សុខភាព៖ បែកញើសក្លៀក គឺជាការបញ្ចេញកម្តៅពីក្នុងខ្លួន និងជាតិពុល តែការបែកញើសក្លៀកអាចធ្វើឱ្យក្លៀកធុំក្លិនមិនល្អ និងប្រឡាក់ដាមអាវដែលអាចធ្វើឱ្យខ្មាសគេ។បើសិនបើចង់កាត់បន្ថយការបែកញើសក្លៀក លោកអ្នកណាអាចសាកល្បងវិធីសាស្រ្តទាំង៨ ដែលមានដូចខាងក្រោម។
១.កាត់បន្ថយស្រេ្តស៖ នៅពេលមានភាពតានតឹង ឬស្រេ្តស ក៏ធ្វើឱ្យបែកញើសច្រើនដែរ ដូច្នេះយគួរកាត់បន្ថយភាពតានតឹងតាមរយៈការដកដង្ហើមវែងៗ ដើរលំហែ ឬស្តាប់តន្ត្រី និងហាត់យូរហ្គា។ ២.កុំជក់បារី៖ ជាតិនីកូទីននៅក្នុងបារី គឺដូចជាតិកាហ្វេអ៊ីនដែរ ដោយអាចបង្កើនកម្តៅក្នុងរាងកាយ ធ្វើឱ្យបេះដូងលោតលឿន និងធ្វើឱ្យក្រពេញញើសសកម្មជាងមុនដែលធ្វើឱ្យបែកញើសច្រើន។ ៣.សម្រកទម្ងន់៖ លើសគីឡូក៏ធ្វើឱ្យបែកញើសច្រើនដែរ ដូច្នេះគួរហាត់ប្រាណយ៉ាងហោចណាស់៣០នាទី ជារៀងរាល់ថ្ងៃ និងកាត់បន្ថយការទទួលទាន អាហារដែលផ្ទុកជាតិម្សៅចម្រាញ់ ខ្លាញ់ និងស្ករខ្ពស់ ដើម្បីកាត់បន្ថយកាឡូរីក្នុងខ្លួន និងជួយឱ្យអាចស្រកទម្ងន់។
៤. ទទួលទានភេជ្ជៈ និងអាហារ ដែលអាចកាត់បន្ថយការបែកញើស៖ អាហារមួយចំនួនអាចធ្វើឱ្យរាងកាយ ត្រជាក់ និងកាត់បន្ថយបរិមាណញើសដែលរាងកាយផលិត។ អាហារទាំងនោះមានដូចជា ទឹក តែបៃតង ចេក ប្រេងអូលីវ ស្រូវសាលីអូត ដំឡូងជ្វា ឪឡឹក ទំពាំងបាយជូរ ត្រសក់ស្រូវផ្អែម ខាត់ណាខៀវ ផ្កាខាត់ណា ម្ទេសហាវៃ និងត្រប់វែង។ ៥.កាត់បន្ថយអាហារធ្វើឱ្យបែកញើសច្រើន៖ អាហារដែលអាចធ្វើឱ្យបែកញើសច្រើនមានដូចជា អាហារកែច្នៃ គ្រឿងស្រវឹង ខ្ទឹម ខ្ទឹមបារាំង អាហារដែលមានជាតិខ្លាញ់ខ្ពស់ អាហារហិរ និងជាតិកាហ្វេអ៊ីនជាដើម ព្រោះអាហារទាំងនេះអាចធ្វើឱ្យរាងកាយឡើងកម្តៅ។លើសពីនេះ ការទទួលទានអាហារដែលប្រៃៗ ក៏រួមចំណែកធ្វើឱ្យបែកញើស និងនោមច្រើន ព្រោះរាងកាយត្រូវបញ្ចេញជាតិសូដ្យូមដែលលើស។
៦.ស្លៀកសម្លៀកបំពាក់អាចឱ្យខ្យល់ចេញចូលល្អ៖ យើងគួរស្លៀកសម្លៀកបំពាក់ដែលធ្វើពីកប្បាស សូត្រ ឬលីនីនជាដើម ដែលរលុងៗព្រោះក្រណាត់ទាំងនេះអាចឱ្យខ្យល់ចេញចូលបានល្អ កាត់បន្ថយការបែកញើស ការកកើតបាក់តេរី និងការមានក្លិនខ្លួន។លើសពីនេះទៅទៀតយើងគួរស្លៀកសម្លៀកបំពាក់ដែលមានពណ៌ស្រាលៗ ព្រោះសម្លៀកបំពាក់ដែលមានពណ៌ក្រមៅអាចស្រូបពន្លឺថ្ងៃ និងកម្តៅខ្លាំងដែលធ្វើឱ្យយើងបែកញើសច្រើន។ ៧.កោរ ឬដករោមក្លៀក៖ រោមក្លៀក រោមមុខ និងរោម លើរាងកាយ អាចជួយបញ្ចេញកម្តៅពីរាងកាយ តាមរយៈការបញ្ចេញញើសដូច្នេះការដក ឬកោររោមក្លៀក អាចជួយកាត់បន្ថយការបែកញើសក្លៀកបាន។ ៨.ងូតទឹកឱ្យបានទៀងទាត់៖ ងូតទឹកឱ្យស្អាតយ៉ាងហោចណាស់ពីរដងក្នុងមួយថ្ងៃ ដើម្បីការពារ និងកាត់បន្ថយការបែកញើសដោយសារភាពស្អុះស្អាប់។ម្យ៉ាងទៀត ត្រូវប្រើសាប៊ូដែលគ្មានជាតិកាត់ខ្លាំង ឬគ្មានក្លិនប្រអូបក្នុងការសម្អាតក្លៀក៕ ដកស្រង់ពី៖ហេទ្បូគ្រូពេទ្យ
