សុខភាព៖ ជំងឺឈឺសន្លាក់ អាចកើតឡើងចំពោះមនុស្សគ្រប់វ័យ វាបណ្ដាលមកពីកត្តាអាយុ ហ្សែន ការរងរបួស ឬជំងឺវិបត្តិប្រព័ន្ធភាពសុំា។ ភាពឈឺចាប់នៃរលាកសន្លាក់ពិបាកទ្រាំទាល់តែប្រើថ្នាំ តែដើម្បីជួយឱ្យការឈឺចាប់នេះកាន់តែឆាប់បាត់ លោកអ្នកអាចសាកទទួលទានផ្លែឈើទាំង៤ប្រភេទដែលមានរាយនាមដូចខាងក្រោមនេះ...។
១.ផ្លែម្នាស់៖ ផ្លែម្នាស់ មានផ្ទុកទៅដោយអង់ស៊ីមម្យ៉ាងឈ្មោះថា Bromelain វាជួយកាត់បន្ថយការផលិតសារធាតុរលាកក្នុងរាងកាយ និងរារាំងសកម្មភាពនៃកោសិការលាកមួយចំនួន។ ដូច្នេះ លោកអ្នកគួរបញ្ចូលផ្លែម្នាស់ទៅក្នុងរបបអាហារ ដើម្បីអាចកាត់បន្ថយរោគសញ្ញានៃជំងឺរលាកសន្លាក់ និងហើម។ ២.ផ្លែប៉ោម៖ ប៉ោម មិនត្រឹមតែជាផ្លែឈើមានរសជាតិផ្អែមឆ្ងាញ់ តែក៏ផ្តល់អត្ថប្រយោជន៍សុខភាពយ៉ាងច្រើនដល់សុខភាពលោកអ្នកនាងផងដែរ។ តួយ៉ាង ប៉ោមមួយផ្លែ សម្បូរទៅដោយសារធាតុ Quercetin មានមុខងារប្រឆាំងនឹងការរលាកបានយ៉ាងមានប្រសិទ្ធភាព ដែលជាជម្រើសល្អបំផុតមួយ ចំពោះលោកអ្នកនាងមានជំងឺឈឺសន្លាក់ គួរជ្រើសយកមកផ្លែប៉ោមមកទទួលទាន។
៣.ផ្លែក្រូច៖ ផ្លែក្រូច មិនត្រឹមតែផ្តល់អារម្មណ៍ស្រស់ស្រាយ តែក៏មានអត្ថប្រយោជន៍ ក្នុងការគ្រប់គ្រងរោគសញ្ញានៃជំងឺរលាកសន្លាក់ បានយ៉ាងល្អ ព្រោះវីតាមីន C មាននៅក្នុងផ្លែក្រូច បានដើរតួនាទីយ៉ាងសំខាន់ ក្នុងការកាត់បន្ថយការរលាកសន្លាក់ និងការពារប្រឆាំងនឹងអុកស៊ីតកម្ម។ ដូច្នេះ អ្នកមានបញ្ហាសន្លាក់ គួរទទួលទានផ្លែក្រូច ឬពិសាទឹកក្រូចស្រស់ ដើម្បីជួយធ្វើឱ្យសុខភាពសន្លាក់កាន់តែប្រសើរឡើងជាងមុន។
៤.ផ្លែឈើរី៖ បើនិយាយពីផ្លែឈើរីវិញ ក៏មិនចាញ់ផ្លែឈើទាំងបីខាងលើដែលបានរៀបរាប់នេះដែរ។ ផ្លែឈើរី អាចជួយគ្រប់គ្រងជំងឺរលាកសន្លាក់បានយ៉ាងល្អ ដោយសារសមាសធាតុផ្សំនៃ Anthocyanins ជាសារធាតុប្រឆាំងនឹងការរលាក និងអាចជួយកាត់បន្ថយការឈឺចាប់នៅក្នុងរាងកាយ។ តាមការសិក្សាជាច្រើន បានបង្ហាញថា ការទទួលទានផ្លែឈើរី ឬពិសាទឹកឈើរី អាចជួយកាត់បន្ថយការរលាក និងការឈឺចាប់ចំពោះអ្នកដែលមានជំងឺរលាកសន្លាក់៕ អត្ថបទដកស្រង់ពី៖ Hello គ្រូពេទ្យ
