សុខភាព៖ ការទទួលទានច្រើនតែមិនធ្វើចលនា ឬមិនសូវហាត់ប្រាណ នាំឱ្យរាងកាយធាត់ ដែលជាមូលហេតុធំបំផុតមួយក្នុងចំណោមមូលហេតុផ្សេងៗទៀត ធ្វើឱ្យលោកអ្នកមានជំងឺរុំារ៉ៃ៤ប្រភេទ…។
ជំងឺដែលបង្កដោយភាពធាត់មានដូចជា៖ ១.ជំងឺរលាកសន្លាក់ឆ្អឹង៖ នៅពេលលើសទម្ងន់នឹងផ្តល់សម្ពាធបន្ថែមលើរាងកាយ។ ការមានទម្ងន់កាន់តែធ្ងន់ បានបន្ថែមសម្ពាធលើជង្គង់ ដែលធ្វើឱ្យជង្គង់ពិបាកក្នុងការទ្រទម្ងន់ និងអាចបណ្ដាលឱ្យខូចសន្លាក់ ព្រោះសាច់ដុំមានការពិបាកក្នុងការទ្រទ្រង់ចលនារបស់យើង។ ២.ជំងឺតម្រងនោម៖ ពេលលើសទម្ងន់ ងាយកើតជំងឺទឹកនោមផ្អែម ឬជំងឺលើសសម្ពាធឈាម។ តាមការសិក្សាបានឱ្យដឹងថា ជំងឺទឹកនោមផ្អែម គឺជាមូលហេតុចម្បង ដែលបណ្ដាលឱ្យយើងកើតជំងឺតម្រងនោម ព្រោះថា អ្នកជំងឺទឹកនោមផ្អែមម្នាក់ ក្នុងចំណោមបួននាក់មានជំងឺតម្រងនោមហើយ។ ៣.ជំងឺសរសៃឈាមបេះដូង ឬជំងឺស្ទះសរសៃឈាម៖ មនុស្សធាត់ អាចធ្វើឱ្យងាយកើតជំងឺសរសៃឈាមបេះដូង ព្រោះជំងឺនេះ បណ្ដាលមកពីការកកខ្លាញ់ក្នុងសរសៃឈាម។ យូរៗទៅកំណកខ្លាញ់ ធ្វើឱ្យរន្ធសរសៃឈាមកាន់តែតូចទៅៗ និងអាចធ្វើឱ្យស្ទះចរន្តឈាមទាំងស្រុង ដែលអាចបណ្ដាលឱ្យគាំងបេះដូង ឬដាច់សរសៃឈាមខួរក្បាល។
៤.ជំងឺមហារីក៖ ការសិក្សាបានបង្ហាញថា ភាពធាត់បង្កើនហានិភ័យកើតជំងឺមហារីក។យោងតាមស្ថិតិជំងឺមហារីករបស់សហរដ្ឋអាម៉េរិក បានបង្ហាញថា ស្ត្រី៥៥ភាគរយ និងបុរស២៤ភាគរយ ដែលកើតមហារីកជាមនុស្សធាត់។ កោសិកាខ្លាញ់ច្រើនបង្កើនការរលាក និងបង្កើនការផលិតអ័រម៉ូនអ៊ឺស្ត្រូសែន ក៏ដូចជាអ័រម៉ូនលូតលាស់ផ្សេងទៀត ដែលសុទ្ធតែបណ្ដាលឱ្យកោសិកាបំបែកខ្លួនកាន់តែញឹកញាប់។ ការបំបែកកោសិកាយ៉ាងឆាប់រហ័សនេះ បង្កើនហានិភ័យក្នុងការវិវត្តទៅជាកោសិកាមហារីក។ លើសពីនេះ មានជាតិខ្លាញ់ច្រើនពេក ក៏អាចបង្កើនហានិភ័យក្នុងការកើតមហារីកដូចជា មហារីកថ្លើម តម្រងនោម សុដន់ ក្រពេញអូវែ ពោះវៀនធំ និងលំពែង៕ ដកស្រង់ពី៖ ហេទ្បូគ្រូពេទ្យ
