សុខភាព៖ គ្រប់ផ្លែឈើទាំងអស់ សុទ្ធតែមានគុណប្រយោជន៍ជាច្រើនដល់សុខភាពរាងកាយ តួយ៉ាងបើនិយាយដល់ចេកអំបូងលឿងវិញ មានអត្ថប្រយោជន៍ដល់ទៅ៥យ៉ាង តែបើចង់ឱ្យទទួលបានផលល្អ ត្រូវទទួលទានចេកទុំល្មម ព្រោះចេកដែលទុំពេកអាចមានជាតិស្ករខ្ពស់ ចំណែកចេកដែលមិនទាន់ទុំល្អ ពោះវៀនពិបាករំលាយណាស់...។
គុណប្រយោជន៍ទាំង៥របស់ចេកអំបូងលឿង មានដូចជា៖ ១.សុខភាពបេះដូង៖ ចេកអំបូងលឿងជាប្រភពនៃប៉ូតាស្យូម ជាសារធាតុរ៉ែសំខាន់សម្រាប់គ្រប់គ្រងសម្ពាធឈាម និងកាត់បន្ថយហានិភ័យនៃជំងឺដាច់សរសៃឈាមខួរក្បាល និងជំងឺបេះដូង។២.តម្រងនោម៖ ចេកអំបូងលឿង មានប៉ូតាស្យូមខ្ពស់ បើបានទទួលទានជាប្រចាំ នឹងជួយតម្រងនោមឱ្យមានសុខភាពល្អ។ ៣.អារម្មណ៍៖ ចេកអំបូងលឿង មានផ្ទុកសារធាតុទ្រីបតូហ្វាន(tryptophan) ដែលរាងកាយបំប្លែងទៅជាសេរ៉ូតូនីន(serotonin) ជាអ័រម៉ូនជួយឱ្យអារម្មណ៍ល្អសប្បាយរីករាយ។ ៤.ការរំលាយអាហារ៖ ជាតិសរសៃហ្វៃប័រ (fiber) ក្នុងចេកអំបូងលឿង គឺជួយសម្រួលដល់ចលនាពោះវៀន និងអាចកាត់បន្ថយបញ្ហាទល់លាមក។ មួយវិញទៀត វាក៏មានផ្ទុកសារធាតុម្សៅ resistant starch ដែលជួយទ្រទ្រង់បាក់តេរីល្អនៅក្នុងពោះវៀន។
៥.ថាមពល៖ នៅពេលទទួលទានចេកអំបូងលឿង នោះនឹងមានថាមពលភ្លាមៗដល់រាងកាយ ព្រោះផ្លែឈើមួយនេះ សម្បូរទៅដោយស្ករធម្មជាតិរួមមាន glucose, sucrose, fructose និងកាបូអ៊ីដ្រាត (carbohydrates)។ ហេតុទាំងនេះហើយបានជា អត្តពលិកចូលចិត្តបរិភោគចេកមុន ឬក្រោយពេលហាត់ប្រាណរួច លើសពីនេះ ការធ្វើសូណា ឬការចូលស្ទីម ដែលរាងកាយត្រូវបញ្ចេញជាតិពុល តាមរយៈការបែកញើស ហើយធ្វើឱ្យរាងកាយត្រូវថយចុះជាតិទឹក និងប៉ះពាល់ដល់បរិមាណអេឡិចត្រូលីតក្នុងរាងកាយ។ ដូច្នេះ បន្ទាប់ពីពេលលោកអ្នកចូលសូណា បង្ហូរញើសក្នុងបន្ទប់កម្ដៅរួចហើយ ត្រូវគិតគូរពីអាហារណាដែលល្អត្រូវទទួលទានតួយ៉ាង ចេកទុំ ជាប្រភេទអាហារដែលគួរជ្រើសក្រោយធ្វើសូណា ឬការចូលស្ទីម៕
