រាជធានីភ្នំពេញ៖ ក្នុងរយៈពេលជាង៦ខែមន្ទីរបរិស្ថានរាជធានី-ខេត្ត បណ្តុះកូនឈើបានចំនួន៦១ម៉ឺន២១៥ដើម សម្រាប់យុទ្ធនាការចែកជូនប្រជាពលរដ្ឋដោយឥតគិតថ្លៃ ដើម្បីជំរុញយុទ្ធសាស្ត្រភាពបៃតងរបស់កម្ពុជាដែលបានដាក់ចេញកាលពីថ្ងៃទី១០ ខែតុលា ឆ្នាំ២០២៣ ។ នេះបើយោងតាមការឱ្យដឹងពី ក្រសួងបរិស្ថានកាលពីថ្មីៗនេះ។
ក្រសួងបរិស្ថាន បានគូសបញ្ជាក់ឱ្យដឹងថា យុទ្ធសាស្ត្រភាពបៃតងរបស់កម្ពុជា ត្រូវបានរៀបចំឡើងស្របតាមយុទ្ធសាស្ត្រចក្រាវិស័យបរិស្ថាន ដែលបានដាក់ចេញអនុលោមតាមយុទ្ធសាស្ត្របញ្ចកោណ ដំណាក់កាលទី១ នៃរាជរដ្ឋាភិបាលនីតិកាលទី៧ ក្រោមការដឹកនាំដ៏ឈ្លាសវៃ របស់សម្ដេចមហាវបរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដើម្បីឈានឆ្ពោះទៅ សម្រេចទស្សនវិស័យ បង្កើនគម្របព្រៃចំនួន៦០ភាគរយនាឆ្នាំ២០៥០។ ប្រភពដដែលបានឱ្យដឹងបន្តថា ក្រសួងបានរៀបចំបណ្តុះកូនឈើនៅតាមបណ្តាមន្ទីរបរិស្ថានរាជធានី-ខេត្ត សម្រាប់យុទ្ធនាការចែកកូនឈើយ៉ាងតិច១លានដើមក្នុងមួយឆ្នាំជូនប្រជាពលរដ្ឋដោយឥតគិតថ្លៃដើម្បីដាំស្តារព្រៃដាំនៅតាមគេហដ្ឋាន និងតាមមូលដ្ឋានចាប់ពីដើមរដូវវស្សា ឆ្នាំ២០២៤ តទៅ។
ដោយគិតត្រឹមថ្ងៃទី៣០ ខែមីនា ឆ្នាំ២០២៤ នេះកូនឈើសរុបចំនួន ៦១០២១៥ ដើម ត្រូវបានបណ្តុះនៅតាមថ្នាលបណ្ដុះកូនឈើរបស់មន្ទីរបរិស្ថានរាជធានី-ខេត្ត និងបានចែកជូនប្រជាពលរដ្ឋបានចំនួន២០៥ ៤៨៨ ដើម ទៅតាមបណ្តាស្នាក់ការឧទ្យានុរក្ស សាលារៀន វត្តអារាម អង្គការ ប៉ុសិ៍រដ្ឋបាល ចំការឈើប្រណិត ក្រុមយុវជន និងតាមតំបន់មួយចំនួនទៀតនៅទូទាំងប្រទេស។ ក្នុងយុទ្ធនាកាចែកកូនឈើសម្រាប់ឆ្នាំ២០២៤នេះ សម្រេចបានជោគជ័យដោយសារតែទទួលបានកូនឈើចំនួនជាង៣០ម៉ឺនដើម ដែលជាអំណោយដ៏ថ្លៃថ្លារបស់ ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន និងចំនួនកូនឈើដែលបានបណ្តុះនៅតាមថ្នាល រួមនឹងកូនឈើដែលបានចែកជូនប្រជាពលរដ្ឋមានរហូតដល់ជាង១លានដើមរួចទៅហើយ។
សូមជម្រាបថា រដ្ឋមន្រ្តីក្រសួងបរិស្ថាន បានដាក់ចេញនូវវិធានការចំនួន៤ សម្រាប់ការគ្រប់គ្រងធនធានធម្មជាតិ និងការអភិរក្សជីវៈចម្រុះ និងការអភិវឌ្ឍប្រកបដោយចីរភាពឱ្យមានប្រសិទ្ធភាពរួមមាន៖ ការអនុវត្តច្បាប់១០០ភាគរយមិនអត់ឱនចំពោះឧក្រិដ្ឋកម្មធនធានធម្មជាតិ និងពង្រឹងសហការឱ្យកាន់ស្អិតរមួតជាមួយអាជ្ញាធរមូលដ្ឋានគ្រប់ថ្នាក់។ ទប់ស្កាត់បទល្មើសធនធានធម្មជាតិ ក៏ដូចជាសហការជាមួយអង្គភាពប្រឆាំងអំពើពុករលួយ និងបញ្ជាការដ្ឋានកងរាជអាវុធហត្ថលើផ្ទៃប្រទេស ដើម្បីពង្រឹងការអនុវត្តច្បាប់បន្ថែមទៀត និងបង្កើតផែនការដាំដើមឈើឡើងវិញ និងការគ្រប់គ្រងព្រៃឈើដោយនិរន្តរភាព៕
