សុខភាព៖ នារីៗមួយចំនួនមានភាពមមាញឹកនឹងការងារ ក៏ដូចជាការរសុី ដូច្នេះគ្មានពេលវេលាគ្រប់គ្រាន់រកអាហារដែលល្អចំពោះសុខភាព ហើយពេលខ្លះមិនដឹងថាអាហារណាដែលល្អ ជាហេតុនាំឱ្យរាងកាយមិនមានសារធាតុចិញ្ចឹមគ្រប់គ្រាន់…។
អាហារទាំង៥ប្រភេទ ដែលអាចជួយបំពេញសារធាតុចិញ្ចឹមដល់រាងកាយស្ត្រីៗ៖ ១.ត្រីសាល់ម៉ុន៖ ត្រីសាល់ម៉ុន សម្បូរដោយអាស៊ីតខ្លាញ់អូមេហ្គា៣ ដែលជួយប្រឆាំងការរលាក និងការពារឆ្អឹង។ អ្នកជំនាញណែនាំថា ការបរិភោគសាច់ត្រីជំនួសសាច់សត្វពាហនៈពណ៌ក្រហម មានផលល្អសម្រាប់សុខភាព។ សម្រាប់ស្ត្រីមានផ្ទៃពោះ ត្រីសាល់ម៉ុន អាចជួយដល់ទារកច្រើន។ ២.ស៊ុត៖ ស៊ុតសម្បូរដោយសារធាតុចិញ្ចឹម និងជាចំណែកមួយនៃរបបអាហារសម្រាប់សុខភាព។ ស៊ុតមួយគ្រាប់ មានសារធាតុចិញ្ចឹមចាំបាច់ច្រើនប្រភេទ ក្នុងនោះរួមមាន សារធាតុប្រឆាំងអុកស៊ីតកម្ម ជាតិដែក វីតាមីន D ស័ង្កសី លូទីនហ្សេអាក្សង់ទីន ខូលីន និងប្រូតេអ៊ីន។
៣.គ្រាប់ Pistachios៖ ការសិក្សាបានលើកឡើងថា ការទទួលទានគ្រាប់ Pistachios១,៥អោនក្នុងមួយថ្ងៃ អាចជួយបន្ថយហានិភ័យជំងឺបេះដូង ដោយសារមានជាតិខ្លាញ់ និងកូលេស្តេរ៉ូលទាប។ លើសពីនេះ ជួយរក្សាទម្ងន់ព្រោះក្នុងមួយអោន មានកាឡូរីត្រឹមតែ១៦០កាឡូរី។ មួយវិញទៀត ក៏សម្បូរប្រូតេអ៊ីន និងជាតិសរសៃ។ សូមជ្រាបថា មួយអោនស្មើ៤៩គ្រាប់។ ៤.ផ្លែព្រូន (Prunes)៖ ផ្លែព្រូនមានសារធាតុបូរ៉ុន សារធាតុប៉ូលីហ្វេណុល ម៉ាញ៉េស្យូម ប៉ូតាស្យូម វីតាមីន K និងជាផ្លែឈើមានជាតិសរសៃខ្ពស់ ជួយដល់សុខភាពពោះវៀន ជាពិសេស សម្រាប់ស្ត្រីដែលមានបញ្ហាទល់លាមក ក្រពះពោះវៀន។ លើសពីនេះទៀត ការទទួលទានផ្លែព្រូន៥ទៅ៦ផ្លែ ក្នុងមួយថ្ងៃ ក៏អាចជួយដល់ឆ្អឹងរឹងឱ្យមាំក្រោយអស់រដូវ។
៥.យ៉ាអួ Greek ៖ យ៉ាអួ Greek មានជាតិកាល់ស្យូម និងប្រូតេអ៊ីន។ ការសិក្សាបានណែនាំថា ការបរិភោគប្រូតេអ៊ីនប្រហែល៣០ភាគរយនៃកម្រិតកាឡូរីប្រចាំថ្ងៃ អាចជួយសម្រកទម្ងន់ និងរក្សាសាច់ដុំ។ បន្ថែមពីនេះទៀត កាល់ស្យូមដែលទទួលបានពីយ៉ាអួ អាចជួយដល់សុខភាពឆ្អឹងឱ្យរឹងមាំ៕ អត្ថបទដកស្រង់ពី៖ Hello គ្រូពេទ្យ
