ខេត្តព្រះសីហនុ៖ គ្រឿងញៀនជិត៦០គីឡូក្រាមដែលរឹបអូសបានក្នុងខេត្តព្រះសីហនុ ខេត្តកំពត និងខេត្តកំពង់ស្ពឺ ត្រូវបានអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនសហការជាមួយគណកម្មាធិការត្រួតពិនិត្យគ្រឿងញៀនខេត្តព្រះសីហនុ ដុតកម្ទេចចោលនៅព្រឹកថ្ងៃទី២៦ ខែកក្កដា ឆ្នាំ២០២២ ស្ថិតក្នុងភូមិ១ សង្កាត់១ ក្រុងព្រះសីហនុ ខេត្តព្រះសីហនុ។
ក្នុងពិធីដុតបំផ្លាញចោលនូវសារធាតុញៀនជិត៦០គីឡូក្រាមនេះ គឺប្រព្រឹត្តឡើងក្រោមអធិបតីភាពឯកឧត្តម នាយឧត្ដមសេនីយ៍ មាស វិរិទ្ធ អគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀន និងឯកឧត្តម គួច ចំរើន អភិបាល និងជាប្រធានគណ:កម្មាធិការត្រួតពិនិត្យគ្រឿងញៀនខេត្តព្រះសីហនុ រួមទាំងលេខាធិការដ្ឋានគណកម្មាធិការត្រួតពិនិត្យគ្រឿងញៀនខេត្តព្រះសីហនុ កំពត និងខេត្តកំពង់ស្ពឺ និងប្រតិភូ ស្ថាប័នសាលាដំបូង និងអយ្យការអមសាលាដំបូងខេត្តចំនួន៣ ខេត្តព្រះសីហនុ ខេត្តកំពត និងខេត្តកំពង់ស្ពឺ និងមន្រ្តីរាជការ កងកម្លាំងគ្រប់ប្រភេទប្រជាពលរដ្ឋសិស្ស និស្សិត យុវជនស.ស.យ.ក កាកបាទក្រហម និងកាយរិទ្ធសរុប៥៦០នាក់។
ឯកឧត្តម នាយឧត្តមសេនីយ៍ មាស វីរិទ្ធ អគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀន បានលើកឡើងថា គ្រឿងញៀននៅតែជាបញ្ហាដែលតម្រូវឱ្យគណៈកម្មាធិការត្រួតពិនិត្យគ្រឿងញៀនខេត្តត្រូវបន្តអនុវត្តនូវយុទ្ធសាស្រ្តប្រយុទ្ធប្រឆាំងគ្រឿងញៀនផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៧។
អគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀនប្រាប់ដល់គ្រប់មន្ទីរ អង្គភាពទាំងអស់ត្រូវបន្តយកចិត្តទុកដាក់ម្ចាស់ការ សម្របសម្រួល ដឹកនាំអនុវត្តឱ្យកាន់តែមានប្រសិទ្ធភាពនូវតួនាទី និងភារកិច្ចរបស់ខ្លួនក្នុងការផ្សព្វផ្សាយអប់រំបង្ការ ទប់ស្កាត់តាមគ្រប់មធ្យោបាយ បង្រ្កាប និងដោះស្រាយនូវរាល់បញ្ហាដែលមានការពាក់ព័ន្ធនឹងគ្រឿងញៀន និងគ្រប់គ្រងត្រួតពិនិត្យសារធាតុគីមីផ្សំ នៅតាមក្រុមហ៊ុន រោងចក្រ សហគ្រាស ឲ្យបានហ្មត់ចត់ និង មានប្រសិទ្ធភាពខ្ពស់ ដើម្បីទប់ស្កាត់បានរាល់ការលួចបង្វែរពីជំនួញស្របច្បាប់ យកទៅកែច្នៃផលិតគ្រឿងញៀនខុសច្បាប់នៅក្នុងប្រទេសកម្ពុជា។
ឯកឧត្តម គួច ចំរើន បានចាត់ទុកអ្នកប្រើគ្រឿងញៀនគឺជាជនរងគ្រោះដែលត្រូវទទួលបានការយកចិត្តទុកដាក់ព្យាបាល ស្តារនីតិសម្បទា ជាជាងទទួលនូវការចោទប្រកាន់តាមផ្លូវច្បាប់ ស្របតាមប្រធានបទប្រចាំឆ្នាំរបស់អង្គការយូ អ៊ិន អូ ឌី ស៊ី (UNODC) ដោយឈរលើគោលការណ៍ សុខភាព និង មនុស្សធម៌ ជាមូលដ្ឋាន បើទោះបីស្ថិតក្នុងកាលៈទេសៈលំបាក និងប្រឈមយ៉ាងណាក្តី។
ឯកឧត្តម សៀង សុខ ព្រះរាជអាជ្ញាអមសាលាដំបូងខេត្តព្រះសីហនុបញ្ជាក់ថា គ្រឿងញៀនជិត៦០គីឡូក្រាមដែលប្រមូលបានពីការបង្រ្កាបក្នុងខេត្តចំនួន៤ គឺ មានជាង២០គីឡូក្រាម បង្រ្កាបបាននៅក្នុងខេត្តព្រះសីហនុ, ខេត្តកំពង់ស្ពឺ ជាង៣១ គីឡូក្រាម និងខេត្តកំពតជាង០៥គីឡូក្រាម។
សូមរំលឹកថា នាទិវាអន្តរជាតិប្រយុទ្ធប្រឆាំងគ្រឿងញៀនថ្ងៃទី២៦ ខែមិថុនា ឆ្នាំ២០២២កន្លងមក អាជ្ញាធរបានដុតបំផ្លាញចោល និងបន្សាបសារធាតុញៀន សារធាតុគីមីផ្សំ និងសារធាតុគីមី សរុបជិត៩១តោនដែលអាជ្ញាធរបង្រ្កាបបាននៅទូទាំងប្រទេស នៅទីតាំងកោះពេជ្រ រាជធានីភ្នំពេញ៕
