សុខភាព៖ ឡេលាបខ្លួន ទ្បេលាបមុខ ឬអាហារបំប៉ន់មានផ្ទុកសារធាតុបារ៉ត (Mercury) គឺផ្តល់ផលប៉ះពាល់ធ្ងន់ធ្ងរខ្លាំងណាស់ដល់សុខភាព ដោយសារបារ៉ត ជាជាតិពុលដែលរាងកាយមិនអាចបញ្ចេញមកក្រៅបានដោយងាយៗទេ។ នេះបើយោងតាមផេកមន្ទីរពេទ្យបង្អែកស្អាង...។

សារធាតុបារ៉ត ផ្តល់ផលប៉ះពាល់ដូចជា ធ្វើឱ្យស្បែកស្ដើង ងាយនឹងប្រតិកម្ម រមាស់ រោលក្រហម និងកើតមានស្នាមអុជខ្មៅខ្លាំង នៅពេលដែលអ្នកឈប់ប្រើ។ ជាមួយគ្នា វាក៏ធ្វើឱ្យ ខូចតម្រងនោម ព្រោះបារ៉តជ្រាបចូលតាមស្បែកទៅក្នុងចរន្តឈាម ហើយវាទៅបំផ្លាញកោសិកាតម្រងនោម ដែលអាចឈានដល់ការខ្សោយតម្រងនោម។ មួយវិញទៀត ប៉ះពាល់ប្រព័ន្ធប្រសាទ ធ្វើឱ្យមានអាការញ័រដៃជើង បាត់បង់ការចងចាំ ពិបាកគេង ឆាប់ខឹង មួម៉ៅ និងមានអារម្មណ៍បាក់ទឹកចិត្ត។ ចំពោះ ស្ត្រីមានផ្ទៃពោះ អាចឆ្លងទៅកូនក្នុងផ្ទៃ ដែលបណ្ដាលឱ្យទារកមានបញ្ហាក្នុងការលូតលាស់ខួរក្បាល និងប្រព័ន្ធប្រសាទ។

ក្នុងករណីលោកអ្នកបានប្រើ ឬសង្ស័យថា ផលិតផលដែលអ្នកកំពុងប្រើមានផ្ទុកសារធាតុបារ៉ត ត្រូវធ្វើរឿង៤យ៉ាងដូចជា៖ទី១.ទៅជួបគ្រូពេទ្យជំនាញខាងសើស្បែក ដើម្បីពិនិត្យ និងព្យាបាលស្បែកដែលខូចឡើងវិញ។ ទី២.ឈប់ប្រើជាបន្ទាន់ ដោយកុំសោកស្ដាយលុយ ឬខ្លាចស្បែកខ្មៅវិញ ព្រោះការបន្តប្រើប្រៀបដូចជាការចាក់ថ្នាំពុលចូលខ្លួនរាល់ថ្ងៃ។ ទី៣.វេចខ្ចប់ទុកដាក់ឱ្យមានសុវត្ថិភាព ដោយដាក់ផលិតផលនោះក្នុងថង់ប្លាស្ទិកជិត ហើយយកទៅចោលក្នុងធុងសំរាមឱ្យឆ្ងាយពីដៃក្មេង ឬសត្វចិញ្ចឹម ហាមចាក់ចោលក្នុងលូបង្ហូរទឹក ព្រោះវាបំពុលបរិស្ថាន។ ទី៤.ផឹកទឹកឱ្យបានច្រើន ព្រមទាំងទទួលទានអាហារមានជីវជាតិ ដើម្បីជួយថ្លើម និងតម្រងនោម បំពេញមុខងារឱ្យបានល្អក្នុងការបន្សុទ្ធជាតិពុលពីក្នុងខ្លួន៕