រាជធានីភ្នំពេញ៖ ក្រុមហ៊ុន Olam Food Ingredients (OFI) មានមូលដ្ឋាននៅប្រទេសវៀតណាម និងបើកក្រុមហ៊ុនសាខានៅកម្ពុជា មានបំណងចង់ពង្រីកការវិនិយោគបន្ថែមទៀតលើការកែច្នៃស្វាយចន្ទីសម្រាប់នាំចេញ…។
ថ្លែងក្នុងជំនួបជាមួយលោកស្រី ចម និម្មល រដ្ឋមន្រ្តីក្រសួងពាណិជ្ជកម្ម កាលពីថ្ងៃទី១៧មីនា លោក ហ្គៅរ៉ាវ ប៉ាទីល (Gaurav Patil) អនុប្រធានជាន់ខ្ពស់ និងជានាយកក្រុមហ៊ុន Olam Food Ingredients (OFI) បានឱ្យដឹងថា មូលហេតុដែលលោកចង់ពង្រីកការវិនិយោគ ក៏ដោយសារពិនិត្យឃើញពីសក្តានុពលដ៏សម្បូរបែបរបស់កម្ពុជា ជាមួយនឹងស្ថិរភាពនៃស្ថានភាពសេដ្ឋកិច្ច និងនយោបាយ។ អ្នកជំនួញរូបនេះអះអាងថា លោកមានបំណងពង្រីកការវិនិយោគបន្ថែមនៅក្នុងប្រទេសកម្ពុជា ជាពិសេស ការកែច្នៃស្វាយចន្ទីនេះផ្ទាល់តែម្ដង។ ក្នុងន័យនេះ លោកស្នើសុំពង្រឹងកិច្ចសហការជាមួយក្រសួងពាណិជ្ជកម្ម ដើម្បីពិនិត្យលទ្ធភាពក្នុងការបង្កើតយន្តការអំណោយផល ដើម្បីជំរុញការកែច្នៃផលិតផលសក្តានុពលកម្ពុជា ឱ្យកាន់តែសម្បូរបែបជាបន្តបន្ទាប់នាពេលអនាគត។
លោកស្រី ចម និម្មល រដ្ឋមន្រ្តីក្រសួងពាណិជ្ជកម្ម បានប្រកាសស្វាគមន៍ លោក ហ្គៅរ៉ាវ ប៉ាទីល នាយកក្រុមហ៊ុន OFI ចំពោះទំនុកចិត្តក្នុងការវិនិយោគ និងបំណងពង្រីកសកម្មភាពអាជីវកម្មនៅកម្ពុជា ព្រមទាំងបានឯកភាពបន្តកិច្ចសហប្រតិបត្តិការជិតស្និទ្ធក្នុងការលើកកម្ពស់ ជំរុញ និងអភិវឌ្ឍវិស័យកែច្នៃស្វាយចន្ទីកម្ពុជា និងផលិតផលសក្តានុពលផ្សេងទៀតឱ្យកាន់តែរីកចម្រើន។
សូមជម្រាបថា ក្រុមហ៊ុន OFI មានមូលដ្ឋាននៅប្រទេសវៀតណាម ជាបុត្រសម្ព័ន្ធរបស់ក្រុមហ៊ុន Olam Group ជាក្រុមហ៊ុនធំមួយ មានទីស្នាក់ការកណ្តាលនៅប្រទេសសិង្ហបុរី និងកំពុងមានប្រតិបត្តិការជាង ៦០ប្រទេស ដោយមានជំនាញអាជីវកម្មម្ហូបអាហារ និងកសិ-ពាណិជ្ជកម្មឈានមុខគេ ដែលបានផ្គត់ផ្គង់ដល់អតិថិជននៅទូទាំងពិភពលោក។ ក្រុមហ៊ុន Olam Group ក៏បានចុះបញ្ជីបង្កើតក្រុមហ៊ុន Olam Outspan (Cambodia) នៅកម្ពុជាផងដែរ តាំងពីឆ្នាំ២០១៧ ក្នុងទិសដៅបន្តជំរុញ និងពង្រីកវិសាលភាពវិនិយោគបន្ថែម ទៅលើការកែច្នៃស្វាយចន្ទីកម្ពុជា និងដំណាំសក្តានុពលកម្ពុជាបន្ថែមទៀត រួមមាន៖ ស្វាយ, ទុរេន, ម្នាស់ជាដើម៕
