
សុខភាព៖ ជំងឺត្រអក ធ្វើឱ្យស្បែករលាក រមាស់ ឡើងក្រហម ស្ងួត ប្រេះ មានពងទឹក និងរបក។ ភាគច្រើនអ្នកកើតត្រអកមានបញ្ហាប្រតិកម្មចំណីអាហារ ដូច្នេះគួរចៀសវាងអាហារដូចជា ផ្លែឈើអម្បូរក្រូច ផ្លែប៉េងប៉ោះ ផ្លែស្ត្របឺរី ស៊ុត ផលិតផលពីទឹកដោះគោ សូកូឡា សណ្តែកដី គ្រាប់ផ្លែឈើ សណ្តែកសៀង ស្រូវសាលី គ្រឿងសមុទ្ទ និងគ្រឿងស្រវឹង ព្រោះអាហារទាំងនេះ ធ្វើឱ្យស្បែកមានប្រតិកម្ម រួចឡើងត្រអក ឬធ្វើឱ្យជំងឺត្រអកកាន់តែធ្ងន់ធ្ងរ...។

ដើមហេតុដែលបង្កឱ្យមានកើតត្រអក ១.ស្ត្រេស ឬភាពតានតឹង៖ស្ត្រេសដែលបង្កឡើងដោយភាពនឿយហត់ ក្ដីបារម្ភ ការថប់បារម្ភ មួរម៉ៅ គេងមិនគ្រប់គ្រាន់ ឬសម្ពាធការងារ ក៏អាចបង្កឱ្យយើងកើតត្រអកដែរ។ ២.ប្រព័ន្ធភាពសុំាសកម្មខ្លាំង៖បើយើងកើតត្រអក ប្រព័ន្ធភាពសុំាមានប្រតិកម្មយ៉ាងខ្លាំង ជាមួយសារធាតុបង្កអាលែកហ្ស៊ី។ នៅពេលប្រព័ន្ធភាពសុំាសកម្មខ្លាំង ឬធ្វើការខ្លាំងនឹងបង្កឱ្យស្បែក ក៏ដូចជារាងកាយមានការរលាក។

៣.កត្តាហ្សែន៖ យើងអាចងាយនឹងកើតត្រអក បើមានប្រវត្តិគ្រួសារកើតត្រអក ហឺត ឬប្រតិកម្មជាមួយចំណីអាហារជាតិអាល់កុល ឬសារធាតុបង្ក អាលែកហ្ស៊ីដូចជា លម្អងផ្កា ធូលីដី ឬរោមសត្វជាដើម។ ៤.កត្តាបរិស្ថាន៖ផ្សែងបារី ខ្យល់កខ្វក់ ខ្យល់ស្ងួត (ខ្វះសំណើមក្នុងបរិយាកាស) សាប៊ូមានជាតិកាត់ខ្លាំង ផលិតផលថែរក្សាស្បែកមួយចំនួន ឬប្រភេទក្រណាត់ដូចជា រោមចៀមជាដើម សុទ្ធតែអាចធ្វើឱ្យស្បែកស្ងួត រមាស់ និងរលាក៕ដកស្រង់ពី៖ ហេទ្បូគ្រូពេទ្យ



