សុខភាព៖ ពិតណាស់ ស្រីៗតែងចង់បានស្បែកភ្លឺស្រស់ថ្លា ទន់ម៉ត់រលោង តែថាមិនងាយបានស្អាតទេ បើសិនជាមិនដឹងពីតិចនិចក្នុងការថែទាំ។ ចៀសវាងមានការសោកស្ដាយទៅថ្ងៃក្រោយ ថ្ងៃនេះ SBM News នឹងជម្រាបជូនពីវិធីងាយៗ ក្នុងការផ្លាស់ប្ដូរស្បែកមុខត្រឹមពេលមួយសប្ដាហ៍…។
១.គ្រប់គ្រងស្រ្តេស៖ នៅពេលគិតច្រើន ធ្វើការច្រើន ឬមានបញ្ហាស្រ្តេស នឹងប្រឈមកើតមុន។ យកល្អ ស្វែងរកវិធីសាស្ត្រផ្សេងៗ ដើម្បីបន្ធូរអារម្មណ៍ ដូចជា ស្ដាប់ចំរៀង អានសៀវភៅ ឬមើលភាពយន្ត និងគេងឱ្យបានគ្រប់គ្រាន់ គឺជារឿងសំខាន់បំផុតដែលធ្វើឱ្យស្បែកភ្លឺថ្លា។ ២.ធ្វើលំហាត់ប្រាណ និងពិសាទឹកឱ្យបានច្រើន៖ ការធ្វើលំហាត់ប្រាណជាទៀងទាត់ គឺជួយបង្កើនចលនាឈាមរត់ ដែលជួយផ្ដល់នូវអុកស៊ីសែនដល់កោសិកាស្បែក។ ចំណែកទឹកដែលរាងកាយមិនអាចខ្វះបាន គឺការពិសាទឹកគ្រប់គ្រាន់ នឹងធ្វើឱ្យស្បែកភ្លឺស្រស់ថ្លា និងមានសុខភាពល្អ ដូច្នេះ សូមទទួលទានទឹកឱ្យបាន៨កែវក្នុងមួយថ្ងៃ។ ៣.ចៀសវាងអាហារមិនល្អ៖ អាហារ គឺជាផ្នែកមួយដ៏សំខាន់ ដើម្បីឱ្យស្បែកទទួលបានភាពស្អាត ភ្លឺថ្លា និងក្មេងជាងវ័យ។ ប្រសិនបើយើងចូលចិត្តទទួលទានអាហារ ដែលមានជាតិខ្លាញ់ច្រើន ឬអាហារចៀន ស្បែកនឹងងាយកើតមានបញ្ហាមុន។
៤.កំណត់ប្រភេទស្បែក៖ ស្បែកមុខមាន៥ប្រភេទ គឺស្បែកស្ងួត ប្រេង ចម្រុះ ធម្មតា និងស្បែកងាយប្រតិកម្ម។ វាជារឿងចាំបាច់មួយ ដែលយើងត្រូវដឹងថា តើយើងមានស្បែកមុខប្រភេទណា មុនពេលចាប់ផ្ដើមថែទាំ។ ការថែទាំស្បែកត្រឹមត្រូវ ទៅតាមប្រភេទស្បែក នឹងធ្វើឱ្យយើងទទួលប្រសិទ្ធភាពយ៉ាងឆាប់រហ័ស។ ៥.លាងសម្អាតស្បែក៖ ការលាងសម្អាតស្បែក គឺជារឿងចាំបាច់បំផុត ដែលយើងម្នាក់ៗ មិនគួរមើលរំលង។ ជ្រើសរើសសាប៊ូលាងមុខដែលគ្មានសារជាតិកាត់ ដើម្បីកម្ចាត់ធូលីដី ភាពកខ្វក់ គ្រឿង Makeup និងជាតិប្រេង។ បន្ទាប់មកជូតមុខថ្នមៗ ដោយប្រើកូនកន្សែងស្អាត ចៀសវាងជូតមុខខ្លាំងៗ ដែលធ្វើឱ្យស្បែករលាក ឬក្រហាយ។ ៦.ទឹកជូតមុខ៖ បន្ទាប់ពីលាងសម្អាតស្បែករួច ប្រើទឹកជូតមុខដែលត្រូវនឹងប្រភេទស្បែករបស់យើង ដោយចាក់ទឹកជូតមុខនៅលើសំឡី រួចជូតស្រាលៗនៅលើមុខឱ្យសព្វល្អ។
៧.ប្រើឡេការពារកម្ដៅថ្ងៃ៖ កម្ដៅថ្ងៃគឺជាភ្នាក់ងារបំផ្លាញស្បែកយ៉ាងធ្ងន់ធ្ងរ ដែលអាចបង្កទៅជាជំងឺមហារីកស្បែក។ ហេតុនេះហើយ ការលាបឡេការពារកម្ដៅថ្ងៃជាប្រចាំ ទោះបីជាយើងនៅក្នុងផ្ទះ ឬចេញខាងក្រៅក៏ដោយ នឹងធ្វើឱ្យស្បែកមានសុខភាពល្អ ចៀសឆ្ងាយពីបញ្ហាស្បែកផ្សេងៗ។ ៨.ប្រើក្រែមការពារស្នាមជ្រីវជ្រួញក្រោមភ្នែក៖ ដោយសារក្រោមភ្នែក គឺជាផ្នែកដែលស្តើងបំផុតនៃស្រទាប់ស្បែក ដូចនេះ វាត្រូវការសំណើមជាងផ្នែកផ្សេងទៀត។ សូមប្រើក្រែមការពារស្នាមជ្រីវជ្រួញក្រោមភ្នែក ដោយលាបថ្នមៗនៅខាងក្រោមភ្នែក កន្ទុយភ្នែក និងលើត្របកភ្នែក។ ៩.ផ្ដល់សំណើមដល់ស្បែក៖ ប្រើក្រែមផ្ដល់សំណើម ដើម្បីបំពេញជាតិទឹក និងធ្វើឱ្យស្បែកមានសុខភាពល្អ ចាកឆ្ងាយពីភាពជ្រីវជ្រួញ និងស្បែកស្រអាប់៕ ដកស្រង់ពីហេទ្បូគ្រូពេទ្យ
