សុខភាព៖ វ័យ៦៥ឆ្នាំ សុខភាពរាងកាយងាយនឹងចាប់ផ្តើមទ្រុឌទ្រោម ទើបការថែទាំសុខភាពគឺជារឿងសំខាន់ណាស់។ ចំពោះទម្លាប់ល្អៗដែលត្រូវធ្វើក្នុងវ័យនេះដើម្បីធានាថា ទទួលបានសុខភាពល្អ និងរាងកាយរឹងមាំ គឺមាន៦យ៉ាងដូចខាងក្រោម។
១.តាមដានមុខងាររាងកាយឱ្យបានដិតដល់៖ សូមកត់សម្គាល់នូវអ្វីដែលមានភាពខុសប្លែកលើរាងកាយ ប្រសិនបើមានរោគសញ្ញាមិនប្រក្រតីណាមួយ សូមទៅជួបជាមួយគ្រូពេទ្យភ្លាមៗ និងត្រូវអនុវត្តវិធានការសុខភាព ដើម្បីការពារខ្លួនឱ្យមានសុខភាពល្អតាមការណែនាំរបស់អ្នកជំនាញ។ ២.អនុវត្តតាមកាលវិភាគឱ្យបានខ្ជាប់ខ្ជួន៖ មានពេលទំនេរច្រើន ប៉ុន្តែប្រសិនបើមិនសូវធ្វើអ្វីសោះ អាចនឹងមានអារម្មណ៍អសកម្ម និងខ្ជិលច្រអូស។ដូច្នេះហើយ ត្រូវកំណត់កាលវិភាគប្រចាំថ្ងៃ ឱ្យបានច្បាស់លាស់ និងធ្វើសកម្មភាពផ្សេងៗ ដែលខ្លួនយើងចូលចិត្តទៅតាមកាលវិភាគនោះ។ ៣.ធ្វើតាមតម្រូវការរបស់រាងកាយ៖គួរស្ដាប់តាមតម្រូវការរបស់រាងកាយ និងអារម្មណ៍។ ប្រសិនបើមានអារម្មណ៍ហត់នឿយ ឬមិនចង់ធ្វើលំហាត់ប្រាណ គួរសម្រាកមួយថ្ងៃសិនពីព្រោះវាគឺជាផ្នែកដ៏សំខាន់ ដើម្បីឱ្យយើងមានសុខភាពល្អ និងមានភាពរីករាយ។ បន្ថែមពីនេះ ចូរគេងយ៉ាងហោចណាស់៧ទៅ៩ម៉ោង ក្នុងមួយយប់ទើបជាការប្រសើរល្អ។
៤.ធ្វើលំហាត់ប្រាណសរសៃឈាមបេះដូងឱ្យបានទៀងទាត់៖ ការធ្វើលំហាត់ប្រាណជំនួយដល់សរសៃឈាមបេះដូង ដូចជាការដើរ រត់ ហែលទឹក ។ល។ អាចបង្កើតចង្វាក់បេះដូង និងជួយឱ្យមានរាងកាយសមសួនផងដែរ។ ៥. ណាត់ជួបជាមួយគ្រូពេទ្យជាប្រចាំ៖ នៅពេលមានវ័យកាន់តែច្រើន ងាយនឹងកើតជំងឺជាក់លាក់មួយចំនួន ដូចជា ជំងឺបេះដូង និងជំងឺចាស់វង្វាន់។ការណាត់ជួបជាមួយគ្រូពេទ្យជាប្រចាំ អាចនឹងដោះស្រាយបញ្ហាសុខភាពធ្ងន់ធ្ងរ បានទាន់ពេលវេលា ក៏ដូចជារក្សាសុខភាពឱ្យនៅរឹងមាំល្អ។ ៦.ពិសាអាហារសុខភាពជាទៀងទាត់៖ អាហារដែលមានគុណភាពខ្ពស់ មានសារសំខាន់ណាស់ក្នុងការថែរក្សាសុខភាព ក្រោយឈានដល់អាយុ៦៥ឆ្នាំ។ នៅពេលដែលមានអាយុច្រើន ផ្លែឈើស្រស់ និងបន្លែ គឺជាអាហារដែលផ្ដល់ជាតិសរសៃខ្ពស់ ដែលត្រូវការជាចាំបាច់។អាហារដែលសម្បូរទៅដោយសារធាតុចិញ្ចឹមដូចជា ផ្លែឈើ បន្លែ និងប្រូតេអ៊ីនគ្មានខ្លាញ់ អាចផ្ដល់ថាមពល និងកាត់បន្ថយហានិភ័យនៃការកើតជំងឺនានា៕ ដកស្រង់ពី៖ ហេទ្បូគ្រូពេទ្យ
