សុខភាព៖ ស្ត្រេសការងារធ្ងន់ធ្ងរ កើតឡើងនៅពេលលោកអ្នក មិនអាចគ្រប់គ្រងស្ត្រេសបាន និងបណ្តោយឱ្យការស្ត្រេសកាន់តែយូរមិនរកដំណោះស្រាយ នោះនឹងលេចចេញសញ្ញា៨យ៉ាង។ តែយ៉ាងណា ចំពោះបញ្ហានេះ SBN News នឹងជម្រាបពីអាការទាំងនោះឱ្យលោកអ្នកបានជ្រាប ក៏ដូចជាវិធីដោះស្រាយ...។
សញ្ញាបញ្ជាក់ថា ស្ត្រេសការងារធ្ងន់ធ្ងរ រួមមាន៖ ១.មានបញ្ហាក្នុងការគេង៖ ស្ត្រេសការងារធ្ងន់ធ្ងរ អាចនាំឱ្យពិបាកគេង ឬគេងច្រើនជ្រុល ដែលសុទ្ធតែបង្កផលប៉ះពាល់ទាំងសុខភាពផ្លូវកាយ និងផ្លូវចិត្ត។ ហេតុនេះ លោកអ្នកគួរគេងយ៉ាងហោចណាស់ ឱ្យបាន៧ម៉ោងក្នុងមួយថ្ងៃ ទើបជាការប្រសើរ។ ២.ប្រព្រឹត្តកំហុសឆ្គងតូចតាច៖ កំហុសឆ្គងតូចតាចនៅកន្លែងធ្វើការងារ ដែលរួមមាន ភ្លេចធ្វើកិច្ចការ ឬភ្លេចថ្ងៃដែលត្រូវដាក់ឯកសារ អាចបង្កជាហានិភ័យដល់យើងបាន។ បើប្រព្រឹត្តកំហុសឆ្គងបែបនេះ ញឹកញាប់ គួររកវិធីដោះស្រាយ។ ៣.មានអារម្មណ៍ឯកោ៖ ស្ត្រេសការងារធ្ងន់ធ្ងរ អាចធ្វើឱ្យមានអារម្មណ៍ឯកោ និងគិតថា គ្មានអ្នកណាគាំទ្រយើងទេ។ អារម្មណ៍បែបនេះ អាចនឹងប្រសើរវិញ ប្រសិនបើពិភាក្សាជាមួយអ្នកផ្សេងទៀត ឬព្យាយាមចូលរួមនៅក្នុងសង្គម។
៤.នឿយទាំងហត់ចិត្ត និងកាយ៖ មានអារម្មណ៍ថា នឿយហត់ទាំងផ្លូវកាយ ផ្លូវចិត្ត និងស្មារតី គឺបណ្ដាលមកពីស្ត្រេស ឬរឿងរ៉ាវប៉ះទង្គិចផ្លូវចិត្តណាមួយ។ អារម្មណ៍បែបនេះ អាចកើតឡើងដោយសារតែសម្ពាធការងារ ធ្វើការរយៈពេលយូរម៉ោង បរិយាកាសជុំវិញខ្លួន និងខ្វះខាតធនធាន។ ៥.មានអារម្មណ៍កើតទុក្ខខ្លាំង៖ ប្រសិនបើតែងមានអារម្មណ៍ខ្វះទំនុកចិត្តលើខ្លួនឯង ញឹកញាប់ ឬមិនសប្បាយចិត្តជាប្រចាំ នោះអាចជាសញ្ញានៃស្ត្រេសការងារធ្ងន់ធ្ងរ។ ៦.ភ្លេចភ្លាំងច្រើន ឬពិបាកផ្ដោតអារម្មណ៍៖ ស្ត្រេសការងារធ្ងន់ធ្ងរ ក៏អាចនាំឱ្យមានភាពច្របូកច្របល់ ភ្លេចភ្លាំង និងពិបាកផ្ដោតអារម្មណ៍។មួយវិញទៀត នៅពេលដែលលោកអ្នកគេងមិនគ្រប់គ្រាន់ ធ្វើការងារច្រើន ស្ត្រេស និងប្រើប្រាស់អ៊ីនធើណែតច្រើនជ្រុល ក៏អាចបង្កជាបញ្ហានេះដែរ។
៧.ឆេវឆាវដោយខ្វះការពិចារណា៖ ពេលស្ត្រេសការងារធ្ងន់ធ្ងរ យើងអាចមានអារម្មណ៍ខឹងមួម៉ៅ ចំពោះរឿងរ៉ាវតូចតាច ដោយមានការយល់ច្រឡំនឹងសកម្មភាព ឬការនិយាយស្ដីរបស់បុគ្គលិកផ្សេងទៀត។ តែយ៉ាងណាចំពោះ គន្លឹះជួយកាត់បន្ថយស្ត្រេសការងារធ្ងន់ធ្ងរ អាចធ្វើសកម្មភាពដូចជា៖ ពិគ្រោះយោបល់ជាមួយប្រធានផ្នែក ដើម្បីរកដំណោះស្រាយដ៏សមស្របមួយ និងស្វែងរកជំនួយពីមិត្តរួមការងារ មិត្តភក្ដិ ឬមនុស្សជាទីស្រឡាញ់។ លើសពីនេះ ហាត់យូហ្គា ធ្វើសមាធិ ហាត់ប្រាណជាប្រចាំ និងព្យាយាមគេងឱ្យបានគ្រប់គ្រាន់ឡើងវិញ៕ ដកស្រង់ពី៖ ហេទ្បូគ្រូពេទ្យ
