សុខភាព៖ ទម្លាប់ប្រចាំថ្ងៃមួយចំនួន អាចនាំផលមិនល្អធ្វើឱ្យស្បែក និងរាងកាយទ្រុឌទ្រោមដោយមិនដឹងខ្លួន ជាពិសេស បង្កឱ្យមានភាពចាស់ជាងអាយុ។ បើលោកអ្នកមិនចង់ឃើញខ្លួនឯងចាស់ជាងវ័យទេ គួរចាប់ផ្ដើមកែប្រែទម្លាប់អាក្រក់ទាំង៥ ដែល SBM News នឹងរៀបរាប់ជូនជ្រាបដូចតទៅ…។
ទម្លាប់អាក្រក់ទាំងនោះរួមមាន៖ ១.នៅក្រោមកម្ដៅថ្ងៃច្រើនពេក៖ ពន្លឺព្រះអាទិត្យអាចផ្ដល់អត្ថប្រយោជន៍ដល់រាងកាយពិតមែន តែបើឱ្យរាងកាយត្រូវពន្លឺព្រះអាទិត្យខ្លាំងពេក ក៏អាចបំផ្លាញកូឡាជែននៃស្បែក និងធ្វើឱ្យរាងកាយផលិតជាតិប្រូតេអ៊ីនអេឡាទីន ច្រើនពេក។ តែយ៉ាងណា ក្នុងករណីលោកអ្នកធ្វើការក្រោមកម្តៅថ្ងៃ ឬមានការចាំបាច់ចេញក្រៅ ហើយត្រូវនឹងកម្ដៅថ្ងៃយូរ ត្រូវលាបឡេការពារកម្ដៅថ្ងៃដែលមាន SPF៣០ ឬខ្ពស់ជាងនេះ ត្រូវពាក់មួក ស្លៀកពាក់ខោអាវដៃវែង និងវ៉ែនតាការពារពន្លឺថ្ងៃ។២.ទទួលទានអាហារមិនត្រឹមត្រូវ៖ ការបរិភោគអាហារត្រឹមមិនត្រូវ អាចធ្វើឱ្យមានបញ្ហាជំងឺបេះដូង ជំងឺទឹកនោមផ្អែម និងជំងឺដទៃទៀត ដែលជាកត្តាជំរុញឱ្យថាមពលនៃយុវវ័យរបស់យើងបាត់បង់។ ដូចនេះ គួរមានរបបអាហារដែលជំនួយដល់បេះដូង ដូចជា បន្លែ ផ្លែឈើ គ្រាប់ធញ្ញជាតិ សណ្ដែក ស៊ុត និងសាច់ត្រី ។ល។ ហើយអាហារប្រភេទនេះ ក៏អាចផ្ដល់អត្ថប្រយោជន៍ច្រើនដល់ខួរក្បាលដែរ។
៣.គេងមិនគ្រប់គ្រាន់៖ នៅពេលគេងមិនគ្រប់គ្រាន់ ស្បែកនឹងចាប់ផ្ដើមលេចឡើងនូវស្នាមជ្រីវជ្រួញ និងយារធ្លាក់មុនវ័យ ព្រោះរាងកាយបញ្ចេញអ័រម៉ូន ខូទីសូល ជាអ័រម៉ូនស្រ្តេសច្រើន ហើយវាបានចូលទៅបំផ្លាញជាតិកូឡាជែន ដែលជាភ្នាក់ងារជួយធ្វើឱ្យស្បែកទន់ល្មើយ និងយឺតល្អ។ លោកអ្នកគួរចាប់ផ្ដើមទម្លាប់គេងឱ្យបានទៀងម៉ោង និងហាមពិសាគ្រឿងស្រវឹងលើសកំណត់ ឬកាហ្វេអ៊ីន និងលេងគ្រឿងអេឡិចត្រូនិកផ្សេងៗ មុនពេលគេង។ ៤. មិនធ្វើលំហាត់ប្រាណគ្រប់គ្រាន់៖ ការមិនធ្វើលំហាត់ប្រាណគ្រប់គ្រាន់ អាចនាំឱ្យមានភាពចាស់ជាងវ័យ ព្រោះការហាត់ប្រាណ អាចជួយពង្រឹងសាច់ដុំ បង្កើនថាមពលរាងកាយ និងធ្វើឱ្យអារម្មណ៍កាន់តែប្រសើរឡើង។ ការធ្វើចលនាចុះឡើងនេះ ពិតជាអាចជួយឱ្យខួរក្បាលមានភាពឆ្លាតវៃ និងកាត់បន្ថយហានិភ័យនៃជំងឺមនុស្សចាស់ ដូចជា ជំងឺបេះដូង ជាដើម ។ល។ ហេតុដូចនេះ ការធ្វើលំហាត់ប្រាណសាមញ្ញៗ ប្រហែល៣០នាទីក្នុងមួយថ្ងៃ គឺដើម្បីទទួលបាននូវសុខភាពល្អ ថាមពល និងជួយឱ្យក្មេងជាងវ័យ។
៥.ជក់បារី៖ ការជក់បារី មិនត្រឹមតែបង្កើនឱកាសកើតជំងឺមហារីកប៉ុណ្ណោះទេ វាក៏អាចធ្វើឱ្យមានស្នាមជ្រីវជ្រួញ និងយារធ្លាក់នៅវ័យក្មេងដែរ។ ជាក់ស្ដែង ការជក់បារីធ្វើឱ្យមានរំហូរឈាម ដែលផ្ទុកសារធាតុចិញ្ចឹមសំខាន់ៗដូចជា អុកស៊ីសែននៅលើស្បែកថយចុះ ដែលអាចធ្វើឱ្យរាងកាយផលិតកូឡាជែនយឺតយ៉ាវ៕ ដកស្រង់ពី៖ ហេទ្បូគ្រូពេទ្យ
