឹមតែមានកីទ្បាករ Soe Moe Kyaw របស់ក្រុមភ្នំពេញក្រោនទេ សូម្បីតែកីទ្បាករកូតាអាស៊ានម្នាក់ទៀតរបស់ក្រុមអង្គរថាយ​ហ្គឺរ ខ្សែបម្រើ Pocholo Bugas ក៏ត្រូវបានកោះហៅចូលជម្រើសជាតិហ្វីលីពីនអាយុ២៣ឆ្នាំ Philippines U23 Men's National Pool (PHI U23 MNT) ចូលរួមក្នុងសហព័ន្ធបាល់ទាត់ អាស៊ី (AFC) U-23 វគ្គជម្រុះអាស៊ានខាប់ ២០២៤ ដែលនឹងត្រូវចាប់ផ្ដើមពីថ្ងៃទី០៤ ដល់ថ្ងៃទី១២ ខែកញ្ញា ឆ្នាំ២០២៣ នៅទីក្រុងឈុនបុរី ប្រទេសថៃ..។

កីទ្បាករ Pocholo Bugas ដែលមានវ័យ២១ឆ្នាំរូបនេះ បានចូលរួមជាមួយកឹ្លបអង្គរថាយហ្គឺរ ក្នុង​នាម​ជាកីឡាកកូតាអាស៊ាន សញ្ជាតិហ្វីលីពីន ក្នុងលីគកំពូលកម្ពុជា CPL រដូវកាល ២០២៣-២៤ នេះ។ Pocholo Bugas ធ្លាប់ជាអតីត​ថ្នាលយុវជនរបស់ Far Eastern University និងចូលរួមឈុតធំដំបូងនៅឆ្នាំ២០២០ ជាមួយក្រុម United City FC។ សូមរំឭកថា រយ:ពេល៣ឆ្នាំ កីទ្បាករ Pocholo Bugas បានរួមចំណែកជួយឱ្យក្រុម United City FC គ្រងជើងឯកលីគកំពូលហ្វីលីពីនចំនួន២លើក ពោលគឺនៅរដូវកាល ២០១៩-២០ និង ២០២១-២២ ហើយរូបគេធ្លាប់បានបង្ហាញខ្លួនក្នុងពានរង្វាន់ AFC Champions League ផងដែរ។ បន្ថែមពី Pocholo Bugas ក៏ជាប់ជម្រើសជាតិហ្វីលីពីន U-22 ក្នុងព្រឹត្តិការណ៍ស៊ីហ្គេមលើកទី៣២នៅកម្ពុជា កាលពីកន្លងទៅ..។

គួរជម្រាបថា សម្រាប់ការប្រកួតលីគកំពូលកម្ពុជា CPL សប្តាហ៍ទី៥ នឹងត្រូវសម្រាកចាប់ពីសប្ដាហ៍នេះរហូតដល់ថ្ងៃទី១៥ ខែកញ្ញា ដោយសារចំថ្ងៃ FIFA Day ដូច្នេះ ការប្រកួតនឹងចាប់ផ្តើមដំណើរការពីថ្ងៃទី១៦ និង១៧ ខែកញ្ញា ឆ្នាំ២០២៣ ខាងមុខនេះ៕

សូមទស្សនាវីដេអូរព័ត៌មានខាងក្រោម៖