សុខភាព៖ កំលុងពេលធ្វើដំណើរមិនថាជិត-ឆ្ងាយ និងការប្រែប្រួលអាកាសធាតុ អាចប៉ះពាល់ទៅដល់សុខភាពស្បែក ដែលពេលខ្លះបង្កទៅជាការកើតមុន ឬធ្វើឱ្យស្បែកស្ងួត។ តែយ៉ាងណា កុំទាន់មានការព្រួយបារម្ភ លោកអ្នកអាចសាកល្បងតាមវិធីដូចដែលបានរៀបរាប់ខាងក្រោមនេះ...។
១.លាងសម្អាតដៃឱ្យបានច្រើនដង និងហាមយកដៃប៉ះមុខ៖ ប្រើសាប៊ូលាងសម្អាតដៃឱ្យបានញឹកញាប់ ដើម្បីបញ្ចៀសការរាលដាលនៃបាក់តេរី និងធូលីដី នៅលើផ្ទៃមុខដែលអាចបង្កឱ្យកើតមុន ជាពិសេស នៅកំលុងពេលធ្វើដំណើរទៅកន្លែងណាមួយ។២.ថែរក្សាសំណើមដល់ស្បែក៖ ស្បែកត្រូវការសំណើម មិនមែនតែខាងក្រៅទេ តែខាងក្នុងក៏ចាំបាច់ដែរ ត្រូវពិសាទឹកឱ្យបានគ្រប់គ្រាន់ នោះស្បែកនឹងមានសំណើមមើលទៅក្មេងជាងវ័យ និងទន់ម៉ត់រលោង។ ៣.លាបទ្បេការពារកម្តៅថ្ងៃ៖ ការលាបទ្បេការពារកម្តៅថ្ងៃ ជាវិធីសាស្ដ្រដ៏ល្អបំផុតមួយ ដែលជួយការពារស្បែកពីការបំផ្លាញដោយកាំរស្មី UV ដូចជាបង្កជាជំងឺមហារីក និងបំផ្លាញកោសិកាស្បែក។ ដូច្នេះ ត្រូវជ្រើសរើសទ្បេការពារកម្តៅថ្ងៃ ណាដែលមាន SPF30 ឬខ្ពស់ជាងនេះ ដោយលាបរាល់ពីរទៅបីម៉ោងម្ដង។
៤.ប្រើផលិតផលដដែល៖ នារីៗហាមផ្លាស់ប្ដូរផលិតផលថែរក្សាស្បែក នៅពេលដែលធ្វើដំណើរទៅណាមកណា ពីព្រោះការផ្លាស់ប្ដូរផលិតផលថ្មី ស្របពេលជាមួយអាកាសធាតុថ្មី អាចបណ្ដាលឱ្យស្បែកកើតមុនដោយមិនដឹងខ្លួន។ ៥.បិតម៉ាសមុខ៖ ការធ្វើដំណើរទៅទីជិត-ឆ្ងាយ អាចនាំឱ្យស្ត្រេស និងធ្វើឱ្យកើតមុន។ ហេតុនេះ ហើយអាចផ្តល់ការថែទាំដ៏ល្អបំផុត សម្រាប់ស្បែកដោយការបិតម៉ាសមុខ ក៏ដូចជាបាញ់ទឹកផ្តល់សំណើមដល់ផ្ទៃមុខ (Facial mists)៕ ដកស្រង់ពី៖ហេទ្បូ គ្រូពេទ្យ
