សុខភាព៖ ជាធម្មតាការងូតទឹកសម្អាតខ្លួនជាមួយសាប៊ូ នឹងធ្វើរាងកាយគ្រប់ផ្នែកស្អាត និងមានក្លិនក្រអូប តែផ្ទុយទៅវិញបើនៅតែមានក្លិនក្លៀកមិនល្អ គឺអាចមកពីមូលហេតុ៥យ៉ាង ដែលមានដូចខាងក្រោមនេះ…។
១.ឆ្លងមេរោគ៖ នៅពេលមានមុន ឬមានខ្ទុះនៅក្រោមក្លៀក អាចជាមូលហេតុមួយ បង្កឱ្យមានក្លិនក្លៀក ទោះបានងូតទឹកសម្អាតហើយក៏ដោយ។ មួយវិញទៀត នៅពេលកោរ ឬបករោមក្លៀករួច មិនសម្អាតបានត្រឹមត្រូវ វាក៏ជាឱកាសល្អមួយសម្រាប់បាក់តេរីមិនល្អ ចូលទៅបង្ករោគតាមរន្ធញើស ឬរន្ធរោម។ ២.ក្លៀកមានបាក់តេរីមិនល្អ៖ នៅគ្រប់ផ្នែកលើរាងកាយ រួមទាំងក្លៀក សុទ្ធតែមានបាក់តេរីកល្អ និងអាក្រក់។ បាក់តេរីទាំងនេះ ស្ថិតក្នុងស្ថានភាពតុល្យភាព ឬមានកម្រិតស្មើគ្នា ប៉ុន្តែបើយើងមិនចេះតិចនិកសម្អាតត្រឹមត្រូវទេ វាអាចបណ្ដាលឱ្យបាក់តេរីអាក្រក់កើនឡើង ហើយធ្វើឱ្យមានក្លិនក្លៀក។៣.ប្រើផលិតផលបំបាត់ក្លិនខុស៖ មនុស្សភាគច្រើននិយមប្រើផលិតផលបំបាត់ក្លិនក្លៀក បន្ទាប់ពីងូតទឹករួចពេលព្រឹក ពោលគឺពេលរៀបចេញទៅធ្វើការ ។ល។ ប៉ុន្តែតាមពិតទៅ ប្រើផលិតផលបំបាត់ក្លិនក្លៀកមិនល្អពេលព្រឹក គឺមិនត្រឹមត្រូវទេ។
ពពួកផលិតផលបំបាត់ក្លិនក្លៀក មានប្រសិទ្ធភាពបំផុតនៅពេលយើងប្រើវាពេលយប់ ពេលរៀបចូលគេង។ នេះបើតាមការឱ្យដឹងពីវេជ្ជបណ្ឌិតម៉ារីហ្សា ហ្កាស៊ីគ (Marisa Garshick) ជំនួយកាយសាស្ត្រាចារ្យផ្នែកព្យាបាលជំងឺសើស្បែក នៅមន្ទីរពេទ្យ Cornell-New York Presbyterian Medical Center។ ៤.រោមក្លៀក៖ រោមក្លៀក ធ្វើឱ្យញើសផ្អាប់ក្នុងក្លៀកខ្លាំង ជាងស្បែកទទេទៅទៀត ដូចនេះ ពេលយើងបែកញើសច្រើន វាអាចបណ្ដាលឱ្យផ្អាប់ជាមួយបាក់តេរី បង្កជាក្លិនស្អុយ។ ម៉្យាងវិញទៀត ក៏ពិបាកនឹងសម្អាតឱ្យគ្រប់ជ្រុងជ្រោយដែរ បើសិនក្លៀកយើងមានរោមក្រាស់។ ៥.ចាប់ផ្ដើមប្រើប្រាស់ថ្នាំមួយចំនួន៖ បើយើងសង្កេតឃើញថា ក្រោយពេលចាប់ផ្ដើមប្រើថ្នាំថ្មីៗ ហើយខ្លួនមានក្លិនមិនល្អ ខុសធម្មតា វាប្រហែលជាមកពីថ្នាំដែលយើងប្រើនឹងហើយ។ ថ្នាំមួយចំនួនដូចជា ថ្នាំសម្រាប់ប្រើព្យាបាលជំងឺបាក់ទឹកចិត្ត ឬជំងឺវង្វេងវង្វាន់ អាចបណ្ដាលឱ្យយើងបែកញើសខ្លាំង បង្កក្លិនខ្លួន ឬក្លិនក្លៀក។
ដោយទ្បែក បើនិយាយពីរូបមន្តធម្មជាតិ បំបាត់ក្លិនក្លៀកមានដូចជា ប្រេងដូង៖ជ្រើសរើសយកប្រេងដូងប្រភេទស្ងួត ហើយលោកអ្នកឆ្កឹះវាតាមបរិមាណក្លៀក យកមកលាប ក្រោយពីងូតទឹកសម្អាតខ្លួនរួច។ បើនិយាយឱ្យងាយស្ដាប់ អាចប្រើប្រាស់ជំនួស ផលិតផលលុញក្លៀក បំបាត់ក្លិនបាន។ លោកអ្នក អាចធ្វើបែបនេះបាន២ទៅ៣ដងជារៀងរាល់ថ្ងៃ ព្រោះប្រេងដូងអាចកម្ចាត់បាក់តេរី យ៉ាងរហ័ស និងធ្វើឱ្យកោសិកាងាប់លើក្លៀកជ្រុះ យ៉ាងមានប្រសិទ្ធភាព។ មួយវិញទៀត ម្សៅសូដា Baking Soda៖ លោកអ្នកអាចរកបាននៅតាមផ្សារទំនើបនានា នៅក្នុងប្រទេសកម្ពុជា។ ការលាយល្បាយម្សៅសូដា ដើម្បីបំបាត់ក្លិនក្លៀក មានភាពងាយស្រួលមែនទែន ដោយគ្រាន់តែដួសម្សៅសូដាមួយស្លាបព្រាបាយ ទឹកក្រូចឆ្មារមួយស្លាបព្រា កូរចូលគ្នាឱ្យក្លាយទៅជាល្បាយតែមួយ។ បន្ទាប់មកយកល្បាយនេះ មកលាបលើក្លៀក ទុកចោលប្រមាណ២ទៅ៣នាទី រួចលាងទឹកចេញ។
អាចអនុវត្តបែបនេះ ជារៀងរាល់ថ្ងៃ នោះនឹងឃើញលទ្ធផល ក្លៀករបស់លោកអ្នកនឹងស្បើយក្លិនបន្តិចម្ដងៗ។ ចំពោះ បន្ទាលកន្ទុយក្រពើ៖ ចិតសំបកចេញឆ្កឹះយកជែលបន្ទាលកន្ទុយក្រពើ មកលាបលើក្លៀកទាំងសងខាង ផ្អាប់ទុកចោលមួយយប់ រួចលាងចេញជាមួយទឹកនៅពេលព្រឹក។ អាចអនុវត្តបានជាប្រចាំថ្ងៃ ព្រោះថា វាមានសារធាតុអែនឌីអុកស៊ីឌែន ជួយបំបាត់ការបែកញើស ដែលបណ្ដាលឱ្យមានក្លិន៕ ដកស្រង់ពី៖ ហេទ្បូ គ្រូពេទ្យ
