សុខភាព៖ អាំងស៊ុយលីន (Insulin) គឺជាអ័រម៉ូនមួយប្រភេទ ដែលផលិតដោយកោសិកាបេតានៅក្នុងលំពែង ដើម្បីជួយគ្រប់គ្រង និងកាត់បន្ថយកម្រិតជាតិស្ករ (គ្លុយកូស)នៅក្នុងឈាម។ វាបំលែងជាតិស្ករពីអាហារទៅជាថាមពលសម្រាប់រាងកាយ។ មុខងារចម្បងរបស់អាំងស៊ុយលីន គឺគ្រប់គ្រងជាតិស្ករ រក្សាទុកថាមពល និងទប់ស្កាត់ការកើនឡើងជាតិស្ករ។
នៅពេលដែលស៊ាំនឹងអាំងស៊ុយលីន អាចនាំឱ្យកើនកម្រិតគ្លុយកូសក្នុងចរន្តឈាម បណ្តាលឱ្យកើនឡើងកម្រិតជាតិស្ករក្នុងឈាម។ សញ្ញាដែលរាងកាយប្រាប់ថា អាចមានបញ្ហាស៊ាំនឹងអាំងស៊ុយលីន កើតឡើងមានដូចជា៖
១.ជ្រុះសក់ កើតមុន និងឆ្លងរោគញឹកញាប់៖ ការប្រែប្រួលអ័រម៉ូន ជាមូលហេតុចម្បងធ្វើឱ្យជ្រុះសក់ និងកើតមុន។មួយវិញទៀត គឺរាងកាយនឹងត្រូវការកាបូអ៊ីដ្រាតខ្លាំង ពេលអាំងស៊ុយលីន ធ្វើការមិនប្រក្រតីដែលបណ្តាលឱ្យមានការផលិតខ្លាញ់ Sebum ជាច្រើនដែលជាខ្លាញ់ផ្ដល់ផលមិនល្អដល់សក់ និងស្បែក។ ការឡើងកម្រិតជាតិស្ករក្នុងរាងកាយ នាំឱ្យរបួសមិនងាយជាសះស្បើយ ហេតុនេះធ្វើឱ្យងាយនឹងឆ្លងបាក់តេរី និងមេរោគផ្សិត។ ២. ឃ្លាន ស្រេកទឹក និងនោមញឹក៖នៅពេលដែលមានភាពស៊ាំនឹងអាំងស៊ុយលីន នាំឱ្យចេះតែឃ្លាន ទទួលទានអាហារ និងពិសាទឹកច្រើន ដើម្បីបង្កើនថាមពល តែនេះអាចធ្វើឱ្យលោកអ្នកទទួលទានលើសតម្រូវការទៅវិញ។
ដូចគ្នាដែរ នៅពេលពិសាទឹកច្រើន នឹងធ្វើឱ្យយើងទៅបន្ទប់ទឹកញឹកញាប់ នេះក៏អាចជាសញ្ញាមួយដែរ។ ៣. ឡើងគីឡូ៖នៅពេលដែលក្បាលពោះចាប់ផ្ដើមឡើងធំវានឹងមានខ្លាញ់ច្រើននោះ រាងកាយកំពុងចង់ប្រាប់ថា ត្រូវពិនិត្យមើលលើកម្រិតអាំងស៊ុយលីនហើយ។ការដុះក្បាលពោះនេះ កើតឡើងដោយសារមិនសូវបានបញ្ចេញសកម្មភាពរាងកាយ។គួរដឹងថា ខ្លាញ់នៅក្បាលពោះ មានគ្រោះថ្នាក់ជាង ខ្លាញ់កើតមាននៅកន្លែងផ្សេងៗនៃរាងកាយ។ ៤. អស់កម្លាំង៖ បើតាមវិទ្យាស្ថានជំងឺទឹកនោមផ្អែម ប្រព័ន្ធរំលាយអាហារ និងតម្រងនោម របស់សហរដ្ឋអាមេរិក មនុស្សមានអារម្មណ៍អស់កម្លាំង ព្រោះតែការធ្វើមេតាប៉ូលិសខុសប្រក្រតី។ប្រសិនជាដំណើរការធ្វើមេតាប៉ូលិស មិនមានប្រសិទ្ធភាពត្រឹមត្រូវ នាំឱ្យស៊ីពេលយូរ ក្នុងការបញ្ចេញថាមពលសម្រាប់រាងកាយ។
កត្តានេះ ធ្វើឱ្យមនុស្សមានអារម្មណ៍ថា អស់កម្លាំងទោះបីជាបានពិសាអាហារគ្រប់គ្រាន់ក៏ដោយ។នេះមានន័យថា បើពេលរាងកាយប្រើប្រាស់គ្លុយកូសមិនបានត្រឹមត្រូវ នឹងធ្វើឱ្យមានអារម្មណ៍ហត់នឿយ និងអស់កម្លាំង។បើតាមអ្នកជំនាញផ្នែកសុខាភិបាល មនុស្សគ្រប់គ្នា អាចជួបបញ្ហាស៊ាំនឹងអាំងស៊ុយលីន តាមការណែនាំអ្នកជួបបញ្ហានេះ គួរបរិភោគបន្លែ និងផ្លែឈើស្រស់ឱ្យបានច្រើន។លើសពីនេះ ធ្វើលំហាត់ប្រាណបានទៀងទាត់ក៏ជាមធ្យោបាយមួយល្អ ក្នុងការប្រឆាំងភាពស៊ាំនឹងអាំងស៊ុយលីន ដោយអាចហាត់ប្រាណ៣០ទៅ៤០នាទី ក្នុងមួយថ្ងៃ តែឈប់ជក់បារី និងកាត់បន្ថយការពិសារគ្រឿងស្រវឹង៕ អត្ថបទដកស្រង់ពី៖ Hello គ្រូពេទ្យ
