សិង្ហបុរី៖ វិបត្តិអ័ព្ទផ្សែងពុលឆ្លងដែន ដែលបង្កឡើងដោយភ្លើងឆេះព្រៃយ៉ាងសន្ធឹកសន្ធាប់នៅប្រទេសឥណ្ឌូណេស៊ី បាននិងកំពុងវាយប្រហារយ៉ាងធ្ងន់ធ្ងរដល់បណ្តាប្រទេសជិតខាង ជាពិសេសកម្រិតខ្យល់ពុលនៅប្រទេសសិង្ហបុរី ហក់ឡើងដល់កម្រិតខ្ពស់បំផុតប្រចាំឆ្នាំ ខណៈប្រទេសទីម័រខាងកើត បានប្រកាសបិទសាលារៀនទូទាំងប្រទេសរយៈពេល៣ថ្ងៃ ចាប់ពីថ្ងៃទី១៥ ខែតុលា ឆ្នាំ២០២៦ នេះតទៅ...។

ភ្នាក់ងារបរិស្ថានជាតិសិង្ហបុរី បានរាយការណ៍ថា សន្ទស្សន៍ខ្យល់ពុល PM 2.5 ក្នុងតំបន់ភាគខាងលិចកោះ បានហក់ឡើងដល់២៨៤មីក្រូក្រាមក្នុងមួយម៉ែត្រគូប ដែលជាកម្រិតគ្រោះថ្នាក់ខ្លាំងជាលើកដំបូង។ ចំណែកនៅឯប្រទេសទីម័រខាងកើត រដ្ឋាភិបាលបានប្រកាសផ្អាកការសិក្សាផ្ទាល់នៅតាមសាលារៀនទាំងអស់ ដោយសារភាគល្អិតពុលនៅក្នុងអាកាសធាតុពីប្រទេសជិតខាង។ នៅក្នុងខេត្តកាលីម៉ាន់តាន់ នៃប្រទេសឥណ្ឌូណេស៊ី សន្ទស្សន៍បំពុលខ្យល់បានហក់ឡើងលើស១២០០ ដែលខ្ពស់ជាងកម្រិតគ្រោះថ្នាក់រហូតដល់៤ដង។ ផ្សែងពុលពណ៌លឿងយ៉ាងក្រាស់ បានគ្របដណ្ដប់ពាសពេញទីក្រុង រហូតធ្វើឱ្យអ្នកធ្វើដំណើរតាមផ្លូវមើលមិនឃើញ និងពិបាកដកដង្ហើមយ៉ាងខ្លាំង។

ចំពោះបញ្ហានេះ លោកប្រធានាធិបតីឥណ្ឌូណេស៊ី ប្រាបូវ៉ូ ស៊ូបៀនតូ (Prabowo Subianto) បានបញ្ជាឱ្យបញ្ចេញកម្លាំងសរុប ដើម្បីប្រយុទ្ធនឹងភ្លើងឆេះព្រៃ ដោយបានប្រើកម្លាំងកងទ័ព និងភ្នាក់ងារពន្លត់អគ្គិភ័យ កើនឡើងដល់ជាង៦៩០០០នាក់ ព្រមទាំងប្រើប្រាស់សារធាតុគីមីពិសេស និងការបង្កើនទឹកភ្លៀង។ យ៉ាងណាមិញ អាជ្ញាធរបានទទួលស្គាល់ថា ការរលត់ទាំងស្រុងទៅបាន គឺមានតែរង់ចាំភ្លៀងធ្លាក់ជាប់ៗគ្នាប៉ុណ្ណោះ ដោយសារភ្លើងនៅតែបន្តឆេះងំពីខាងក្រោមដី។

ចំពេលដែលមន្ត្រីការបរទេសអាស៊ាន រៀបចំជួបពិភាក្សាអំពីវិបត្តិនេះនៅខែក្រោយ រលកនៃការរិះគន់លើឥណ្ឌូណេស៊ី បានផ្ទុះឡើងយ៉ាងខ្លាំង។ តំណាងរាស្ត្រម៉ាឡេស៊ី បានអំពាវនាវឱ្យបណ្តាប្រទេសអាស៊ានដូចជា ម៉ាឡេស៊ី និងសិង្ហបុរី រួមកម្លាំងគ្នាយកលិខិតតវ៉ាការទូតផ្លូវការទៅដាក់សម្ពាធលើរដ្ឋធានីហ្សាការតា ហើយថែមទាំងស្នើឱ្យធនាគារក្នុងតំបន់ផ្តាច់ហិរញ្ញប្បទានដល់ក្រុមហ៊ុនណា ដែលពាក់ព័ន្ធនឹងការដុតព្រៃឈើទៀតផង៕