(បន្ទាយមានជ័យ)៖ កម្លាំងអាវុធហត្ថក្រុងសិរីសោភ័ណបញ្ជូនជនសង្ស័យម្នាក់ទៅសាលាដំបូងខេត្ត នៅព្រឹកថ្ងៃទី១៩ ខែកក្កដា ឆ្នាំ២០២២នេះ ពាក់ព័ន្ធករណីធ្វើឱ្យខូចខាតដោយចេតនា និងប្រើប្រាស់សារធាតុញៀន។
លោកវរសេនីយ៍ត្រី យ៉ាន់ សុវណ្ណ មេបញ្ជាការមូលដ្ឋានអាវុធហត្ថក្រុងសិរីសោភ័ណ បានឱ្យដឹងថា នៅវេលាម៉ោង២១ និង៣០នាទី ថ្ងៃទី១៣ ខែកក្កដា ឆ្នាំ២០២២ មានករណីធ្វើឱ្យខូចខាតដោយចេតនា ដែលបង្កឡើងដោយជនសង្ស័យមានគ្នាចំនួន០៨នាក់ បានធ្វើសកម្មភាពជិះម៉ូតូ ដោយមានកាន់កាំបិតផ្គាក់ ជិះដេញតាមជនរងគ្រោះ២នាក់។
ជនរងគ្រោះទី១ ឈ្មោះ កែវ ពិសិដ្ឋ ភេទប្រុស អាយុ១៤ឆ្នាំ និងទី២ឈ្មោះ ឡាយ វីរៈ ភេទប្រុស អាយុ ១៤ឆ្នាំ។ ពេលជនសង្ស័យជិះដេញដល់ចំណុចក្បែរ ភោជនីយដ្ឋានផ្កាយព្រឹក ស្ថិតនៅភូមិអូរអំបិល សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ ដោយមានការភ័យខ្លាចជនរងគ្រោះក៏បានផ្ដួលម៉ូតូចោល ហើយរត់ចូលពួនក្នុងផ្ទះប្រជាពលរដ្ឋ ខណៈនោះក្រុមរបស់ជនសង្ស័យក៏បានធ្វើសកម្មភាពយកកាំបិតផ្គាក់ កាប់បំផ្លាញម៉ូតូរបស់ជនរងគ្រោះបណ្តាលឱ្យខូចខាតយ៉ាងខ្លាំង។ ម៉ូតូជនរងគ្រោះម៉ាកហុងដាស្កុបពី (Scoopy) ពណ៍ខៀវ ឆ្នាំ២០១៧ គ្មានស្លាកលេខ។
លោកវរសេនីយ៍ត្រី យ៉ាន់ សុវណ្ណ បានបន្តថា ក្រោយពីទទួលបណ្ដឹងរបស់ជនរងគ្រោះរួច កម្លាំងជំនាញការិយាល័យព្រហ្មទណ្ឌ មន្ទីរស្រាវជ្រាវ និងបង្ក្រាបបទល្មើស សហការជាមួយកម្លាំងមូលដ្ឋានកងរាជអាវុធហត្ថក្រុងសិរីសោភ័ណបានចុះប្រតិបត្តិការ និងធ្វើការស្រាវជ្រាវ រហូតឈានដល់ការឃាត់ខ្លួនជនសង្ស័យម្នាក់ ឈ្មោះ ចន រាជ (ហៅ រក្សា) ភេទប្រុស អាយុ១៧ឆ្នាំ នាំខ្លួនមកកាន់បញ្ជាការដ្ឋានកងរាជអាវុធហត្ថខេត្ត ដើម្បីធ្វើការសួរនាំ និងចំណាត់ការតាមនីតិវិធី។
លោកវរសេនីយ៍ទោ ព្រហ្ម ថេង ប្រធានមន្ទីរស្រាវជ្រាវ និងបង្ក្រាបបទល្មើសបានឱ្យដឹងថា ដោយទទួលបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងមានការសម្របសម្រួលនីតិវិធីពី ឯកឧត្តម កើត វណ្ណារ៉េត ព្រះរាជអាជ្ញាអមសាលាដំបូងខេត្ត បច្ចុប្បន្ន ជនសង្ស័យ ត្រូវបានកម្លាំងកងរាជអាវុធហត្ថខេត្តបញ្ជូនទៅសាលាដំបូងខេត្ត អនុវត្តតាមនីតិវិធីហើយ នៅព្រឹកថ្ងៃទី១៩ ខែកក្កដា ឆ្នាំ២០២២នេះ៕
អត្ថបទដោយ៖ លោក ឈុន មករា សម្រួលដោយ៖ កញ្ញា ឃ្លាំង គីមហួយ
