សុខភាព៖ នៅពេលមានការធ្លាក់ចុះនៃការផលិតអ័រម៉ូនជាក់លាក់ ចំនួនកោសិកាសរសៃប្រសាទក្នុងខួរក្បាល នឹងថយចុះដែរ ហើយការរលាកក៏កើនឡើង។ ការប្រែប្រួលទាំងនេះ អាចប៉ះពាល់ដល់ការចងចាំ ការគិត និងសមត្ថភាពយល់ដឹង។ ដើម្បីជួយពង្រឹងសមត្ថភាពខួរក្បាលឱ្យកាន់តែប្រសើរឡើង និងគិតបានលឿន លោកអ្នកគួរសាងទម្លាប់ទាំង៤ ដែលមានដូចខាងក្រោម…។
១.ទទួលទានអាហារសុខភាព៖ ចង់ឱ្យខួរក្បាលល្អ និងគិតបានឆាប់រហ័ស គួរទទួលទានអាហារសុខភាព ដែលសម្បូរទៅដោយសារធាតុចិញ្ចឹមល្អៗ រួមមាន ផ្កាខាត់ណាខៀវ ស៊ុត សណ្តែកដី និងផ្លែប៊ឺរ។ ២.ហាត់ប្រាណជាប្រចាំ៖ ការបញ្ចេញសកម្មភាពរាងកាយជាទៀងទាត់ អាចជួយពង្រឹងរំហូរឈាមទៅកាន់ខួរក្បាល និងគាំទ្រមុខងារខួរក្បាល។ លើសពីនេះ ការហាត់ប្រាណ ក៏អាចជួយគ្រប់គ្រងបញ្ហាផ្លូវចិត្តមួយចំនួនដូចជាស្រ្តេស ការថប់បារម្ភ និងការបាក់ទឹកចិត្ត។ ដូចនេះ គួរធ្វើលំហាត់ប្រាណឱ្យបាន១៥០នាទី ក្នុងមួយសប្តាហ៍ទើបជាការប្រសើរដល់ខួរក្បាល។
៣.ហ្វឹកហាត់ខួរក្បាល និងចូលរួមក្នុងសង្គម៖ ការចូលរួមនៅក្នុងសកម្មភាពកម្សាន្តមួយចំនួន ដូចជាការលេងហ្គេម ឬលេងផ្គុំរូបភាពអាចជួយទ្រទ្រង់មុខងារយល់ដឹង ពង្រឹងការគិត និងការចងចាំ។ ដូចគ្នានេះ លោកអ្នកគួររក្សាទំនាក់ទំនងល្អក្នុងសង្គម ដើម្បីជួយឱ្យសុខភាពខួរក្បាលដំណើរការបានរលូន។ ៤.សម្រាកឱ្យបានគ្រប់គ្រាន់៖ ការគេងគ្រប់គ្រាន់ និងស្កប់ស្កល់មានសារសំខាន់ណាស់ សម្រាប់មុខងារយល់ដឹង ដោយអាចជួយឱ្យយើងមានអារម្មណ៍ស្ងប់ល្អ កាត់បន្ថយស្រ្តស ក៏ដូចជាមានថាមពលខ្លាំងនៅពេលព្រឹកព្រលឹម។ ហេតុនេះលោកអ្នកគួរដេកឱ្យបាន៧ទៅ៩ម៉ោងក្នុងមួយថ្ងៃ ដើម្បីឱ្យខួរក្បាលបានសម្រាកល្អ ហើយគិតបានឆាប់រហ័ស៕ ដកស្រង់ពី៖ ហេទ្បូគ្រូពេទ្យ
