សុខភាព៖ នារីៗតែងចូលចិត្តខាត់ជម្រុះកោសិកាស្បែកចាស់ងាប់ៗ ដើម្បីចង់ឱ្យស្បែកស្រស់ថ្លា និងក្មេងជាងវ័យ តែពេលខ្លះបែរជាមិនទទួលបានផលទៅវិញ ព្រោះខាត់មិនបានត្រឹមត្រូវ…។
ខាត់ស្បែកមិនបានត្រឹមត្រូវ ស្បែកអាចប្រែជាខូច ឬមិនទទួលបានលទ្ធផលល្អដូចការរំពឹងទុក។ ទាំងនេះ ជាវិធីខាត់ស្បែកដែលត្រឹមត្រូវ មានដូចជា៖១.ផ្សើមស្បែក រួចខាត់ស្បែកថ្នមៗ៖ បន្ទាប់ពីសម្អាតស្បែកដុសជាមួយសាប៊ូ ត្រូវប្រើទឹកក្ដៅឧណ្ហៗ លាងជម្រះចេញ ហើយអាចយកស្ក្រាប់មកខាត់ស្បែកថ្នមៗ ក្នុងចលនារង្វង់ប្រហែល១០វិនាទី ឱ្យសព្វពេញរាងកាយ។ ២.លាងជម្រះស្បែកដែលខាត់ហើយឱ្យស្អាត៖ បន្ទាប់ពីខាត់ស្បែករួច ត្រូវលាងជម្រះស្បែកឱ្យស្អាតជាមួយទឹក តែពេលខ្លះអាចនៅសល់ជាតិប្រេងបន្តិចបន្តួចនៅលើស្បែកអាស្រ័យតាមប្រភេទស្ក្រាប់ដែលប្រើ ព្រោះទឹកតែមួយមុខមិនអាចលាងជម្រះជាតិប្រេងឱ្យអស់ទេ។ តែមិនអីទេ ជាតិប្រេងដែលនៅសេសសល់នោះមានប្រយោជន៍ដល់ស្បែក ព្រោះអាចជួយផ្តល់សំណើមខ្លះដល់កោសិកាស្បែកថ្មី។
៣.លាបឡេ ឬគ្រីមផ្តល់សំណើម៖ ក្រោយពេលខាត់ស្បែករួច ត្រូវលាបឡេ ឬគ្រីមផ្តល់សំណើម ដើម្បីការពារស្បែកពីការស្ងួតដោយសារត្រូវខ្យល់ ឬកកិតជាមួយសម្លៀកបំពាក់ ព្រោះបន្ទាប់ពីខាត់រួច ស្បែកដែលងាប់ៗ ត្រូវបានជម្រុះចេញ នៅសល់តែកោសិកាស្បែកថ្មី ដែលមានសភាពទន់ខ្យោយ បើសិនជាមិនបានលាបនោះការខាត់ស្បែកគ្មានន័យខាតតែពេលហើយមិនបានស្បែកស្អាតទៀត៕ ដកស្រង់ពី៖ ហេទ្បូគ្រូពេទ្យ
