សុខភាព៖ នៅពេលដែលសក់មានភាពទន់ ក្រាស់ រឹងមាំ និងភ្លឺរលោង ក៏អាចជួយលើកសម្រស់ដែរ។ដូច្នេះបើចង់បានសក់ដែលមានសុខភាពល្អ ហើយមិនចំណាយពេលវេលា និងថវិកាច្រើន លោកអ្នកគ្រាន់តែសាកប្រើម៉ាសអប់ផ្សំពីការ៉ុត…។
ការ៉ុតមានអត្ថប្រយោជន៍ចំពោះសក់ដូចជា៖ ១.បង្ការសក់ស្កូវមុនអាយុ៖ ផ្លែការ៉ុត ឬប្រេងការ៉ុត សម្បូរទៅដោយសារធាតុប្រឆាំងអុកស៊ីតកម្មខ្លាំង Beta-carotene វីតាមីន E និងវីតាមីន C ដែលអាចកាត់បន្ថយស្តេ្រសអុកស៊ីតកម្មនៅលើសរសៃសក់ ក៏ដូចជាបង្ការបញ្ហាសក់ថ្កូវមុនវ័យ។ ២.កាត់បន្ថយការកើតអង្គែ៖ ការ៉ុត មានសមត្ថភាពក្នុងការប្រឆាំងនឹងការរលាក ដែលអាចជួយគ្រប់គ្រងបញ្ហាកើតអង្គែ។ ៣.ប្រឆាំងការជ្រុះសក់៖ វីតាមីនA នៅក្នុងផ្លែការ៉ុត អាចជួយប្រឆាំងបញ្ហាសក់ជ្រុះ បានយ៉ាងមានប្រសិទ្ធភាព។ ជាក់ស្តែង យោងតាមការសិក្សាមួយ បានបង្ហាញថា កង្វះវីតាមីនA អាចធ្វើឱ្យសក់ស្ងួត និងស្តើង។ ហេតុនេះហើយ គ្នាគួរបញ្ចូលផ្លែការ៉ុតនៅក្នុងទម្លាប់ថែទាំសរសៃជាប្រចាំ ដើម្បីជួយឱ្យសក់ដុះកាន់តែក្រាស់ស្អាត។ ៤.បញ្ចៀសការឆ្លងមេរោគនៅលើស្បែកក្បាល៖ ប្រេងការ៉ុត គឺជាភ្នាក់ងារកម្ចាត់បាក់តេរី និងផ្សិតដ៏អស្ចារ្យ ពីព្រោះវាផ្ទុកសារធាតុ carotol, lycopene, caffeic acid, polyacetylenes និង anthocyanin ដែលជួយរឹតត្បិតសកម្មភាពអតិសុខុមប្រាណ ឬការពារការរីកលូតលាស់នៃការកើតស្រែង រលាករន្ធសក់ និងការកើតមុននៅលើស្បែកក្បាល។
តែយ៉ាងណា លោកអ្នកអាច ធ្វើម៉ាសអប់សក់ ផ្សំពីការ៉ុតបានរួមមាន៖ គ្រឿងផ្សំ៖ ការ៉ុត២ផ្លែ ផ្លែបឺរកន្លះផ្លែ និងទឹកឃ្មុំ២ស្លាបព្រាបាយ។ វិធីធ្វើ៖ កាត់ផ្លែការ៉ុត២ផ្លែ និងផ្លែបឺរកន្លះផ្លែ ជាដុំតូចៗដោយកិនឱ្យម៉ត់ល្អ ទើបបន្ថែមទឹកឃ្មុំចំនួន២ស្លាបព្រាបាយ រួចកូរឱ្យសព្វល្អ។ បន្ទាប់មក លាបនៅលើស្បែកក្បាល និងផ្អាប់សក់ ដោយទុកចោលរយៈពេល៣០នាទី លាងជម្រះចេញជាមួយ សាប៊ូកក់សក់។ ចំណែក រូបមន្តមួយទៀត គ្រឿងផ្សំ៖ ការ៉ុតចំនួន១ផ្លែ ប្រេងអូលីវ២ស្លាបព្រាបាយ ខ្ទឹមបារាំង១ផ្លែ និងទឹកក្រូចឆ្មារ២ស្លាបព្រាបាយ។ វិធីធ្វើ៖ កាត់ខ្ទឹមបារាំង និងការ៉ុតជាដុំតូចៗ រួចកិនឱ្យម៉ត់បន្ថែមទឹកក្រូចឆ្មារ និងប្រេងអូលីវ២ស្លាបព្រាបាយ។ បន្ទាប់មកអប់ទុកនៅលើសក់ប្រមាណជា១៥នាទី រួចប្រើសាប៊ូកក់សក់លាងជម្រះចេញរួចជាការស្រេច៕ ដកស្រង់៖ពីហេទ្បូគ្រូពេទ្យ
