សុខភាព៖ ការមករដូវជារឿងគួរឱ្យរំខានមួយ ព្រោះវាធ្វើឱ្យឈឺចាប់ និងមានអារម្មណ៍ប្រែប្រួលមិនល្អខុសធម្មតា ពេលខ្លះមានអាការវិលមុខ និងធីងធោងរកសន្លប់ទៀតផង។ហេតុផល៤យ៉ាងខាងក្រោមនេះ ដែលនឹងធ្វើឱ្យស្រីៗកើតអាការទាំងនេះ...។
១.ឈឺក្បាលប្រកាំង៖ តាមការប៉ាន់ស្មានមនុស្សស្រីប្រហែលជា៦០ភាគរយ ជួបបញ្ហាឈឺក្បាលប្រកាំង កំលុងពេលមករដូវ។ ការឡើងចុះនៃកម្រិតអ័រម៉ូន អឺស្ត្រូសែន អាចបង្កឱ្យកើតមានអាការឈឺក្បាលប្រកាំងបាន ហើយក៏អមមកជាមួយនឹងអាការវិលមុខដែរ។ ២.ឈឺរមួលក្នុងពោះ៖ អាការឈឺរមួលក្នុងពោះ អាចជាហេតុផលនៅពីក្រោយការវិលមុខ។ អាការឈឺរមួលនេះ មានតាំងពីកម្រិតស្រាលទៅដល់កម្រិតធ្ងន់ នៅពេលដែលអាការនេះកាន់តែខ្លាំង នារីៗមួយចំនួនសឹងតែមិនអាចដើរបានផង ព្រោះនាំឱ្យធេងធោងវិលមុខ។ ៣.សម្ពាធឈាមទាប៖ សម្ពាធឈាមទាប ជាហេតុផលទូទៅបំផុតមួយ នៅពីក្រោយអាការវិលមុខ ហើយសម្ពាធឈាមអាចចុះទាប នៅពេលស្រីៗកំពុងមករដូវ។ ការសិក្សាបង្ហាញថា អ័រម៉ូនភេទ ជាអ្នកគ្រប់គ្រងលើសម្ពាធឈាម ដែលនាំឱ្យមានកើតជាវិលមុខ។
អ័រម៉ូនភេទ ដូចជាអ័រម៉ូនអឺស្ត្រូសែន ត្រូវគេដឹងថា ជួយដល់ការឡើងសម្ពាធឈាម ហើយវាក៏អ្នកបញ្ចុះសម្ពាធឈាមដូចគ្នា។ ពេលស្រីៗមករដូវ អ័រម៉ូនអឺស្ត្រូដែនឡើងខ្ពស់ ធ្វើឱ្យសម្ពាធឈាមចុះទាបវិញ ដែលនាំឱ្យវិលមុខនិងធីងធោង។ ៤.ស្លេកស្លាំង៖ ការស្លេកខ្លាំងខ្វះជាតិដែក ជាលក្ខខណ្ឌមួយធ្វើឱ្យរាងកាយមិនអាចផលិត និងរក្សាកោសិកាឈាមក្រហមបានល្អ។ ការធ្លាក់ឈាមរដូវច្រើនពេលមករដូវ អាចនាំឱ្យជួបបញ្ហាស្លេកស្លាំង និងកើតមានអាការវិលមុខ និងធេងធោងរកដួល។ គួរដឹងថា ជាធម្មតាគ្មានអ្វីត្រូវបារម្ភចំពោះអាការវិលមុខពេលមករដូវនេះទេ តែថាបើមើលទៅខុសប្រក្រតីណាមួយ គួរទៅមន្ទីរពេទ្យជួប ពិគ្រោះជាមួយគ្រូពេទ្យ ដើម្បីបានដឹងពីស្ថានភាពសុខភាពឱ្យបានច្បាស់លាស់៕ ដកស្រង់ពី៖ ហេទ្បូគ្រូពេទ្យ
